ޕަބްލިކު ސާވިސް މީޑިޔާ (ޕީއެސްއެމް)ގެ މެނޭޖިން ޑިރެކްޓަރުގެ މަގާމަށް މިސަރުކާރުގެ ތެރޭގައި ތިން ވަނަ ބޭފުޅާ އައްޔަންކުރައްވައިފިއެވެ.
އެގޮތުން ޕީއެސްއެމްގެ މެނޭޖިން ޑިރެކްޓަރުގެ މަގާމަށް މިއަދު އައްޔަންކޮށްފައިވަނީ އެ ކުންފުނީގެ ސޭލްސް އެންޑް މާކެޓިން ޑިރެކްޓަރުގެ މަގާމުގައި ހުންނެވި އިބްރާހީމް ނަސްރީން (ނައްޓު)އެވެ.
ނަސްރީނަކީ ޕީއެސްއެމްގައި ޚިދުމަތް ކުރައްވާތާ ނުވަ އަހަރަށް ވުރެ ގިނަ ދުވަސް ވެފައިވާ ބޭފުޅެއްގެ އިތުރުން، ގައުމީ ޔުނިވާސިޓީއާއި މެޕްސް ކޮލެޖާއި ސައިރިކްސް ކޮލެޖުގައި ލެކްޗަރާއެއްގެ ގޮތުގައި މަސައްކަތް ކުރައްވާފައިވާ ބޭފުޅެކެވެ.
ނަސްރީން ވަނީ މެލޭޝިއާގެ ލިމްކޮކް ޔުނިބާސިޓީން ބެޗްލާސް ޑިގްރީ ހާސިލުކުރައްވައި، ތައިލެންޑުގެ ކޮލެޖް އޮފް އިނޮވޭޝަން އެޓް ތަމަސަޓް ޔުނިވާސިޓީން ސާވިސް އިނޮވޭޝަންގެ ދާއިރާއިން މާސްޓާސް ޑިގްރީ ހާސިލުކުރައްވައިފައެވެ.
ނަސްރީން އަކީ މި ސަރުކާރުން އެ ކުންފުންޏަށް އައްޔަންކުރި 3 ވަނަ މެނޭޖިން ޑިރެކްޓަރެވެ.
އެ މަގާމާ ފުރަތަމަ ހަވާލުވެވަޑައިގެންނެވީ ބްރޯޑްކާސްޓިން ކޮމިޝަންގެ ކުރީގެ މެންބަރު ޒީނާ ޒާހިރެވެ. އެހެން ނަމަވެސް އޭގެ 9 މަސް ފަހުން އޮގަސްޓު މަހުގެ 24 ވަނަ ދުވަހު ޒީނާ އެ މަގާމުން އިސްތިއުފާ ދެއްވި އެވެ. އިސްތިއުފާ ދެއްވި ސަބަބެއް މިހާތަނަށް ހާމައެއް ނުކުރެ އެވެ.
އެއަށްފަހު އެ މަގާމަށް އައްޔަންކުރެއްވީ މުހައްމަދު ސައީދު މިދިޔަ އަންގާރަ ދުވަހު ވަނީ އިސްތިއުފާ ދެއްވާފަ އެވެ.
