ތިން ގައުމަކަށް ސަފީރުން އައްޔަންކުރަން ރައީސް ޑރ. މުހައްމަދު މުއިއްޒު ރައްޔިތުންގެ މަޖިލީހަށް ހުށަހަޅައިފިއެވެ.

އެގޮތުން ސްރީލަންކާއަށް ރާއްޖެއިން ކަނޑައަޅުއްވާ ސަފީރު ކަމުގެ މަގާމަށާ މެލޭޝީއާއަށް ކަނޑައަޅުއްވާ ސަފީރުކަމުގެ މަގާމުގެ އިތުރުން ބެލްޖިއަމް އަދި ޔޫރަޕިއަން ޔޫނިއަންއަށް ކަނޑައަޅުއްވާ ސަފީރުކަމުގެ މަގާމަށް ވެސް ވަނީ ނަން ފޮނުވާފައެވެ.

ސްރީލަންކާއަށް ސަފީރެއްގެ ގޮތުގައި އައްޔަނުކުުރުމަށް ފޮނުއްވާފައި ވަނީ މއ. ތުޅާގިރި، މަސްއޫދު އިމާދުއެވެ. އަދި މެލޭޝިއާގެ ސަފީރު ކަމަށް މ. ރުށްފުށި ޑރ. މަރިޔަމް ޝަބީނާ އަހުމަދު އައްޔަންކުރަން ވަނީ ހުށަހަޅުއްވާފައެވެ.

ބެލްޖިއަމް އަދި ޔޫރަޕިއަން ޔޫނިއަންއަށް ކަނޑައަޅާ ސަފީރު ކަމަށް މ. ގީލާވިލާ، ގީލާ އަލީ އައްޔަން ކުރަން މަޖިލީހުގެ ރުހުން ހޯދުމަށް ވަނީ ފޮނުއްވާފައެވެ.

ތިން ގައުމުގެ ސަފީރުކަމަށް އައްޔަންކުރަން ފޮނުއްވި ތިން ބޭފުޅުންގެ ނަންފުޅުތައް މަޖިލީހުގެ ޚާރިޖީ ގުޅުންތަކައި ބެހޭ ކޮމިޓީއަށް ފޮނުވައި، ދިރާސާކުރަން ވަނީ ނިންމައިފައެވެ.

ބެލްޖިއަމާއި ޔޫރަޕިއަން ޔޫނިއަންއަށް އައްޔަންކުރަން ފޮނުއްވި ގީލާއަކީ ޕީޕީއެމްގެ ފުރަތަމަ ސަރުކާރުގައި ހެލްތު މިނިސްޓްރީގެ ޕާމަނަންޓު ސެކެޓްރީކަން ކުރެއްވި ކަނބަލެކެވެ. އަދި، މިހާރު ސަރުކާރު ހިންގާ މައި ޕާޓީ ޕީއެންސީގެ ސެކެޓްރީ ޖެނެރަލްކަން ވެސް އޭނާ އަދާކުރެއްވިއެވެ.

ސްރީލަންކާއަށް އައްޔަނުކުރަން ފޮނުވި މަސްއޫދަކީ ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ސަރުކާރުގައި ރައީސް އޮފީހުގައި މީޑިއާ ސެކްރެޓަރީކަން ކުރެއްވި ބޭފުޅެކެވެ.