ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު ކަމުގައި މިފަހުން ހުންނެވި އިބްރާހިމް ފަޒުލް ރަޝީދުގެ ކޮރަޕްޝަންގެ މައްސަލަތައް އެޗްޑީސީގެ ކުރީގެ ޗެއާމަން އަހުމަދު ޒުހޫރު ރައީސް މުއިއްޒުގެ ސަމާލުކަމަށް ގެނައުމުން ވެސް އެކަން ބަލަން ރައީސް ޑރ.މުހައްމަދު މުއިއްޒު ބޭނުން ނުވުމުން ސާފުވަނީ ކޮންކަމެއް ހެއްޔެވެ..؟

މިކަމުން ސަބަބުވެރި އިންސާނެއްގެ ސިކުޑިއަށް ސާފުވާން އޮތީ ހަމަ އެންމެ ކަމެކެވެ.

އެއީ އަމިއްލަ ބޭބެއަށް ވަގު ލިޔުންތަކެއްގެ ތެރެއިން ހުޅުމާލެއިން ބިމެއް ދިން ކަމަށް ބުނާ މައްސަލައެއް ފެންމަތިވެ، އެޗްޑީސީގެ މެނޭޖިން ޑިރެކްޓަރުކަމުން މިހާރު އިސްތިއުފާދީފައިވާ އިބްރާހިމް ފަޒުލް ރަޝީދަށް ތުހުމަތުވާ ހިޔާނާތާއި ވައްކަމުގެ ގިނަ މައްސަލަތަކުގެ، އަނެއް ހިއްސާ ދާރަކީ ސީދާ ރައީސް ޑރ. މުއިއްޒު އަށް ވުމެވެ.

މިކަމަށް ބާރު ދީ ކުރީގެ މަޖިލިސް މެމްބަރު އަލީ ހުސެއިން ވިދާޅުވަނީ ރައީސުލް ޖުމްހޫރިއްޔާ ގެ ސަމާލުކަމަށް މިކަން މީގެ 6 މަސް ކުރިން ގެނެވިފައި ވަނިކޮށް އެއްވެސް ފިޔަވަޅެއް ނާޅުއްވައި ހުންނެވުމަކީ މި ހުރިހައި ކަމަކަށް ސީދާ ގޮތުންނާއި ނުސީދާ ގޮތުން ރައީސުލް ޖުމްހޫރިއްޔާ ޒިންމާވާންޖެހޭނެ ކަމެއްގެ ގޮތުގައި އެވެ.

ޒުހޫރު 5 މަސް ކުރިން ރައީސަށް ފޮނުވި 7 ސަފްހާގެ ސިޓީ އާއި ގުޅިގެން ކޮމެންޓް ކުރި މީހަކު ބުނީ ރައީސް އޮފީސް ތެރެއިން ނަން ލިސްޓުތައް ތަރުތީބުވެގެން ނުކުންނަ ގޮތް ފެނުނީމާ، ޑރ. މުއިއްޒުގެ އިހުލާޞްތެރިކަމަކީ ކޮބައިކަން ކޮންމެވެސް މިންވަރަކަށް އެބަ ދޭހަ ކޮށްލެވޭ ކަމަށާއި އަދި މިހާރު މީހުން ޑރ. މުއިއްޒުއާއި ގުޅުވާ ރަށުތެރޭ މި ކިޔާ ގިނަ ވާހަކަތައް ދިމާވާ ކަމަށެވެ.

ޒުހޫރު ސިޓީގައި ވިދާޅުވި ގޮތުގައި، މަގާމުން ވަކިކުރުމުގެ މާ ކުރިން ވެސް މި ކަންބޮޑުވުން ހިއްސާ ކުރުމަށް ރައީސްގެ އޮޕައިންޓްމަންޓަކަށް އޭނާ ވަނީ އެދިވަޑައިގެންފަ އެވެ. ނަމަވެސް މަގާމުން ވަކިކުރުމާ ހަމައަށް ވެސް އެ އެޕޮއިންޓްމަންޓް ހަމަނުޖެހި އޮތްކަން ވެސް އޭނާ ފާހަގަ ކުރެއްވި އެވެ. އަދި ފަޒުލްގެ މި އަމަލުތަކުގެ ވާހަކަ ޕީސީބީގެ ރައީސްއާ ވެސް ހިއްސާ ކުރެއްވި ކަމަށް އޭނާ ވިދާޅުވި އެވެ.

