ނިމިދިޔަ ސަރުކާރުން ހުޅުމާލޭގައި އިމާރާތްކުރަން ފެށި 4،000 ފުލެޓު ލިބުނު ކަމަށް އިއުލާނުކުރި ދާއިމީ ލިސްޓުގައި ޝަރުތުހަމަވާ މީހުންގެ ތެރެއިން އެންޓި ކޮރަޕްޝަން ކޮމިޝަން (އޭސީސީ)އަށް އެއްވެސް މައްސަލައެއް ފާހަގަނުކުރެވޭ މީހުންގެ ފުލެޓުތައް ވީ އެންމެ އަވަހަކަށް ދޫކުރަން ގޮވާލައި ރައްޔިތުންގެ މަޖިލީހަށް މައްސަލައެއް ހުށަހަޅައިފިއެވެ.

މައްސަލަ ހުށަހެޅީ ގަލޮޅު އުތުރު ދާއިރާގެ މެންބަރު އީވާ އަބްދުﷲއެވެ.

ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ހަތަރު ވަނަ ޖަލްސާއަށް އީވާ ހުށަހެޅުއްވި ކުއްލި މައްސަލައިގައި ވަނީ، ބޯހިޔާވަހިކަމުގެ މައްސަލައަކީ އަދިވެސް ހައްލުނުވެ އޮތް މައްސަލައެއް ކަމަށާއި، ކުރީ ސަރުކާރުން ހިންގި ގެދޮރުވެރިޔާ ސްކީމްގެ ދަށުން 4،000 ފަރާތަކަށް ފްލެޓު ލިބިފައިވާ ކަމަށް އާންމުކޮށް ދާއިމީ ލިސްޓު ނެރުން ވެގެން ދިޔައީ އެތައް އާއިލާއަކަށް ސާދާ ދިރިއުޅުމެއް އުޅެވޭނެ ކަމުގެ ފޮނި އުންމީދަކަށް ކަމަށް ވިދާޅުވެފައެވެ.

އެކިއެކި ސަބަބުތަކަށްޓަކައި އެ ފުލެޓުތައް އޭގެ ހައްގުވެރިންނަށް ދޫނުކުރެވި ދިގުލައިގެން ދިއުމުގެ ސަބަބުން އެ މީހުންނަށް ނުހަނު ގެއްލުންވެފައިވާ ކަމަށް އެ މައްސަލައިގައި ވަނީ ބުނެފައެވެ.

"އާއިލާގެ ހުރިހާ މެންބަރުންނާ އެކު ކުދިކުދި ތަންތަނުގައި ދިރިއުޅެންޖެހިފައިވާ އެތަކެއް އާއިލާތަކެއް އެބަތިބި،" މައްސަލަ ހުށަހަޅުއްވަމުން އިދިކޮޅު ދަ ޑިމޮކްރެޓްސްއަށް ނިސްބަތްވާ އީވާ ވިދާޅުވިއެވެ.

މި މައްސަލައިގައި ފުލެޓުތައް ދީފައިވާ ގޮތާ މެދު ގިނަ ޝަކުވާތަކެއް ހުށަހެޅި އޭސީސީން އެ ކަމުގެ ތަހުގީގެއް ހިންގާފައިވާއިރު، ފުލެޓު ލިބުމުގެ ޝަރުތުހަމަވާ، އެއްވެސް މައްސަލައެއް ނެތް ހައްގުވެރިންނަށް ލަސްކުރުމަކައިނުލާ ފުލެޓުތައް ދޫކުރަން އީވާ ވަނީ ސަރުކާރަށް ގޮވާލައިފައެވެ.

ގެދޮުވެރިޔާ ސްކީމްގެ ދަށުން ދޫކުރި 4،000 ފްލެޓު ދިނުން މަޑުޖައްސާލަން ސަރުކާރަށް އޭސީސީން އެންގީ މިދިޔަ ނޮވެމްބަރު މަހުގެ 16 ވަނަ ދުވަހުގައެވެ. އެ މައްސަލައާ ގުޅިގެން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމެޓީއަށް އޭސީސީގެ މެމްބަރުން ހާޒިރުކުރުމުން އެ ކޮމިޝަނުން އޭރު ބުނީ ގެދޮރުވެރިޔާ ސްކީމަށް އެދި ހުށަހަޅާފައިވާ ފަރާތްތަކަށް ލިބުނު ޕޮއިންޓު އިތުރުކޮށް، ޝަރުތުހަމަނުވާ ފަރާތްތަކަށް ސަރުކާރުން ފްލެޓު ދޫކޮށްފައިވާ ކަމަށެވެ.

މި މައްސަލަ ބެލުމަށް ފަހު، ފްލެޓުތައް ދޫކުރުން ހުއްޓާލަން އެންގި އެންގުން ނިމުމަކަށް ގެނެސްފައިވާ ކަން ހާމަކޮށް، ފްލެޓުތައް ދޫކުރުމުގެ މަސައްކަތް ކުރިއަށް ގެންދަން އޭސީސީން ސަރުކާރަށް ހުއްދަ ދިނީ މި މަހުގެ ފުރަތަމަ ދުވަހުގައެވެ. އޭސީސީން ބުނީ، ގެދޮރުވެރިޔާ ސްކީމްގެ ދަށުން އިއުލާންކުރި ފުލެޓު ދޫކުރުމާ ގުޅޭ ކަންކަން ކުރިއަށް ގެންދިއުމުގައި ވަކި ކަންތައްތަކަކަށް ރިއާޔަތްކޮށްގެން އަމަލުކުރުމަށް މިނިސްޓްރީ އަށް އަންގާފައިވާ ކަމަށެވެ.

ނަމަވެސް ފްލެޓު ދޫކުރަން ނެރުނު ލިސްޓުގައި ހިމެނޭ ފަރާތްތަކުގެ ތެރެއިން ގާތްގަނޑަކަށް 60 ޕަސެންޓު މީހުން ޝަރުތުހަމަނުވާ ކަމަށް، އޭސީސީން މިދިޔަ ހޯމަ ދުވަހު ވަނީ ބުނެފައެވެ. އަދި ގާތްގަނޑަކަށް 20 ޕަސެންޓު މީހުންގެ ޝަރުތު ފުރިހަމަވިޔަސް ފޯމުތަކުގައި މައްސަލަ ހުރިކަން ވެސް، އޭސީސީން ވަނީ ފާހަގަކޮށްފައެވެ.