ޕާޓީއިން ވަކިކޮށް މަޖިލިސް ޓިކެޓުވެސް އަތުލި މައްސަލައިގައި މޯލްޑިވިއަން ޑިމޮކްރެޓިކު ޕާޓީ (އެމްޑީޕީ) އާ ދެކޮޅަށް ކާށިދޫ ދާއިރާގެ މެމްބަރު އަބްދުﷲ ޖާބިރު މައްސަލަ ހުށަހަޅައިފިއެވެ.

އެމްޑީޕީ މެންބަރެއްގެ ގޮތުގައި ހުންނަވައި މުޖުތަމައުގެ އާންމު މިންގަނޑާ ހިލާފަށް ރައްޔިތުންނާ ބޭއަދަބީ ބަހުރުވައިން މުއާމަލާތްކޮށް، މަސްލަހަތު ގެއްލޭގޮތަށް ތަކުރާރުކޮށް އަމަލުކުރައްވަމުންދާތީވެ އެ ޕާޓީގެ ފިޔަވަޅު އަޅާ ކޮމިޓީން ވަނީ އެ ޕާޓީގެ ފަރާތުން ވާދަކުރުމުގެ ފުރުސަތު ޖާބިރަށް ނުދިނުމަށް ނިންމާފައެވެ. އަދި ޕާޓީގެ މެންބަރުކަމުން އޭނާ ވަކިކޮށްފައެވެ.

މިކަމާ ގުޅިގެން ޖާބިރުވަނީ އެމްޑީޕީ ޗެއަރޕާސަންއަށް އިސްތިއުނާފީ މައްސަލައެއް ހުށަހަޅާފައެވެ. އެގޮތުން އިސްތިއުނާފީ މައްސަލައިގައި ޖާބިރު ބުނެފައިވަނީ މިފަދަ ހުށަހެޅުމެއްގެ ރައްދުގައި މަޖިލީހަށް ފޮނުވާ ލިޔުމަކުން ނުވަތަ ހުދު ޝަޚްސީގޮތުން މަޖިލީހުގެ ކުރިމައްޗަށް ހާޒިރުވެ އެ މެންބަރަކަށް ޖަވާބުދާރީ ވެވޭ ގޮތަށް ގަވާއިދުގައި ވަނިކޮށް ގަވާއިދާ ހިލާފަށް އޭނަގެ ޓިކެޓް އަނބުރާ ނަގާފައިވާ ކަމަށާއި ޖަވާބުދާރީ ވާނެ ފުރުސަތެއް އޭނާއަށް ޕާޓީން ނުދެއްވާ ކަމަށެވެ.

ޖާބިރު ވިދާޅުވީ ޕާޓީން ވަކިކުރަން ނިންމި ސަބަބު އޭނައަށް އަންގާފައި ނުވާ ކަމަށާއި ޕާޓީން ވަކިކޮށް ޓިކެޓް ނެގިކަމަށް މީޑިއާ ތަކަށް މަޢުލޫމާތު ދީ، އެ ޚަބަރު މީޑިއާ ތަކުގެ ފަލަސުރުޚީ އަށް އެރުވުމަކީ އޭނަގެ އިންތިޚާބީ ޙައްޤަށް އަރައިގަތުން ކަމަށެވެ. އަދި އޭނާގެ ފަރާތުން ކަމާމެދު ފާޑުކިޔުމަށް ލިޔުމަކުން ނުވަތަ ޚުދު ޝަޚްސީގޮތުން މަޖިލީހުގެ ކުރިމައްޗަށް ހާޒިރުވެ ޖަވާބުދާރީ ވުމުގެ ކުޑަވެސް ފުރުޞަތެއްވެސް ނުދީ، ނިންމަވާފައިވާތީ ޕާޓީގެ އަސާސީ ގަވާއިދުގެ ދަށުން ލިބިގެންވާ ޙައްޤުގެ ބޭނުންހިފައި، މި މައްސަލަ އިސްތިއުނާފުގެ މަޖިލީހަށް އިސްތިއުނާފު ކޮށްދިނުމަށް ޕާޓީގެ ޗެއަރޕަރސަން އަށް ޖާބިރު ވަނީ ހުށަހަޅާފައެވެ.

އިންތިޚާބީ ޙައްޤަށް ހުރަސްއެޅީ އޭނާ އާ ޕާޓީގެ ޕްރައިމަރީގައި ވާދަކުރި ޢަބްދުﷲ ރިފްޢަތު އާއި، ޕާޓީގެ ވަގުތީ ރައީސްގެ މަޤާމުގައި ހުންނެވި ކުރީގެ ރައީސް އިބްރާހީމް މުޙައްމަދު ޞާލިޙް އާ ދެމެދު އޮތް އާއިލީ ގުޅުމުގެ ތެރެއިން ޢަބްދުﷲ ރިފްޢަތުއަށް ފުރުސަތު ހޯދައިދިނުމުގެ ނިޔަތުގައި ޕާޓީގެ ޤައުމީ މަޖިލީހަށް ނުފޫޒު ފޯރުވައިގެން އިސްތިއުނާފަށް ހުށަަހަޅާ މައްސަލާގައިވެސް އިންޞާފުވެރި ނިންމެވުމެއް ނިންމަވާފާނެކަމަށް ޤަބޫލު ނުކުރެވޭ ކަމަށް ޖާބިރު ވަނީ ވިދާޅުވެފައެވެ.

ނަމަވެސް ޕާޓީގެ އަސާސީ ގަވާއިދުގައި ބަޔާންކޮށްފައިވާ ގޮތުގެމަތިން މިމަައްސަލަ ހުށަހަޅައި، އިސްތިއުނާފުން ނިންމާ ނިންމެވުމަކީ ނުފޫޒުގެ ތެރެއިން ނިންމަވާފައިވާ އިންސާފުވެރި ނިންމެވުމެއް ކަމުގައި ނުވާނަމަ، ޝަރީއަތަށް ގޮސްގެންވެސް އޭނައަށް ލިބެންޖެހޭ އިންސާފު ހޯދުމަށް މަސައްކަތް ކުރާނެ ކަމަށް ޖާބިރު ވިދާޅުވިއެވެ.

ޖާބިރުވަނީ ކެންޑިޑެސީ ބާތިލުކުރި ކަމުގައިވިޔަސް މަޖިލީހަށް ވާދަކުރައްވާނެ ކަމަށްވެސް ވިދާޅުވެފައެވެ.

ޖާބިރު މިހާރު ތަމްސީލުކުރައްވަމުންދާ ގޮނޑިއަށްވެސް ހޮވިވަޑައިގެންނެވީ އަމިއްލަ ގޮތުން ވާދަކުރައްވައިގެންކަން ފާހަގަކޮށްލެވެއެވެ.