ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) މައްސަލައިގައި މިނިވަން އިންސާފުވެރި ތަހުގީގެއް ނުހިނގާނެ ކަމަށްވެސް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ، ބުރާސްފަތި ދުވަހުގެރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

މި ދުވަސްވަރަކީ ސަރުކާރުގެ ކުންފުނިތަކުގެ ތެރޭގައި ބޮޑެތި ކޮރަޕްޝަންގެ ކަންކަން ހިނގާ އެކަންކަން ރައްޔިތުންނާ ހަމައަށް ތިލަ ވަމުންދާ ދުވަސްވަރެކެވެ. އެގޮތުން ބުދަ ދުވަހުގެ ވަގުތެއްގައި އެޗްޑީސީއާ ގުޅުން ހުރި ވައްކަމުގެ މައްސަލައެއް ތިލަވުމުން، ފުލުހުން ފޮނުވައިގެން މައްސަލަ ބަލާކަން ދެއްކުމަށް ރައީސް މުހައްމަދު މުއިއްޒުގެ ސަރުކާރުން ދައްކަވަމުން ގެންދަނީ ދެއްކުންތެރިކަމެއް ކަމަށް ގިނަ ބަޔަކު ބުނަމުންދެއެވެ.

މިކަންކަމަށް އިޝާރާތްކުރައްވާ ރައީސް ޔާމީން ވިދާޅުވީ، ފުލުހުން އެޗްޑީސީއަށް ފޮނުވާ ރައީސް މުއިއްޒު އެކްޓުކުރެއްވީ ގޮތް ހުސްވުމުން ކަމަށެވެ. އެގޮތުން އެ މައްސަލައަކީ ރައްޔިތުންނާ ގުޅުން ހުރި ޚައްސާސް މައްސަލައަކަށް ވެފައި ރައްޔިތުން ވަގުތުން ނުކުމެ އިހުތިޖާޖުކުރަން ފެށުމުން ސަރުކާރަށް ގޮތް ހުސްވީ ކަމަށްވެސް ރައީސް ޔާމީން ފާހަގަކުރެއްވިއެވެ.

ރައީސް ޔާމީން ވިދާޅުވީ، ފަޒުލްގެ ކޮރަޕްޝަންގެ ކަންކަން ރައީސް މުއިއްޒުގެ ސަމާލުކަމަށް އެޗްޑީސީގެ ޗެއަރ އަކަށް ޒުހޫރު ހުންނެވިއިރު ގެންނެވި ކަމަށަ ނަމަވެސް ދެން ފެނުނީ ޒުހޫރު އެތަނުން ފެޔަށް ޖެހެން ޖެހުނު މަންޒަރުކަމަށް ވެސް ރައީސް ޔާމީން ފާހަގަކުރެއްވިއެވެ. އެހެންކަމުން އެކަމުންވެސް ރައީސް މުއިއްޒުގެ ބައިވެރިވުން އެޗްޑީސީއާ ފަޒުލު ހިންގަމުންދާ ޖަރީމާތަކުގައި އޮތް މިންވަރު ހާމަވާ ކަމަށްވެސް ރައީސް ޔާމީން ވިދާޅުވިއެވެ.