ރާއްޖޭގައި ހުރި މިސްކިތެއްގެ ތެރޭގައި އަައުރަ ނިވާނުކޮށް ތިބެ ބިދޭސީންތަކެއް ވެސް ހިމެނޭހެން ބަޔަކު ކުޅިވަރު ކުޅެ މިސްކިތުގެ ހުރުމަތް ކަނޑާލައިފިއެވެ.
އެގޮތުން ތ.ވިލުފުށީގައި ހުންނަ މަސްޖިދުއް އުމަރު ފާރޫޤު މިސްކިތުގެ ތެރޭގައި އަންހެނުންނާ ފިރިހެންނުން މަސްހުނިވެ ތިބެ ކުޅިވަރު ކުޅޭ މަޖާ ނަގާ މަންޒަރު ފެންނަ ވީޑިއޯ ރޭގެ ވަގުތެއްގައި ވަނީ މީސް މީޑިޔާގައި އާންމުވެފައެވެ.
އެ ވީޑިއޯއިން ފެންނަ ގޮތުގައި އެތަނުގައި އެ ހަރަކާތެއް ހިންގާފައި ވަނީ ބިދޭސީންނެވެ. އެ ވީޑިއޯގައި ފެން އަޅާ ތައްޓެއް ބޮލަށް ލައިގެން ދެ މީހަކު ރޭސް ޖަހާ މަންޒަރު ފެނެއެވެ. އެ ތަނުގައި އެ ވަގުތު ލަވަ ވެސް ޖަހާފައި ހުރެއެވެ.
އެ ހަރަކާތްތައް އެ މީހުން ކުރިއަށް ގެންދިޔަ އިރުގައި މާތްﷲ ގެ ކަލާމްފުޅާއި ގުރުއާނުގެ އެކި ކުރެހުންތައް އެ އިމާރާތުގެ ތެރޭގައި ހުރި މަންޒަރު ވެސް ވީޑިއޯއިން ފެނެއެވެ.
މިކަމާ ގުޅިގެން ގިނަ ބަޔަކު ކަންބޮޑުވުން ފާޅުކުރަން ފަށާފައިވަނި އިސްލާމިކު މިނިސްޓަރު ޑރ މުހައްމަދު ޝަހީމު އަލީ ސައީދު މީސް މީޑިޔާގައި ކުރެްވި ޕޯސްޓެއްގައި ވިދާޅުވީ، މިސްކިތެއް ކަމަށް ބެލެވޭ ތަނެއްގައި މިސްކިތެއްގެ ގަދަރާއި އިހުތިރާމާ ނުގުޅޭ ކަންތައްތަކެއް ކުރާތަން ފެންނަ ވީޑިއޯގެ މައްސަލަ އެމަނިކުފާނުގެ ސަމާލު ކަމަށް އައިސްފައިވާ ކަމަށެވެ.
އެހެންކަމުން އެއީ ކިހިނެއް ހިނގާފައިވާ ކަމެއްތޯ ބެލުމުގެ ކަންކަން މިނިސްޓްރީ އިން ފަށާފައިވާ ކަމަށާ މިސްކިތްތަކުގެ ހުރުމަތް ކަނޑާ ފަރާތްތަކަށް ދީނީ އެއްބައިވަންތަކަން ހިމާޔަތްކުރުމުގެ ގާނޫނާއި ގަވައިދުގެ ދަށުން ފިޔަވަޅު އަޅާނެ ކަމަށްވެސް އެމަނިކުފާނު ވިދާޅުވެފައިވެއެވެ.