ޒުހޫރުގެ ސިޓީގެ މި ދެންނެވި އިބާރާތް "ކޯޓް" ކޮށް މީހަކު ޝޯޝަލްމީޑިއާގައި ބުނެފައިވަނީ މި ކަމުން ރައީސް ޑރ. މުއިއްޒުގެ ޒީރޯ ޓޮލަރެންސްގެ ފުރިހަމަ ރިވެތި އަދި ނަމޫނާ މިސާލަށް މަރުހަބާ ކިޔާ ކަމަށާއި ދެން އެންމެ ރަގަނޅުވާނީ އަމިއްލައަށް މަގާމުން އިސްތިއުފާ ދެއްވާ ތުހުމަތުތަކާއި ކުރިމަތި ލެއްވުން ކަމަށެވެ. ނޫންނަމަ ރައްޔިތުންގެ ދަރުބާރުން ބަހެއް އިއްވަފާނެ ކަމަށެވެ.

މިވަގުތު އެފްެއޭއެމްގެ ނޯމަލައިޒޭޝަން ކޮމިޓީގެ އިސް ބޭފުޅަކަށް ހުންނެވި ޒުހޫރު ވިދާޅުވި އޭނާ މަގާމާއި ހަވާލުވި ދުވަސް ވަރު ފަޒުލްގެ އަނބިކަނބަލުން ޒުލްފީނާ ރަޝީދު ހިމެނޭ ގޮތަށް އުސޫލުން ބޭރުން ބިންތައް ކޮރަޕްޝަނަށް މަގުފަހިވާ ގޮތަށް ދިން ކަމުގެ ތުހުމަތު ވެސް ހިމެނެ އެވެ. އަދި އެއީ އެޗްޑީސީއާ އެކު މަސައްކަތް ކުރަމުންދިޔަ ދިވެހި ވިޔަފާރިވެރިންނަށް ވެސް އިންތިހާއަށް ދަތި، އުދަނގޫތަކާ ކުރިމަތިލާން ޖެހިފައި އޮތް ދުވަސް ވަރެއް ކަމަށް އޭނާ ފާހަގަ ކުރެއްވި އެވެ.

ޗެއާމަންގެ ހައިސިއްޔަތުން އޭނާ މަސައްކަތް ކުރެއްވީ، އެކަންކަން އިސްލާހުކޮށް، މެނޭޖްމަންޓް ޖަވާބުދާރީ ކުރުވުމަށް ކަމަށް ޒުހޫރު ވިދާޅުވި އެވެ. ނަމަވެސް އެ ފުރުސަތު ފަޒުލް ނުދެއްވި ކަމަށް އޭނާ ވިދާޅުވި އެވެ. އަދި ރައީސް ޑރ. މުއިއްޒު ވެސް ހުންނެވީ "ހަނު" ކަމަށް ޒުހޫރު ސިޓީން ސާފު ވެއެވެ.

މިކަމާއި ކަންބޮޑުވުން ފާޅު ކުރާމީހުން ބުނަނީ 2023ގައި ޑރ. މުއިއްޒު އަށް ވޯޓްލީ ނުހައްގުން ވަގު ގޯތި ހޯދަން ނޫން ކަމަށާއި ނަމަވެސް މިހާރު މުއިއްޒުގެ ރަސްކަމުގެ ސިފަ ޖެހިފާ އޮތް ސަރުކާރުން ކަންކުރާގޮތުން ހެޔޮ ވެރިކަމަށް ކުރި އުއްމީދުތައް ދިޔައީ ފެނަށް ކަމަށެވެ.

ރައީސް މުއިއްޒު އަށް ފޮނުވި ސިޓީގައި ޒުހޫރު ވަނީ، ފަޒުލްއަށް އުސޫލުން ބޭރުން އަދި ނާޖާއިޒް ފައިސާ ހޯދި ކަމަށް ތުހުމަތުވާ ބައެއް ކަންކަމަށް އަލިއަޅުވާލައްވައި އެކަމާ ގުޅޭ ބައެއް ތަފްސީލުތައް ހިސާކުރައްވާފަ އެވެ.

އެގޮތުން "ރަސްމާލެ" ހިއްކަން ހަވާލުކުރި ސީއެމްސީ ކުންފުންޏަށް ފަސް ހެކްޓަރުގެ ބިމެއް ދޫކުރުމަށް ފަހު، އެ ކުންފުންޏަށް އެތައް މިލިއަން ޑޮލަރެއް އެޗްޑީސީން ދޫކޮށްފައިވާ ކަމަށް ވެސް ޒުހޫރު ވިދާޅުވި އެވެ. އަދި ލަގްޒަރީ ހައުސިންގެ މަޝްރޫއެއް ހިންގަން ފަސް ކުންފުންޏަކާ ހަވާލުކުރި ގޮތުން އެ ކުންފުނިތަކުން ކޮންމެ ޕްރޮޖެކްޓަކުން ވެސް މިލިއަން ޑޮލަރު ނަގާފައިވާ ކަމަށާއި އެއީ ފަޒުލް އަމިއްލަ މަސްލަހަތު އިސްކޮށް ކުރެއްވި ކަމެއް ކަމަށް ވެސް ޒުހޫރު ތުހުމަތު ކުރެއްވި އެވެ.

