އާ އަހަރާ ދިމާކޮށް، ބަނގުރާ އަދި މަސްތުވާތަކެތި ބޭނުންކޮށް, ވިއްކާ ވިޔަފާރިކުރުން އިތުރުވެގެން ދާނެކަމަށް ބެލެވޭތީ ފުލުހުންގެ ހާއްސަ އޮޕަރޭޝަނެއް ފަށައިފި އެވެ.
ފުލުހުން މިއަދު ނެރުނު ކުރު ބަޔާނެއްގައި ބުނީ އެފަދަ މައްސަލަތަކެއް އާ އަހަރާ ދިމާކޮށް އިތުރުވެދާނެތީ ޑްރަގް އެންފޯސްމަންޓް ޔުނިޓާއި މެރިން ޕޮލިހާއި ކ. އަތޮޅު ޕޮލިސް ސްޓޭޝަންތައް ގުޅިގެން އިއްޔެ ހާއްސަ އޮޕަރޭޝަނެއް ފަށާފައިވާ ކަމަށެވެ.
އެގޮތުން މި އޮޕަރޭޝަންގައި ހުޅުމާލޭގެ ފަޅުތެރެ ޕެޓްރޯލް ކުރުމާއި ރަށުތެރެ އަށް ބަނގުރާ އަރުވައި، ވިއްކާ ކަމަށް ޝައްކު ކުރެވޭ ކެފޭ/ރެސްޓޯރަންޓްތައް މޮނީޓާކޮށް ގާނޫނާއި ގަވާއިދާ ހިލާފުވާ ފަރާތްތަކަށް ފިޔަވަޅު އަޅާނެ ކަމަށް ފުލުހުން ބުންޏެވެ.
އާ އަހަރާ ދިމާކޮށް މާލޭގައި ބަނގުރާ ވިއްކުމާއި މަސްތުވާތަކެތީގެ ވިޔަފާރީގެ ކުށްތައް އިތުރުވާ ކަމަށް މީގެ ކުރިން ފުލުހުން ބުނެފައިވެ އެވެ. މިކަން ކޮންޓްރޯލުކުރަން ކޮންމެ އަހަރެއްގެ ފަހުކޮޅު ވެސް ފުލުހުން މިފަދަ އޮޕަރޭޝަންތައް ހިންގަ އެވެ.
