އިހުލާސްތެރިކަމާއެކު މަސައްކަތް ކުރައްވާ ނަމަ އަޒުލު ކުރުމާމެދު ރައީސުލްޖުމްހޫރިއްޔާއަކު ސިހވަޑައިގެން ތެޅިފޮޅިގަންނަވާ ވަޑައިގަންނަވަން ނުޖެހޭނެ ކަމަށް ރައީސް އަބްދުﷲ ޔާމީން ވިދާޅުވެއެވެ.

ރައީސުލްޖުމްހޫރިއްޔާ މަގާމުން ދުރު ކުރުމުގެ އަޑުތަކާއި އެކު މުޅި ސަރުކާރާއި ސިޔާސީ މަގާމުތަކުގައި ތިއްބެވި ބޭފުޅުން ޑިފެންސަށް ފައިބަން ނުޖެހޭކަމަށް ރައީސް ޔާމީން ވިދާޅުވެފައިވަނީ އެމަނިކުފާނު އިސްވެ ހުންނަވައި އުފައްދަވަން މަސައްކަތް ކުރައްވާ ޕީޕަލްސް ނެޝަނަލް ފްރަންޓު (ޕީއެންއެފް)ގެ ޓިކެޓުގައި ކުރިއަށް އޮތް މަޖިލިސް އިންތިހާބަށް ނުކުންނަ ކެންޑިޑޭޓުން ތައާރަފު ކުރުމަށް ބުރާސްފަތި ދުވަހުގެ ރޭ ދަ ފްރޮންޓް އޮފީހުގައި ބޭއްވި ޖަލްސާގައެވެ.

ރައީސް ޔާމީން ވިދާޅުވީ، ރައީސުލްޖުމްހޫރިއްޔާ އަޒުލު ކުރެވޭނެ ގޮތުގެ އިޖުރާއަތްތަކާއި އޭގެ ތަފްސީލުތައް ގާނޫނުގައި ބަޔާންކުރާ ކަމަށެވެ. އަދި އެއީ ދުލުން ބުނެލަސް ފަސޭހަކަމެއް ނަމަވެސް، ފުރިހަމަ ކުރަން ޖެހޭ ކަންކަމަށް ބަލައި ފަސޭހަ މަސައްކަތެއް ނޫންކަމަށް އެމަނިކުފާނު ވިދާޅުވިއެވެ. އެގޮތުން ރައީސް އަޒުލު ކުރެވޭނެ ހާލަތްތަކެއް ގާނޫނުގައި ވަރަށް ސާފުކޮށް ކަނޑައަޅާފައިވާކަން އެމަނިކުފާނު ފާހަގަކުރެއްވިއެވެ.

ނަމަވެސް އެ އަޑުތައް ގަދަވެގެން ދިޔަނަމަވެސް އިޚްލާސްތެރި މަސައްކަތެއް ކުރައްވާ ރައީސަކަށް ސިހުމެއް ނާންނާނެ ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، ވެރިކަމަށް ބޭފުޅަކު ވަޑައިގަންނަވަނީ ރައްޔިތުންނަށް ހިދުމަތް ކޮށްދެއްވުމަށެވެ. އެ މަސައްކަތުގައި ވެރިކަމުގައި ހުންނަވާ ބޭފުޅަކު އުޅުއްވާއިރު، ބޭއިންސާފުން ރައީސް އަޒުލު ކޮށްފިނަމަ ރައްޔިތުންގެ ކުރިމަތީގައި މަގުބޫލުކަން އިތުރު ވެގެންދާނީ އެ ރައީސެއްގެ ކަމަށާއި އަނިޔާވެރިކޮށް ކަންކުރި ބައެއްގެ އަގުވެއްޓި އެބަޔަކު ރައްޔިތުންގެ ކުރިމަތީގައި އިތުރަށް ފަލީހަތް ވުން ނޫން ކަމެއް ނުވާނެ ކަމަށް ވެސް އެމަނިކުފާނު ވިދާޅުވިއެވެ.

ރައީސް އަޒުލު ކުރުމާ ގުޅޭގޮތުން ޔާމީން ސުވާލު އުފައްދަވާފައިވާއިރު، ރައްޔިތުންގެ މަޖިލީހުގެ ގަވާއިދުގައި ރައީސުލްޖުމްހޫރިއްޔާ އަޒުލު ކުރުމުގެ މަރުހަލާތައް ބަޔާން ކުރާ މާއްދާތައް ބަދަލު ކުރި މައްސަލަ ދައުލަތުން ވަނީ ސުޕްރީމް ކޯޓަށް ހުށަހެޅުމުން އެ މައްސައިގައި ބުރާސްފަތި ދުވަހު ސުޕްރީމް ކޯޓުން ވަނީ ބަދަލު ކުރި ގަވާއިދަށް އަމަލު ކުރުން މަޑުޖައްސައިލަން އަންގައި ވަގުތީ އަމުރެއް ނެރެފައެވެ.