ފަޒުލް ކުރިން އެމްޑީ ކަން ކުރެއްވި އެމްޑަބްލިއުއެސްސީއަށް ދީފައިވާ ބިމެއް ނަގައި ފަޒުލްގެ މަސްލަހަތު އޮންނަ ކުންފުންޏަށް އެ ބިން ދީފައިވާ ކަމަށް ވެސް ޒުހޫރު ތުހުމަތު ކުރެއްވި އެވެ. އެގޮތަށް ނިންމީ ފަޒުލް ކޮންފްލިކްޓް ޑިކްލައި ނުކޮށް ބޯޑަށް ހުށަހަޅައިގެން ކަމަށް ވެސް ޒުހޫރު ވިދާޅުވި އެވެ. އެމްޑަބްލިއުއެސްސީ ފަދަ ބޮޑެތި ކުންފުނިތަކުގެ ބިންތައް ވެސް ފަޒުލްގެ މަސްލަހަތުގައި ބަދަލުކުރި ކަން ކަންބޮޑުވުމާ އެކު ޒުހޫރު ފާހަގަކުރެއްވި އެވެ.

ޒުހޫރުގެ މިކަންބޮޑުވުންތަކާއި އަދި ރައީސް ޑރ. މުއިއްޒުއަށް ޒުހޫރު ފޮނުވި ސިޓީއާއި ގުޅޭ ގޮތުން ގާނުނީ ވަކީލު އަލީ ޝާހް ވިދާޅުވީ ޒުހޫރުގެ ސިޓީކަމަށްބުނެ ލީކުވެގެންއުޅޭ ސިޓީއަކީ ރަނގަޅު ސިޓީއެއްނަމަ، އެނޯޓިސްއާ ގުޅިގެން ފިޔަވަޅު އެޅުމެއްނެތި ވައްކަމަށް ފުރުޞަތު ފަހިވެ، ދިވެހި ދައުލަތާއި އެތައް ބައެއްގެ ޙައްޤު ޣަޞްބުން ނިގުޅައިގަތުމުގެ ކުށުގެ ޒިންމާ ޤާނޫނު އަސާސީގެ 115 ވަނަ މާއްދާއާއި، 127 ވަނަ މާއްދާގެ ދަށުން ރައީސުލްޖުމްހޫރިއްޔާ ނަންގަވަންޖެހޭ ކަމަށެވެ. އަދި ތަޙްޤީޤީ އިދާރާތަކުން ރައީސުލްޖުމްހޫރިއްޔާގެ މައްޗަށް ޖިނާއީ ތަޙްޤީޤު ނުހިންގަވާނަމަ އެތަންތަނުގެ ވެރިން ކުށްވެރިވާނެ ކަމަށެވެ.

ޒުހޫރު އެޗްޑީސީގެ ޗެއާމަންކަމާ ހަވާލުވެވަޑައިގެންނެވީ ވެސް ރައީސްގެ ހާއްސަ އެދިވަޑައިގަތުމަކަށްކަން ފާހަގަކޮށްލެވެއެވެ. ޒުހޫރު މަގާމުން ވަކި ކުރެއްވީ މި އަހަރުގެ މޭ މަހުގެ ތެރޭގައެވެ.

މި ހުރިހާ ޝަކުވާތަކެއް ފަސް މަސް ކުރިން ޒުހޫރު، ރައީސްގެ ސަމާލުކަމަށް ގެންނަވާފައިވާއިރު، މި މައްސަލަ ފެންމަތިވުމާ ހަމައަށް ވެސް ފަޒުލްއާ މެދު އެއްވެސް ފިޔަވަޅެއް އަޅާފައި އޮތްކަން ސަރުކާރުން ހާމަކޮށްފައެއް ނުވެ އެވެ.

ބިންވެރިޔާ ސްކީމުގެ ދަށުން ގޯއްޗަކަށް އެދި ހުށަހެޅި މީހުންގެ ތެރޭގައި ފަޒުލްގެ ކޮއްކޮ ފަޒީލް ހިމެނެނު ނަމަވެސް އުސޫލުގެ ދަށުން އޭނާގެ ޝަރުތުހަމަނުވާ ކަމަށް އޮތީ ކަނޑައަޅާފައެވެ. އޭނާއަށް ގޯތި ނުލިބުނީ ސަރުކާރުން ކުރިން ހިންގި ބޯހިޔާވަހިކަމުގެ ސްކީމެއްގެ ދަށުން ބޯހިޔާވަހިކަމެއް ލިބިފައިވާ މީހަކަށް ވާތީއެވެ.

