އެންޓި ޑިފެކްޝަން ގާނޫނެއްގެ މުހިއްމުކަން މިހާރު އެމްޑީޕިއަށް ވިސްނިފައިވާކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ، ޕަލްސް ނެޝަނަލް ފްރަންޓު (ޕީއެންއެފް)ގެ ޓިކެޓުގައި ކުރިއަށް އޮތް މަޖިލިސް އިންތިހާބަށް ނުކުންނަ ކެންޑިޑޭޓުން ތައާރަފު ކުރުމަށް ބުރާސްފަތި ދުވަހުގެ ރޭ ދަ ފްރޮންޓް އޮފީހުގައި ބޭއްވި ޖަލްސާގައެވެ.

ކެންޑިޑޭޓަކަށް އަމާޒުކުރެއްވި ސުވާލެއްގެ ތެރެއިން ރައީސް ޔާމީން ވަނީ ރައްޔިތުންގެ މަޖިލީހަށް ރައްޔިތުން މެމްބަރުން ހޮވުމުން އެ ރައްޔިތުންގެ ވޯޓުގައި ކޮޅުފައިން ޖަހާ ޕާޓީ ބަދަލުކުރުމަކީ އެމަނިކުފާނަށް ގަބޫލުކުރެއްވޭ އުސޫލެއް ނޫންކަމަށް ވިދާޅުވެފައެވެ.

އެހެންކަމުން އެމަނިކުފާނުގެ ރިޔާސީ ދައުރުގައި އެކަން ހުއްޓުވުމަށް ގާނޫނެއް ހެދިކަމަށާ ނަމަވެސް އޭރު ފާޑުކިޔުންތައް އަމާޒުވެގެން ދިޔަކަން ފާހަގަކުރައްވާ ރައީސް ޔާމީން ވިދާޅުވި ނަމަވެސް އެކަމާ ދެކޮޅަށް އޭރު އެންމެ ބޮޑަށް ވަކާލާތުކުރި ޕާޓީއަށް މިހާރު އެއީ މުހިއްމުކަމެއް ކަމަށް ވިސްނި އަލުން ގާނޫނު ވުޖޫދުކުރަން މަސައްކަތްކުރަމުން ދާ ކަމަށެވެ.

ރައީސް ޔާމީން ވަނީ، އި މާމިގިލީ ދާއިރާއަށް ޕީއެންއެފް ޓިކެޓުގައި ވާދަކުރައްވަން ޝައުގުވެރިކަން ފާޅުކޮށްފައިވާ މުހައްމަދު މަހޫމުދު އެކަމުގައި ދެކޭ ގޮތާ މެދު ސުވާލުކުރައްވާފައެވެ. މަހްމޫދުގެ ޖަވާބަކަށްވީ އޭނާގެ ނަޒަރުގައި އެއީ އޮތުން މުހިއްމު ގާނޫނެއް ކަމަށާ މަޖިލީހަށް ހޮވިއްޖެނަމަ އެ ބިލަށް މަސައްކަތްކޮށްދޭނެ ކަމަށެވެ.

މަޖިލީހަށް އިންތިހާބުވާ ޕާޓީން ވަކިވެއްޖެ ނަމަ ނުވަތަ ވަކިކޮށްފިނަމަ މަޖިލީހުގެ މެމްބަރުކަމުން ވަކިވާނެ ކަމަށް 2017ވަނަ އަހަރު ސްޕްރީމް ކޯޓުން ކަނޑައެޅިއިރު، އެންޓި ޑިފެކްޝަން ގާނޫނެއް ހަދަން ވެސް މަޖިލީހަށް ލާޒިމް ކުރި އެވެ.

އެ ގާނޫނު މަޖިލީހުން ފާސްކޮށް އޭރުގެ ރައީސް ރައީސް އަބްދުﷲ ޔާމީން ތަސްދީގު ކުރެއްވިއެވެ.

ނަމަވެސް އުފެދުނު ހިޔާލު ތަފާތުވުންތަކަށް ފަހު، އެ ގާނުނޫ އުވާލަން މަޖިލީހުގެ އަގުލަބިއްޔަތުން ފާސްކުރީ 1 ނޮވެމްބަރު 2018ގައެވެ.