ބޮޑެތި މެނިފެސްޓޯތަކުން ދިވެހި ރައްޔިތުން ގުނބޯ ހައްދާ، ޑޮލަރުގެ މައްސަލަ ހައްލުކޮށްދެއްވާނެ ކަމުގެ ދުރު ރާސްތާ ޕްލޭން ވިއްކައިގެން ވެރިކަމަށް ވަޑައިގެން އަހަރެއް ވެގެން ދިޔައިރުވެސް މިފަދަ އެއްވެސް މައްސަލައަކަށް އަމަލީ ސިފައެއް ނުޖެހި ރައްޔިތުން އަދިވެސް ތިބެން މިޖެހެނީ ވާނުވާގަނޑެއްގެ ތެރޭގައެވެ.

ރައީސް މުއިއްޒު ވިދާޅުވަމުން ގެންދެވީ ޑޮލަރުގެ އަގު މައްޗަށް ނާރާނެ ވާހަކައާއި ދިވެހި ފައިސާގެ އަގު މައްޗަށް ދާ ވާހަކައެވެ. ނަމަަވެސް މަންޒަރުން ދައްކަނީ މުޅިން އެހެން ކުލަވަރެކެވެ.

ގައުމަށް ޖެހިފައިމިވާ ޑޮލަރުގެ މައްސަލަ ހައްލުކޮށްދެއްވާނެ ކަމަށް އިކޮނޮމިކް މިނިސްޓަރ މުހައްމަދު ސައީދުވެސް ޔަގީންކަން ދެއްވިތާ 8 މަހަށް ވުރެ ގިނަ ދުވަސްވީއެވެ. ފެންނަނީ އިހުނަށްވުރެވެސް އަގު މަތިވާ މަންޒަރެވެ.

ރައީސް އިބްރާހީމް މުހައްމަދު ސޯލިހްގެ ވެރިކަމުގައި ޑޮލަރު ގަންނަން ލިބޭ އަގު ބޮޑުވެގެން އެކަމަށް އެންމެ ބޮޑަށް ފާޑުކިޔަމުން އައި މީހުންގެ ޒައާމަތުގައި މިހާރު ކަޅު ބާޒާރުގައި ޑޮލަރު ގަންނަ ރޭޓް މިވަނީ 20ރ އަށް ޖެހިފައެވެ. އަހަރެއްހާ ދުވަސް ކުރިން 17ރ އާއި 18ރ ދެމެދު ގަންނަން ލިބުނު ޑޮލަރު މިހާރު މިވަނީ 19.50ރ އާއި  20.00 އަށް މައްޗަށް ޖެހިފައެވެ. އަދި ބައެއް ބްލެކް މާކެޓް އޮންލައިން ޕޭޖްތަކުން އަންނަނީ 20.10ރ. އަށްވެސް ޑޮލަރު ވިއްކަމުންނެވެ.

މިހާލަތަށް ގައުމު ގޮސްފައިވާއިރު ވެސް ދައުލަތުގެ ޚަރަދުން ބޮޑެތި ހޭދަތައް ކުރައްވާ، ގައުމު ވެއްޓާލާފައިވާ އިގްތިސާދީ ހީނަރުކަމުން އަރައިގަތުމަށް އެހީ ހޯދުމުގެ ނަމުގައި ސަލާން ޖެހުން ނޫން ކަމެއް ކުރައްވާ ތަނެއް ނުފެނެއެވެ.

ވެރިންގެ ވައްކަންތައް އިންތިހާއަށް މެކުހަށް ޖަހާ ރައްޔިތުންނަށް ކަމަކަށް ފަހު ކަމެއް ފަޅާއަރަމުން ދިއުން ނޫންކަމެއް ނުފެނެއެވެ.

ޑޮލަރުގެ މައްސަލައަށް ހައްލު ހޯއްދެވުމަށް ރައީސް އިތުރަށް ދެން ދެއްކެވި ވާހަކައަކީ ރާއްޖޭގެ ޔޫޒަބަލް ރިޒާވް އިތުރު ކުރުމެވެ. 500 މިލިއަން ޑޮލަރު ރިޒާވްގައި ބަހައްޓަން އަމާޒު ހިފާ މިކަން ހާސިލުކުރާނެ ގޮތުގެ އެކްޝަން ޕްލޭންވެސް ރިޔާސީ އިންތިޚާބުގެ ތެރޭގައި ތަފްސީލްކޮށްދެއްވި އިރު މިކަމަށްވެސް މިހާތަނަށް މަސައްކަތް ކޮށްފައިނުވެއެވެ. އޭރު ދެއްކެވި ވާހަކަތައް ގިނަ ކަމުން ހަނދާންނެތުނީ ކަމަށްވެސް ވެދާނެއެވެ. ނޫނީ މި ސަރުކާރަށް މަސައްކަތުގެ "އެންޑް ޕްރޮޑަކްޓް" ނެރެމުގެ ގާބިލުކަމެއް ނެތީ ކަމަށްވެސް ވެދާނެއެވެ.

ޑޮލަރުގެ ތާށިކަން އަންނަ ދުވަސްވަރު ފައިސާގެ މާރުކޭޓްގެ ކޮންޓްރޯލް ހޯދޭ ފަދަ ގާބިލް އިދާރާއަކަށް މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) މި ސަރުކާރުގައިވެސް ނުހެދުނެވެ. ކޮންމެ އަކަސް ޑޮލަރުގެ މަގު އެހެރީ މަތީގައެވެ. ނުހިފެހެއްޓުނެވެ. އެހުރީ ހަމަ މަތީގައެވެ.

ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތީ ޑޮލަރު ލިމިޓު އުވައިލާނެކަމުގެ ވައުދުފުޅާ އެކުގައި އެވެ. އަދި ޑޮލަރުގެ އަގު އުފުލިގެން އުޅެން ދެން ނުޖެހޭނެ ކަމަށާއި ދެން ފެންނާނީ ޑޮލަރުގެ އަގު ހެޔޮވަމުން ދާތަން ކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފަ އެވެ.

ނަމަވެސް ސަރުކާރަށް 13 މަސް ވީއިރު ރައީސް އެ ވިދާޅުވާ ހާލަތު އަދި އުފަން ނުވެއެވެ. ޑޮލަރުގެ އަގު ހެޔޮނުވެ ފަތުއަޑު ކިޔައިފާ ދަނީ ބޮޑު ވަމުން ނެވެ. މުޅި ސަރުކާރާއި ދައުލަތް ޑޮލަރަށް ޖެހި "ސައިޒް" ވަނީ އެވެ. ޑރ. މުއިއްޒުގެ ޑޮލަރު ވައުދު ވެސް ވީ ޖަމަލު ޖެހި ފޮޑިއަށެވެ.

މަތި ނުވާނެ ކަމަށް ބުނި ނަމަވެސް ޑޮލަރުގެ އަގު ހުރީ އަރާ ބޮންތީގައެވެ.