ޕީޕަލްސް ނެޝަނަލް ކޮންގްރެސްގެ ޗެއަރޕާސަންގެ މަގާމުގައި ހުންނެވި އަބްދުއްރަހީމަށް ޚާއްސަކޮށް އެ ޕާޓީގެ އޮފީހުގައި ގާއިމުކޮށްފައި ހުރި ކެބިންގެ ތަޅު ބަދަލުކޮށް އޭނާއަށް އެ ކެބިން ބޭނުން ނުކުރެވޭ ގޮތް ހަދާފައިވާ ކަމުގެ މައުލޫމާތު ލިބިއްޖެއެވެ.

އިތުބާރު ހުރި މަސްދަރަކުން "ތޭރަ އޮންލައިން"އަށް މައުލޫމާތު ދީފައިވަ ގޮތުގައި މ. ސީޓްރެކް ބިލްޑިންގައި ހުންނަ ޕީއެންސީ އޮފީހުގައި މީގެ ކުރިން އަދުރޭއަށް ޚާއްސަކޮށް ކޮޓަރިއެއް ގާއިމުކޮށްފައި ހުރި ނަމަވެސް ދާދި ފަހުން ރައީސް މުހައްމަދު މުއިއްޒުގެ އެންގެވެމުށް އެ ކޮޓަރީގެ ތަޅު ބަދަލުކޮށް އަދުރޭއަށް އެ ކޮޓަރިއަށް އެކްސެސް ނުވެވޭ ގޮތް ވަނީ ހަދާފައެވެ.

ވެރިކަންކުރާ ޕީއެންސީގެ ހިންގުމުގެ މަސައްކަތުން ޗެއާޕާސަން އަދުރޭ އެކަހެރިކޮށް، އޭނާގެ މަޝްވަރާ ހޯދުން ރައީސް ޑރ. މުހައްމަދު މުއިއްޒު ހުއްޓާލައްވާކަމުގެ އަޑުތަކެއްވެސް މީގެ ކުރިން ގަދަވެގެން ދިޔައެވެ. އެވާހަކަ ތިލަވީ އަދުރޭގެ ދަރި ފައިސަލް ޓުރިޒަމް މިނިސްޓަރުކަމުން ވަިކުރުމާ ގުޅިގެންނެވެ.

ފައިސަލް ވަކިކުރި މައްސަލައިގައި އަދުރޭ ވަނީ ދެ ރައީސުންގެ ގުޅުން ރަގަޅު ނޫންކަން ދޭހަވާފަދަ މޭރުމަކުން ވާހަކަ ދައްކަވާފައެވެ. އެގޮތުން އެގުޅުން ރަގަޅު ނަމަ ފައިސަލް ކުރި ކުރުމުގައި ވެސް މަޝްވަރާއެއް ރައީސް މުއިއްޒު ކުރައްވާނެކަމަށް އަދުރޭ ހާމަކޮށްފައިވެއެވެ.

ޕީއެންސީގެ އޮފީހުގައި ހުރި އަދުރޭގެ ކެބިންގެ ތަޅު ބަދަލުކޮށް ޕާޓީއިން މުޅިން އެއް ފަރާތްކޮށްފައިވާއިރު އަދުރޭއާ ގާތް ގުޅުން އޮންނަ ގިނަ ބަޔަކު ސަރުކާރު މަގާމުތަކުން ވެސް ދަނީ ވަކިކުރަމުންކަން ފާހަގަކޮށްލެވެއެވެ.