ކުރީ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއު ކަމަށްވާ "ބިންވެރިޔާ ސްކީމް"ގެ ދަށުން ހުޅުމާލެއިން ގޯތިތައް ހަވާލުކުރުމުގައި ގާނޫނާއި ހިލާފަށް އެއްވެސް ކަމެއް ކޮށްފައެއް ނޯންނާނެ ކަމަށާއި "ވަގު ގޯތި" ލިސްޓުގައި ބޭބެ ނަން އޮތުމަކީ އިއްތިފާގެއް ކަމަށް އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވެއްޖެ އެވެ.

ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް އެޗްޑީސީން ގޯތިތަކެއް ދީފައިވާ ކަމަށް ބެލެވޭ މައްސަލައެއް ފެންމަތިވުމުން އެ މައްސަލައިގެ ޖިނާއީ ތަހުގީގެއް ފުލުހުން މިހާރު ވަނީ ފަށާފަ އެވެ. "ބިންވެރިޔާ ސްކީމް"ގެ ބޭރުން އެޗްޑީސީގެ މެނޭޖިން ޑިރެކްޓަރު ފަޒުލްގެ ބޭބެ، މުހައްމަދު ފަޒީލު ރަޝީދަށް ގޯތި ދިން މައްސަލައެއް މިއަދު ވަނީ ފެންމަތިވެފަ އެވެ.

ބިންވެރިޔާ ސްކީމްގެ ލިސްޓުގައި ނެތް ބަޔަކަށް ހުޅުމާލެ އިން ގޯތިތަކެއް ދިން ކަމަށް ބުނާ މައްސަލައެއް ވަރަށް ބޮޑަށް ހޫނުވެ، މުޅި ރާއްޖޭގެ ސަމާލުކަމަށް އައުމުން އެޗްޑީސީން ކުއްލި ގޮތަކަށް ބޭއްވި ނިއުސް ކޮންފަރެންސްގައި ފަޒުލް ވިދާޅުވީ ހުޅުމާލެއިން ދިން ގޯތިތަކުގައި އިމާރާތްކުރަން ހުއްދައަށް އެދުމުން އޮންނަ އުސޫލުގެ ދަށުން ހައުސިން މިނިސްޓްރީއާ އެކު ވެރިފިކޭޝަން ޕްރޮސެސްއެއް ކުރިއަށް ގެންދާ ކަމަށެވެ.

ފަޒުލް ވިދާޅުވީ އެކަމުގައި ވެސް އޭނާ ގޯހެއް ހައްދަވާފައި ނުވާނެ ކަމުގަ އެވެ. އޭނާއާ ގުޅުވާ ދޮގު ތުހުމަތުކޮށް ވާހަކަ ދައްކަނީ ސިޔާސީ ގޮތުން ކަމަށެވެ. އަދި ވިދާޅުވީ އޭނާގެ އާއިލާ މީހުން ވެސް އެކިއެކި ކަންކަމުގައި ހިދުމަތަށް އެދޭނެ ކަމަށެވެ. އެކަމަކު ތަފާތުކޮށް އުސޫލުން ބޭރުން ގާނޫނާއި ހިލާފަށް އެއްވެސް ކަމެއް ކުރައްވާފައި ނުވާނެ ކަމަށް ވިދާޅުވި އެވެ.

ފަޒުލް ވިދާޅުވީ، އޭނާގެ އާއިލާގެ މެންބަރުންގެ ނަން ގޯތި ލިސްޓުގައި އޮތަސް، ގޯތި ހައްގުވާކަން ނިންމާނީ ހައުސިން މިނިސްޓްރީން ކަމަށެވެ. އަދި ގޯތި ދިނުމަކީ އެޗްޑީސީން ކުރާ ކަމެއް ނޫންކަން އޭނާ ތަކުރާރުކުރެއްވި އެވެ.

ފަޒުލް އެ ވާހަކަތައް ދޮގުކުރިޔަސް، ބައެއް ނޫސްވެރިން ވަނީ މިނިސްޓްރީގެ ޖަވާބު ލިބުނުތާ ހަތް މަސް ދުވަސް ފާއިތުވެގެން ދިޔައިރު ވެސް އެޗްޑީސީން މި މައްސަލަ ފާހަގަކޮށްފައި ނުވާތީ، އެ ސުވާލު މިރޭ ކުރިމަތިކޮށްފަ އެވެ. ރައްޔިތުންގެ މަޖިލީހުގެ ކޮމިޓީއަށް ފަޒުލް އާއި އެޗްޑީސީގެ ވެރިން މި މަހު ހާޒިރުކުރުމުން، އެ ކޮމިޓީގައި ވެސް މި މައްސަލަ ސަމާލުކަމަށް ގެނެސްފައި ނުވާތީ އެކަމާ މެދު ވެސް ބައެއް ނޫސްވެރިން ސުވާލު އުފެއްދި އެވެ. އެއީ، މި މައްސަލާގައި ފަޒުލްގެ ބޭބެ ވެސް ޝާމިލުވާތީ، އަމިއްލަ މަސްލަހަތު ހިމާޔަތްކުރަންތޯ ވެސް ބައެއް ނޫސްވެރިން ސުވާލުކުރި އެވެ.

ބިންވެރިޔާ ސްކީމުގެ ދަށުން ގޯއްޗަކަށް އެދި ހުށަހެޅި މީހުންގެ ތެރޭގައި ފަޒުލްގެ ކޮއްކޮ ފަޒީލް ހިމެނެނު ނަމަވެސް އުސޫލުގެ ދަށުން އޭނާގެ ޝަރުތުހަމަނުވާ ކަމަށް އޮތީ ކަނޑައަޅާފައެވެ. އޭނާއަށް ގޯތި ނުލިބުނީ ސަރުކާރުން ކުރިން ހިންގި ބޯހިޔާވަހިކަމުގެ ސްކީމެއްގެ ދަށުން ބޯހިޔާވަހިކަމެއް ލިބިފައިވާ މީހަކަށް ވާތީއެވެ.

މީސް މީޑިއާގައި އާންމުވެފައި ހުރި ލިޔެކިޔުންތަކުން ދައްކާ ގޮތުގައި މި ގޮތަށް އެޗްޑީސީން ދިން ގޯތިތަކެއްގެ ވެރިފަރާތް ސާފުކުރަން ހައުސިން މިނިސްޓްރީއަށް ހުށަހެޅި އެވެ. މިނިސްޓްރީން ދިން ޖަވާބުގައި ބުނީ އެ ގޯތިތަކަކީ އެއްވެސް ބަޔަކާ އެ މިނިސްޓްރީން ހިންގި ސްކީމުގެ ދަށުން ހަވާލުކޮށްފައި ހުރި ގޯތިތަކެއް ނޫން ކަމަށެވެ.