މީސް މީޑިއާގައި އާންމުވެފައި ހުރި ލިޔެކިޔުންތަކުން ދައްކާ ގޮތުގައި މި ގޮތަށް އެޗްޑީސީން ދިން ގޯތިތަކެއްގެ ވެރިފަރާތް ސާފުކުރަން ހައުސިން މިނިސްޓްރީއަށް ހުށަހެޅި އެވެ. މިނިސްޓްރީން ދިން ޖަވާބުގައި ބުނީ އެ ގޯތިތަކަކީ އެއްވެސް ބަޔަކާ އެ މިނިސްޓްރީން ހިންގި ސްކީމުގެ ދަށުން ހަވާލުކޮށްފައި ހުރި ގޯތިތަކެއް ނޫން ކަމަށެވެ.

އެ ތަހުގީގު ފެށިއިރު، މައްސަލަ ބޮޑުވެފައިވާ ގޯތީގެ ވަށާފާރު ހުރީ ރާނަން ފަށައިފަ އެވެ. ގާތްގަނޑަކަށް ހަތަރު ފޫޓެއްހާ އުސްމިނަށް ވަނީ ވަށައިގެން ފާރު ރާނައިފަ އެވެ. އެ މަސައްކަތް ކޮށްފައި ވަނީ ވަރަށް ފަހުންކަން އެނގެ އެވެ. ރޭނުމަށް ބޭނުންވާ ބައެއް ސާމާނު ވެސް ގޯތިތެރޭގައި އެބަހުއްޓެވެ.

މި މައްސަލަގަނޑުގެ ޕްރެޝަރު ސަރުކާރަށް ބޮޑުވެފައި އޮތް ދަނޑިވަޅުގައި ރައީސް ޔާމީން ވިދާޅުވަނީ މި މައްސަލަ ބަލަން ކަމަށް ބުނެ މިހާރު ކުރިއަށްދާ ތަހުގީގަކީ ރައްޔިތުންގެ ލޮލުގައި އަޅުވާ އަނދުނެއް ކަމަށެވެ. މި މައްސަލައަކީ މިއަދަކު އިއްޔެއަކު ހިނގި ކަމެއް ނޫންކަން ފާހަގަކުރައްވަމުން ރައީސް ޔާމީން ވިދާޅުވީ މިއީ އެތައް ޒަމާނަކަށް ދިގުލައިގެން ގޮސްފައިވާކަމެއް ކަމަށާއި، އެކަން ހިނގަމުން އައިކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް އެނގިވަޑައިގަންނަވާނެ ކަމަށެވެ.

ތެދެކެވެ. މި ވަރަށް ސަރުކާރު "ބަދުނާމު" ވާވަރުގެ ވައްކަމެއް ފޮރުވަން ސަރުކާރުގެ ބޮޓުން އުޅޭ ގޮތް ފެނިފާ މިކަމުގައި ސީދާ ރައީސް މުއިއްޒުގެ އަތެއް ނުވުމަށް ވުރެ ވުން ގާތެވެ. އަދި ފަޒުލް ހިންގަމުންދިޔަ "ވައްކަން" ނުބަލާ އެކަަން ސަރުކާރުގެ ސަމާލުކަމަށް ގެނެސްދިން މީހާ ވަޒީފާއިން ދުރުކުރުމުން މިކަމަށް އިތުރަށް ބާރު ލިބެ އެވެ.

ރައީސް ޑރ. މުއިއްޒު އެވެ. ޒުހޫރުގެ ސިޓީން މަނިކުފާނާއި މެދު މިއަދު ނިކަމެތި ރައްޔަތުން ކުރި އުންމީދުގެ ހުޅުކޮޅު ނިވިއްޖެ އެވެ. ކުރި ފޮނި އުންމީދު ފެނަށްވެ ރައްޔިތުން މާޔޫސްވެއްޖެ އެވެ. ސަރުކާރު ދެކެ ފޫހިވެއްޖެ އެވެ. ވެރިމީހާއަށް ކުރި ގަދަރު ގެއްލި ނިމިއްޖެ އެވެ. މަނިކުފާނަށް ދިވެހިން ގުޑްބައި ކިޔައިފި އެވެ.

މިއަދު ސަބަބުވެރި އިންސާނެއްގެ ވިސްނުމުން ވިސްނާލުމުން ޒުހޫރުގެ ސިޓީން ބާރު ދެނީ ފަޒުލް ހިންގި "ވައްކަމު"ގައި ރައީސް މުއިއްޒުގެ އަތެއް ވާކަމެވެ.