20 ވަނަ ރައްޔިތުންގެ މަޖިލީސް އިންތިޚާބުގައި ރީ ރަޖިސްޓަރީ ކުރަން އިލެކްޝަންސް ކޮމިޝަން (އީސީ) އިން ހުޅުވައިލި މުއްދަތުގައި ރީރަޖިސްޓަރީ ކުރުމަށް 13,000 އަށްވުރެ ގިނަ މީހުން ހުށަހަޅައިފިއެވެ.

މާޗު މަހުގެ 17 ވަނަ ދުވަހު ބޭއްވުމަށް ހަމަޖެހިފައިވާ މަޖިލީސް އިންތިހާބުގައި ރީރަޖިސްޓަރީ ކުރަން އިލެކްޝަންސް ކޮމިޝަނުން ދިން 7 ދުވަހުގެ މުއްދަތު ހަމަވެފައިވަނީ ބުދަ ދުވަހުގެ ހަވީރު 16:00 އަށެވެ.

އީސީގެ ނައިބު ރައީސް އިސްމާއިލު ހަބީބު އެކްސްގައި ކުރެއްވި ޕޯސްޓެއްގައި ވިދާޅުވީ ރީރަޖިސްޓަރީ ކުރުމަށް 13,378 މީހަކު ހުށަހަޅާފައިވާ ކަމަށެވެ. އޭގެތެރެއިން 11,919 މީހުން ރީރަޖިސްޓަރީ ކޮށްދެވިފައިވާ ކަމަށާއި 1,459 ހުށަހެޅުމެއް ބަލައިނުގަންނަ ކަމަށްވެސް ހަބީބު ވަނީ ވިދާޅުވެފައެވެ.

ހަބީބު އިތުރަށް ވިދާޅުވީ ރާއްޖެއިން ބޭރުގައި ވޯޓުލުމަށް ރީ ރަޖިސްޓަރީ ކުރުމަށް ކަނޑައަޅާފައިވާ އަދަދު ހަމަވެފައިވަނީ ހަމައެކަނި މެލޭޝިޔާއާއި ސްރީލަންކާގައެވެ.

ރައްޔިތުންގެ މަޖިލީސް އިންތިހާބު ރޯދައިގެ ފަހުގެ ތާރީހެއްގައި ބާއްވަން ޖެހިއްޖެނަމަ ރީ ރަޖިސްޓަރީ ކުރުމަށް އިތުރު ފުރުސަތެއް ކޮމިޝަނުން ދޭނެކަމަށްވެސް ހަބީބު ވަނީ ވިދާޅުވެފައެވެ.