ޕީޕަލްސް ނޭޝަނަލް ކޮންގްރެސް ޕީއެންސީގެ މަތީ ފަޑީގައި ތިއްބެވި ގިނަ ބޭފުޅުންނަކީ މޯލްޑިވްސް މާކެޓިންްގ އެންޑް ޕަބްލިކް ރިލޭޝަންސް ކޯޕޮރޭޝަން އެމްއެމްޕީއާރުސީ ހިޔާނާތުގެ މައްސަލައިގައި ތާށިވެފައި ތިބި ބޭފުޅުންކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައިވަނީ ޕީޕަލްސް ނޭޝަނަލް ފްރަންޓް ޕީއެންއެފްގެ ޖަގަހަ ޖަލްސާއެއްގައި ވާހަކަ ދައްކަވަމުންނެވެ.

އެމްއެމްޕީއާރުސީ މައްސަލަ ބެލުމަށް މި ސަރުކާރުގެ އެއްވެސް ހިޔާލެއް ނެތް ކަމަށް ރައީސް ޔާމީން ވިދާޅުވިއެވެ. އެ މައްސަލައަކީ ނުބެލޭނެ މައްސަލައެއްކަމަށް ވިދާޅުވެ ރައީސް މުހައްމަދު މުއިއްޒުގެ މައްސަލަ ބައްލަވަން ހުއްދަ ދެއްވަން އެމަނިކުފާނުވަނީ ގޮވާލައްވާފަ އެވެ.

ސަރުކާރުގެ ގިނަ ބައިވެރިންދަނީ ވައްކަން ކުރަމުންކަމަށް ވިދާޅުވެ އެކަމާއި ގުޅިގެން ރައީސް ޔާމީންވަނީ ގިނަ ސުވާލުތަކެއް އުފައްދަވާފަ އެވެ. އަދި ކުދި ސޯބު އެނބުރޭނީ ބޮޑެތި ސޯބު އެނބުރޭ ފަދައިންކަމަށް ވިދާޅުވެފަ އެވެ.