މާޗު މަހު ބާއްވާ ރައްޔިތުންގެ މަޖިލީހުގެ އިންތިހާބުގައި ވޯޓުލާން ރީ-ރަޖިސްޓްރީވުމަށް ހުޅުވާލާފައިވާ ފުރުސަތުގައި މިހާތަނަށް ހުށަހެޅީ 7،350 ފޯމު ކަމަށް އިލެކްޝަންސް ކޮމިޝަނުން ހާމަކޮށްފިއެވެ.
އެ ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވެފައިވާ ގޮތުގައި މަޖިލިސް އިންތިޚާބުގައި، ރީ-ރަޖިސްޓަރީ ކުރަން މިހާތަނަށް 7350 މީހުން އިލެކްޝަންސް ކޮމިޝަނަށް ހުށަހަޅާފައިވާ ކަމަށާއި އޭގެތެރެއިން 6465 މީހުން ރީ-ރަޖިސްޓަރީ ކޮށްދީފައިވާ ކަމަށެވެ.
މީގެ އިތުރުން 885 ހުށަހެޅުމެއް ބަލައިނުގަނެވޭ ކަމަށާއި ރީ-ރަޖިސްޓަރީ ކުރަން ހުށަހެޅުމުގެ ކުރިން، މިހާރު ރަޖިސްޓަރީ ވެފައިވާ ތަން ބެލުމަށް ވެސް ހަބީބް ވަނީ އިލްތިމާސްކޮށްފައެވެ.
ރައްޔިތުންގެ މަޖިލީހުގެ އިންތިހާބު ބޭއްވުމަށް އިލެކްޝަންސް ކޮމިޝަނުން ކަނޑައަޅާފައިވަނީ އަންނަ މާޗު މަހުގެ 17 ވަނަ ދުވަހެވެ. މި އިންތިޚާބުގައި 608 ވޯޓު ފޮށި ބެހެއްޓުމަށް އެ ކޮމިޝަނުން ވަނީ ނިންމާފައެވެ.
ނަމަވެސް ތާރީޚު ބަދަލުކުރުމަށް ރައްޔިތުންގެ މަޖިލީހަށް އިސްލާހެއް ހުށަހަޅާ މިހާރު ދަނީ ކޮމިޓީ ލެވެލްގައި އެ އިސްލާހު ދިރާސާކުރުމުގެ މަސައްކަތް ކުރަމުންނެވެ. ތާރީހު ބަދަލުކުރަން މަސައްކަތްކުރަމުން ދަނީ ރޯދަމަހާ ދިމާވާތީއެވެ.
