ޕީޕަލްސް ނޭޝަނަލް ކޮންގްރެސް ޕީއެންސީން ވަގަށް މެމްބަރުން ވައްދަން ފެށީ އެ ޕާޓީއަށް ވަންނާނެ ރައްޔިތެއް ނެތުމުންކަމަށް ޕީޕަލްސް ނޭޝަނަލް ފްރަންޓް ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

މަލީހު މިފަދައިން ވިދާޅުވެފައިވަނީ ބުރާސްފަތި ދުވަހުގެ ރޭ ބޭއްވި ޕީއެންއެފް ޖަގަހަ ޖަލްސާގައި ވާހަކަ ދައްކަވަމުންނެވެ.

އެގޮތުން ޕީއެންސީން ވެރިކަމާއި ހަވާލުވި އިރު އެ ޕާޓީގައި ތިބީ 2988 މެމްބަރުންކަން މަލީހުވަނީ ފާހަގަ ކުރައްވާފައެވެ. އެހެންކަމުން އެ ޕާޓީއަށް މީހުން އިތުރު ކުރުމުގެ ގޮތުން ގިނަ މަސައްކަތްތަކެއް ކުރި ކަމާއި އޭގެ ތެރޭގައި ރަށްރަށަށް ދަތުރު ކުރުން ހިމެނޭކަމަށް މަލީހު ފާހަގަކުރެއްވިއެވެ. ނަމަވެސް ރައްޔިތުންދިނީ ޕީއެންސީން ހީ ކުރި ފަދަ ޖަވާބެއް ނޫންކަމަށް އެމަނިކުފާނުގެ ވާހަކައިގައި ފާހަކަ ކުރެއްވިއެވެ.

އިތުރަށް ވާހަކަ ދައްކަވަމުން މަލީހުވަނީ ޑީއެންއާރުން ވައްކަން ކުރާ މައްސަލައަކީ ރައީސް މުހައްމަދު މުއިއްޒު އިސްވެ ހުންނަވާ ކުރައްވާ ކަމެއްގެ ގޮތުގައި ތުހުމަތު ކުރައްވާފައެވެ. އަދި އެކަން ކުރީ އިލެކްޝަންސް ކޮމިޝަންވެސް ޕެރަލައިޒު ކުރުމަށްފަހުކަމަށް މަލީހު ވިދާޅުވިއެވެ.