މަޖިލިސް ރައީސް އަބްދުއްރަހީމު އަބްދުﷲ (އަދުރޭ) މެލޭޝިއާއަށް ކުރައްވަމުން ގެންދެވި ދަތުރުފުޅު ކުރުކޮށްލެވުމަށް ފަހު މާލެ ވަޑައިގަންނަވަން ހަމަޖެހިއްޖެއެވެ.

"ތޭރަ އޮންލައިން"އަށް މުއުތަބަރުކޮށް މައުލޫމާތު ލިބިފައިވާ ގޮތުގައި އަދުރޭ މިވަގުތު ހުންނެވީ މާލެ ވަޑައިގަތުމުގެ ދަތުރުގެ މަތީގައެވެ. އަދުރޭ ކުއްލި ގޮތަކަށް ދަތުރު ކުރު ކުރައްވައި މާލެ އެނބުރިވަޑައިގަންނަވަނީ ދަރިފުޅު އިބްރާހިމު ފައިސަލް ކުއްލި ގޮތަކަށް ސަބަބުވެސް ބަޔާންކޮށްދިނުމެއް ނެތި ވަޒީރުކަމުގެ މަގާމުން މިއަދުގެ ވަގުތެއްގައި ވަކިކޮށްފައިވަނިކޮށެވެ.

މައުލޫމާތު ލިބިފައިވާ ގޮތުގައި އަދުރޭ ރާއްޖެ ވަޑައިގަތުމަށް ހަމަޖެހިފައިވަނީ މިރޭ ރާއްޖެ ގަޑިން 10:00 ގައެވެ.

ފައިސަލް ވަކިކުރުމުން ރާއްޖޭގެ އޮންލައިން ނޫހަކަށް ދެއްވި އިންޓަރވިއުގައި އަދުރޭ ވަނީ ވެރިކަން ފެށުނުއިރު ރައީސް ޑރ. މުއިއްޒުއާ އެކު އޮތް ގާތްގުޅުމާއި އިތުބާރު މިހާރު ނެތް ކަމަށް ވިދާޅުވެފައެވެ.

އަދުރޭއާ ގާތްގުޅުން އޮންނަ ނުވަތަ ގާތް ގުޅުން ބާއްވާ ސަރުކާރުގެ އިސް ފަރާތްތަކާ އަދި މަޖިލިސް މެމްބަރުންނަށްވެސް ރައީސް މުއިއްޒުގެ ފަޅިން ގެންދަނީ ފާރަލާ ބަލަމުން ކަމަށާ ސަރުކާރު ތެރެ މިހާރު ވަނީ ރަގަޅަށްވެސް ދެ ފަޅިވެފައި ކަމަށް ސަރުކާރުގެ އޮފިޝަލަކު ކުރިން ވަނީ ވިދާޅުވެފައެވެ.

ރައީސް މުއިއްޒުއާ އަދުރޭއާ ދެމެދު ގުޅުން ހީނަރުވެފައިވާ ކަމުގެ އަޑުތައް ވަނީ ގަދަވެފައެވެ. އެގޮތުން މީގެ ކުރިން ރައީސްގެ ދަތުރުފުޅުތަކުގައި އަދުރޭ ބައިވެރިކުރަމުން އައި އައުންވެސް ވަނީ މަޑު ޖައްސާލާފައިކަން ފާހަގަކޮށްލެވެއެވެ.

ރައީސް މުއިއްޒުގެ އަމުރަށް އަދުރޭ އަތުން ޕީއެންސީ ހިންގުމުގެ ބާރުވެސް ނަގާފައިވާ ކަމަށްވެސް އަޑުތައް ގަދަވެފައިވެއެވެ.

ނަމަވެސް މީގެ ކުރިން ރައީސް މުއިއްޒު ވިދާޅުވެފައި ވަނީ އަބްދުއްރަހީމްއަކީ އެމަނިކުފާނު އެންމެ ފަހުރުވެރިވާ ސިޔާސީ ޝަހުސިއްޔަތު ކަމަށެވެ.

މައުލޫމާތު ލިބިފައިވާ ގޮތުގައި ރައީސް މުއިއްޒު އަދުރޭ އެކަހެރިކުރަމުން ގެންދަނީ 2028 ގައި ރައީސް ކަމަށް ކުރިމަތި ލާފާނެ ކަމަށް ބިރުން ރައީސް މުއިއްޒަށް ކުރިމަތި ވެގެން އުޅޭ ހާލަތެއްގައި ކަމަށެވެ.