ފްރާންސް އަށް ނިސްބަތްވާ މުސްލިމް އާއިލާއެއް ވިސާ ނެތި ރާއްޖޭގައި އުޅެމުންދާތީ އެ އާއިލާ ޑީޕޯޓް ކޮށްލުމަށް ނިންމެވުމާއި ގުޅިގެން ޒުވާނުން މުޒާހަރާ ކޮށްފިއެވެ.

އާޓިފިޝިއަލް ބީޗް ސަރަހައްދުގައި އިއްޔެ ހަވީރުން ފެށިގެން ކުރިއަށް ރޭގެ ނިޔަލަށް ކުރޔަށްދިޔަ މި މުޒާހަރާގައި އެ އާއިލާ ޑީޕޯޓްކޮށްލުމާއި ދިވެހިން ދެކޮޅުކަން ހާމަވާ ލިޔުންތައް ބޭނުންކޮށްފައިވެއެވެ.

މިގޮތުން، ކޮންމެ ގައުމަކުން އަޔަސް ވެސް މުސްލިމުންނަށް ދިވެހިން މަރުހަބާ ކިޔާނެ ކަމަށާއި ފްރާންސް ފަދަ މުސްލިމުންނަށް އަނިޔާވެރި ގައުމަކަށް އެ އާއިލާ އަނބުރާ ފޮނުވާނުލުމަށް މުޒާހަރާގެ ބައިވެރިން ގޮވާލާފައިވެއެވެ.

މީގެ އިތުރުން، 12 އަހަރު ވީ އިރު އަމާންކަމާއި ސުލްހަވެރިކަމާއި އެކު ދިވެހިންނަށް އެއްވެސް އުނދަގުލެއް މި އާއިލާ ކޮށްފައިނުވާ ކަމަށާއި އެ ފަރާތްތަކަށް ސްޕެޝަލް ވިސާއެއް ހަމަޖައްސާ ދިނުމަށްވެސް ގޮވާލާފައިވެއެވެ.

މި މުޒާހަރާގައި ގިނަ އަދަދެއްގެ ބަޔަކު ބައިވެރިވެފައިވެއެވެ.