ޕަބްލިކް ސާވިސް މީޑީއާ (ޕީއެސްއެމް)ގެ މެނޭޖިން ޑިރެކްޓަރު މުހައްމަދު ސައީދު އިސްތިއުފާ ދެއްވައިފިކަމުގެ މައުލޫމާތު ލިބިއްޖެއެވެ.

"ތޭރައޮންލައިން"އަށް މިކަން ކަށަވަރުކޮށް ދެއްވާ ޕީއެސްއެމްގެ އިސް އޮފިޝަލަކު ވިދާޅުވީ، ސައީދު އިސްތިއުފާ ދެއްވާފައިވަނީ މިއަދުގެ ވަގުތެއް ކަމަށާ ނަމަވެސް އިސްތިއުފާ ދެއްވި ވަކި ސަބަބެއް ސާފުވެފައި ނުވާކަމަށެވެ.

ސައީދު، ޕީއެސްއެމްގެ އެމްޑީކަމުން އިސްތިއުފާ ދެއްވާފައި މިވަނީ، ޕީއެސްއެމްގެ ކޮންޓެންޓާ ގުޅޭ މައްސަލަތަކެއް ދާދި ފަހުން ފެންމަތިވެފައިވާ ދަނޑިވަޅެއްގައެވެ. އެގޮތުން ރައީސުލްޖުމްހުރިއްޔާ ބައިވެިރވެވަޑައިގެންނެވި ޖަލްސާއެއް ދުަރށް ދައްކަމުން ދަނިކޮށް ކިރިތި ގުރުއާނުގެ މޫރިތި އާޔަތަކުންކަލިމެއް އުނިކޮށް އޮންއެއަރ ކުރި މައްސަލައަކާ ޕީއެސްއެމްގެ އިނގިރޭސި ކަބަރު ގަޑިއެއްގައި ބަރަހަނާ މަންޒަރު ބްރޮޑްކާސްޓުކޮށް ދުރަށް ދައްކާފައިވެއެވެ.

މި ދެ މައްސަލައިގައިވެސް ޕީއެސްއެމުން މައާފަށް އެދިފައިވެއެވެ.

ސައީދު، އެ މަގާމަށް އައްޔަނުކޮށްފައިވަނީ މިދިޔަ އޮގަސްޓު މަހެވެ. އެއީ ކުރިން އެ މަގާމުގައި ހުންނެވި ޒީނާ ޒާހިރު އެ މަގާމުން އިސްތިއުފާދެއްވުމާ ގުޅިގެންނެވެ.