ކުރިއަށް އޮތް މަޖިލިސް އިންތިހާބުގައި މާމިގިލީ ދާއިރާއަށް ނުކުތުމަށް ނިންމީ އެ ދާއިރާ ގާސިމް އިބްރާހިމުގެ ނުފޫޒުން މިންޖުކުރަން ކަމަށް ރައީސް އަބްދުﷲ ޔާމީން އުފައްދަވާ ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް)އިން އެ ދާއިރާއަށް ނުކުތުމުގެ ޝައުގުވެރިކަން ފާޅުކޮށްފައިވާ މުހައްމަދު މަހްމޫދު ވިދާޅުވެއްޖެއެވެ.
މަޖިލިސް އިންތިހާބުގައި ޕީއެންއެފް ތަމްސީލުކުރާނެ ކެންޑިޑޭޓުން ތައާރަފްކުރުމަށް ބާއްވާ ސިލްސިލާ ޖަލްސާތަކުގެ ތެރެއިން ބުރާސްފަތި ދުވަހގެ ރޭ ދަ ފްރޮންޓް އޮފީހުގައި ބޭއްވި ޖަލްސާގައި ވާހަކަ ދައްކަމުން މަހްމޫދު ބުނީ މާމިގިލި ދާއިރާއަކީ ވަކި މީހެއްގެ ތަރިކަ މުދަލަށް ހަދައިގެން އުޅޭ އުޅުމަށް ނިމުމެއް ގެންނަން ޖެހޭ ކަމަށާ ރައްޔިތުންވެސް ފައިސާގެ އަވައިގައި ނުޖެހި ދާއިރާގެ ތަރައްގީއާ ކުރިއެރުމަށް ވިސްނަން ޖެހޭ ކަމަށެވެ.
ރައީސް މައުމޫނުގެ ދައުރުވެސް ފެނުނު. ރައީސް ނަޝީދުގެ ދައުރުވެސް ފެނުނު. ދެން މިހާރު ރައީސް މުއިއްޒު. ފެންނަމުން ދަނީ މަހުޖަނުގެ އުނގަށް ވެއްޓެމުންދާ މަންޒަރު. ނަމަވެސް އެ އަވައިގައި ނުޖެހި މާމިގިލީ ދާއިރާ ބާކީ ނުކޮށް މަސައްކަތްކޮށްދެއްވީ ރައީސް ޔާމީން އެކަނި. އެހެންވެ މި ފިކުރުގައި ނުކުމެ މިހުރީ.
މަހްމޫދު
މަހްމޫދު މިފަދައިން ވިދާޅުވެފައިވާއިރު، ޖޭޕީ ލީޑަރު ގާސިމް އިބްރާހިމު މާމިގިލީ ދާއިރާގެ ގޮނޑި މެދުނުކެނޑި ފުރއްވާތާ ވަނީ ދިގު މުއްދަތެއް ވެފައެވެ. އަޑު ފެތުރިފައި އޮންނަ ގޮތުން ގާސިމް އަބަދުވެސް ގޮނޑި ކާމިޔާބު ކުރައްވަނީ ވޯޓު ގަނެގެންނެވެ.
