ތިން ބައި-އިލެކްޝަނެއްގެ ވޯޓުލުން ކުރިއަށް ދާކަމަށް އިލެކްޝަން ކޮމިޝަނުން ހާމަކޮށްފިއެވެ.

ބައި އިލެކްޝަންތައް ކުރިއަށް ދާ ދާއިރާތަކަކީ ފ. އަތޮޅު ކައުންސިލް ރައީސްގެ ގޮނޑި އާއި ވ. ފެލިދޫ ކައުންސިލް ރައީސްގެ ގޮނޑިއާއި އަދި ރ. ރަސްގެތީމުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ގޮނޑިއަށް މެމްބަރުން އިންތިހާބު ކުރުމަށެވެ.

އިލެކްޝަންސް ކޮމިޝަނުން ވިދާޅުވީ، މި މިހާރު ކުރިއަށްދާ ބައި-އިލެކްޝަންތަކުގެ ވޯޓު ފޮށިތައް މާލޭގެ އިތުރުން 8 ރަށެއްގައި ކުރިއަށްދާއިރު، 11 ވޯޓު ފޮއްޓެއް ބެހެއްޓިފައިވާނެ ކަމަށެވެ.

އިލެކްޝަންސް ކޮމިޝަންގެ ނައިބް ރައީސް އިސްމާއީލް ހަބީބު ވަނީ ވޯޓު ދިނުމުގެ ހައްގު ލިބިފައިވާ އެންމެން އެހައްގު އަދާ ކުރުމަށް އެދިވަޑައިގެންފައެވެ.

މި ބައި-އިލެކްޝަންތަކުގެ ވޯޓުލުން ކުރިއަށްދާނީ މިއަދު ހެނދުނު 8:00 އިން ފެށިގެން ހަވީރު 4:00 އާހަމައަށެވެ.