

އާސަންދަ ކުންފުނީގެ ކޭސް ޕްރޮސެސިން ޑިޕާޓްމެންޓާއި ސުޕަވައިޒަރުންގެ ރޯލު އުވާލުމަށް ނިންމާފައިވާތީ، އެ ކަމާ ކަންބޮޑުވުން ފާޅުކޮށް އެ ކުންފުނީގެ މުވައްޒަފުން ޕެޓިޝަނެއް ރައީސް ޑރ. މުޙައްމަދު މުއިއްޒަށް ހުށަހަޅައިފިއެވެ.
އެ ކުންފުނީގެ ފަންސާހަކަށް މުވައްޒަފުން ސޮއިކޮށް ހުށަހަޅާފައި އެ ޕެޓިޝަންގެ ކޮޕީ "ތޭރައޮންލައިން" އަށް ލިބިފައިވާ އިރު، އެ ޕެޓިޝަން ހުށަހެޅީ އާސަންދަ ކުންފުނީގެ މެނޭޖްމަންޓުން ކޭސް ޕްރޮސެސިންގ ޑިޕާޓްމަންޓް އުވާލައި ސުޕަވައިޒަރުންގެ މަޤާމުތައް އުވާލުމަށް ނިންމުމާ ގުޅިގެން މުވައްޒަފުންގެ މެދުގައި އުފެދިފައިވާ ބޮޑެތި ކަންބޮޑުވުންތައް ފާޅުކޮށް އެކަން ހައްލު ކުރުމަށް ކަމަށް ބުނެފައިވެ އެވެ.
އެ ޕެޓިޝަނުގައިވަނީ ކަސްޓަމާ ސާވިސް ޑިޕާޓްމެންޓުގައި، މުވައްޒަފުންގެ ދަތިކަމާއެކު ހެވީ ލޯޑުގައި މަސައްކަތްކުރި ނަމަވެސް، މެނޭޖިން ޑިރެކްޓަރު ޒީނިޔާވަނީ ސިސްޓަމެޓިކް މައްސަލަތަކަށް ހައްލު ހޯދުމުގެ ބަދަލުގައި އެ ޑިޕާޓްމެންޓު ކުށްވެރިކޮށް، ބަދަލުތައް ގެންނަންޖެހޭ ކަމަށް ބުނެފައެވެ.
އެ މުވައްޒަފުންގެ ބުނެފައިވަނީ ކުންފުނީގައި ދިގުދެމިގެންދާ ގޮންޖެހުންތަކަކީ މެނޭޖްމަންޓުގެ ނާގާބިލްކަމާއި، ގޯސް ނިންމުންތަކުގެ ސީދާ ނަތީޖާއެއް ކަމުން، ކަސްޓަމާ ސާވިސް ޑިޕާޓްމަންޓަށް ދުވަހުން ދުވަހަށް ދިމާވާ އުނދަގޫތަކާ ކުރިމަތިލާން ޖެހެނީ އެކަށީގެންވާ ސަޕޯޓެއް ނުވަތަ ޒަމާނީ ހައްލުތަކެއް ނެތި ކަމަށެވެ.
މިކަންކަން ބިނާކުރަނިވި ގޮތެއްގައި ހައްލުކުރުމުގެ ބަދަލުގައި، ބަދަލުތަކެއް ގެންނަން ޖެހޭކަން ނިސްބަތްކޮށްފައިވަނީ ޑިޕާޓްމަންޓުން ކޭޕީއައި ފުރިހަމަ ނުކުރުމުން ކަމަށް އެ ޕެޓިޝަނުގައިވެއެވެ.
މައިގަނޑު ކަންބޮޑުވުންތަކުގެ ގޮތުގައި އެ ޕެޓިޝަންގައި ފާހަގަކުރި މައްސަލަތަކަކީ އާސަންދަ ކުންފުނި ހިންގުމުގެ ދޯދިޔާކަމާއި ބަލިކަށި މެނޭޖްމަންޓެއް އޮތުމާއި ކްރިޓިކަލް އޮޕަރޭޝަންތަގައި ބައިވެރިވުން ކުޑަކަމެވެ.
އޭގެ ހުރިހާ ބުރައެއް އުފުލަން ޖެހެނީ ކަސްޓަމާ ސާވިސް ޑިޕާޓްމަންޓަށެވެ. އެ ދަތިތަކުގެ މައްޗަށް އެކަށީގެންވާ އަދަދަށް މުވައްޒަފުން ނެތުމާއި އައުޓްޑޭޓު ވެފައިވާ ޕްރޮސެސްތަކާ އެކު އެ ޑިޕާޓްމަންޓުން މަސައްކަތް ކުރަނީ، ޕެޓިޝަންގައި ބުނެފައިވާ ގޮތުގައި އެކަށީގެންނުވާ މިންވަރަށެވެ.
ކުންފުނީގެ މެނޭޖްމަންޓާއި އެމްޑީ ޒީނިޔާއަށް ވަރަށް ބޮޑަށް ފާޑުކިޔައި އެ ޕެޓިޝަންގައި ބުނެފައިވަނީ މައްސަލަތަކަށް އެކަށީގެންވާ ހައްލެއް ނުހޯދައި، މުޅިން ވެސް ނިންމަނީ ދެކޮޅުނުޖެހޭ ނިންމުންތައް ކަމަށެވެ. އަދި އަލަށް ގެންނަން ނިންމާފައިވާ ބަދަލަކީ ވެސް، ޕެޓިޝަންގައި ބުނެފައިވާ ގޮތުގައި އެ ޑިޕާޓްމަންޓުން "ކީ ޕާފޯމެންސް އިންޑިކޭޓާސް" (ކޭޕީއައި)ގައި ބަޔާންކުރާ ކަންކަން ފުރިހަމަ ނުކުރާތީ ކަމަށް ބުނެ ގެންނަން ނިންމި ބަދަލެކެވެ.
އެހެން ނަމަވެސް އެކަން ދޮގުކޮށް، މުވައްޒަފުން ބުނީ އެކަށީގެންނުވާ މަދު އަދަދެއްގެ މުވައްޒަފުންނާއި އިތުރު ދަތިތަކާ އެކު ވެސް ކޭޕީއައިގައި ބަޔާންކޮށްފައިވާ ކަންކަން ހާސިލުކުރާ ކަމަށެވެ.
މުވައްޒަފުންގެ ހައްގުތައް ރައްކާތެރިކުރުމަށާއި، ކުންފުނީގެ އިންޓެގްރިޓީ ދެމެހެއްޓުމަށާއި، އަދި ސަރުކާރުން ހާމަކަން ބޮޑު ގޮތެއްގައި، ހަމަހަމަކަމާއެކު، އަދި ފެންވަރު ރަނގަޅު ހިދުމަތްތަކެއް ރައްޔިތުންނަށް ފޯރުކޮށްދިނުމަށް ވެފައިވާ ވަޢުދުތައް ފުއްދުމަށް ބޭނުންވާ ފިޔަވަޅުތައް އަޅުއްވާނެ ކަމަށް އަޅުގަނޑުމެން އުންމީދުކުރަމެވެ.
ޕެޓިޝަންގައި ސޮއިކޮށްފައިވާ މުވައްޒަފުން ބުނެފައިވަނީ އެ ފަރާތްތަކުން އެދެނީ މިކަމަށް އަވަސް އިޖާބައެއް ދީ، މި މައްސަލަތައް އަވަހަށް ހައްލުކޮށްދިނުން ކަމުގައެވެ.