މާލޭގެ ގެއެއްގެ ތެރޭގައި މަރުވެފައި އޮއްވައި މިއަދު ހެނދުނު ފެނުނު މީހެއްގެ ޕޯސްޓްމޯޓަމް ހަދަން ފުލުހުން ނިންމައިފި އެވެ.

ފުލުހުން ބުނިގޮތުގައި މަރުވެފައި އޮއްވާ ފެނިފައިވަނީ މ. ތަރިވިލާގެ، ހުސެއިން އަހުމަދު ،41، އެވެ.

އޭނާ މަރުވުމާ ގުޅިގެން މިއަދު ހެނދުނު 9:53 ހާއިރު އައިޖީއެމްއެޗް ހޮސްޕިޓަލަށް ގެންގޮސްފައިވާ ކަމަށް ފުލުހުން ބުނެ އެވެ. އަދި އޭނާގެ ހަށިގަނޑުގެ ޕޯސްޓްމޯޓަމް ހެދުމަށް ނިންމާފައިވާ ކަމަށްވެސް ފުލުހުން ބުނެ އެވެ.

މި މައްސަލަ ފުލުހުން ތަހުގީގުކުރަމުންދާ ކަމަށް ފުލުހުން ވަނީ ބުނެފައެވެ. މިކަމާ ގުޅޭ އިތުރު ތަފްސީލެއް ފުލުހުން ހިއްސާކޮށްފައެއް ނުވެއެވެ.

ހުސައިން އަހުމަދަކީ ތަފާތު އެކިއެކި މައްސަލަތަކާ ގުޅިގެން އެކި ފަހަރު މަތިން ހޯދަން ފުލުހުން ފޮޓޯއާ އެކު އާންމުކުރާ މީހެކެވެ. އެންމެ ފަހުން އޭނާ ހޯދަން ފުލުހުން އިއުލާންކުރީ މިދިޔަ އަހަރުގެ އޮކްޓޫބަރު މަހު އެވެ.