ރައީސް އިބްރާހިމު މުހައްމަދު ސޯލިހުގެ ސަރުކާރުން ދޫކުރި، "ބިންވެރިޔާ" ސްކީމުގެ ގޯތިތަކުގެ ތެރޭގައި ނުހިމެނި، ގޯތިތަކެއް ވިއްކި މައްސަލަ ރައްޔިތުން މަޖިލީހަށް ހުށަހަޅައިފިއެވެ.

އުސޫލުން ބޭރުން 50 ގޯތި ދީފައިވާކަމަށާއި، މިއީ ސަރުކާރަށް ވެސް އެނގިގެން ކޮށްފައިވާ ކަމެއްކަމަށް ތުހުމަތުކުރައްވައި، އެ މައްސަލަ ރައްޔިތުންގެ މަޖިލީހުން ބެލުމަށް، މަޖިލިސް ރައީސްއަށް ސިޓީއަކުން ހުށަހެޅީ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް (ކުޑޫ)އެވެ.

ކުޑޫ ފޮނުއްވި ސިޓީގައި ވަނީ މިހާތަނަށް ހާމަވެފައިވާ ގޮތުގައި އުސޫލުން ބޭރުން 50 ގޯތި ދޫކޮށްފައިވާކަން އެނގޭ ކަމަށެވެ. އެ ގޯތިތަކުގެ ޖުމްލަ އަގު 400 މިލިއަނަށްވުރެ މަތިވާނެ ކަމަށް ލަފާކުރެވޭ ކަމަށް ވެސް ބުނެފައިވެއެވެ.

މީގެ އިތުރުން އެޗްޑީސީން މިކަން ކުރާކަން ހައުސިން މިނިސްޓްރީއަށް އެނގޭތާ ވެސް ފަސް މަސް ދުވަސް ފާއިތުވެފައިވާ ކަމަށް މެންބަރު ކުޑޫ ތުހުމަތުކުރެއްވިއެވެ. ނަމަވެސް އެ ކަމުގައި މިނިސްޓްރީއިން ނުވަތަ ސަރުކާރުގެ އެއްވެސް އިދާރާއަކުން ވެސް ފިޔަވަޅެއް އަޅައިފައިނުވާ ކަމަށް އޭނާ ވިދާޅުވިއެވެ.

މިއީ ދައުލަތަށް އެއްވެސް މަންފާއެއް ނުވާ ގޮތަށް، ދައުލަތުގެ އަގުހުރި ބިންތަކެއް ވިއްކައިލައިފައިވާ މައްސަލައަކަށް ވާތީ، އެ ކަން ސީރިއަސް މައްސަލައެއްގެ ގޮތުގައި ބަލަންޖެހޭކަމަށް ދެކިވަޑައިގަންނަވާކަމަށް ކުޑޫ ވިދާޅުވެފައިވެއެވެ.

ހަމައެހެންމެ އެ ކަން ހިނގި ގޮތް ބެލުމަށާއި، އެ ކަމުގައި ޝާމިލުވާ މީހުން ދެނެގަނެ، އެ ކަން އިތުރަށް ހިނގައިދިޔަ ނުދިނުމަށް އަޅަން ޖެހޭ ފިޔަވަޅުތައް އަޅަން ކަމާބެހޭ މުއައްސަސާތަކަށް އެންގުމަށް މަޖިލިސް މެދުވެރިކޮށް މައްސަލަ ބަލައިދިނުމަށް އޭނާ ވަނީ ހުށަހަޅުއްވައިފައެވެ.

މީސް މީޑީޔާގައި ދައުރުވަމުންދާ ލިޔެކިޔުންތަކުން ދައްކާ ގޮތުގައި ބިންވެރިޔާ ސްކީމަށް ޝަރުތު ހަމަނުވި ނަމަވެސް ގޯތި ލިބިފައިވާ މީހުންގެ ތެރޭގައި، ހުޅުމާލެ ބަލަހައްޓާ ކުންފުނި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު ހިމެނެއެވެ.

މިކަން ފެންމަތިވެފައިވަނިކޯށް ފުލުހުން ވަނީ އެޗްޑީސީ ތެރެއަށް ވަދެފައެވެ. އެޗްޑީސީގެ ލިޔެކިޔުންތަކެއް ފޯޖުކުރި މައްސަލައެއްގައި ފުލުހުން ވަނީ ޖިނާއީ ތަހުގީގެއް ފަށާފައިކަމަށްވެސް ވަނީ ބުނެފައެވެ.