

ނ. މިލަދޫގައި ހުންނަ އެ ކުންފުނީގެ ބްރާންޗުގައި މަސައްކަތްކުރި 3 މުވައްޒަފަކު ސަސްޕެންޑްކޮށްފި އެވެ.
އެ ފިޔަވަޅު އެޅީ މިދިޔަ ހޮނިހިރު ދުވަހު ބޭއްވި މިލަދޫގެ އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ ބައި އިލެކްޝަނުގައި ވެރިކަންކުރާ ޕީއެންސީގެ މައްޗަށް އިދިކޮޅު އެމްޑީޕީގެ ކެންޑިޑޭޓު އެ ރަށުން ކުރި ހޯދާފައި ވަނިކޮށެވެ.
މިލަދޫ ފެނަކަ ބްރާންޗުގެ އޮފިޝަލަކު ވިދާޅުވީ، އެ މައްސަލައަކީ ފެނަކަ ހެޑް އޮފީހުން ތަހުގީގުކުރަމުންދާ މައްސަލައެއްކަމުން އެ ކަމާ ބެހޭ ގޮތުން އެއްޗެއް ވިދާޅުވާން ނޭނގޭ ކަމަށެވެ.
އެ މުވައްޒަފުންނަށް ފެނަކައިން ފޮނުވި ސިޓީގައި ވަނީ، އެ މީހުންނާ ގުޅުން ހުރި މައްސަލައެއް ތަހުގީގު ކުރަމުން ދާތީ، އެ ތަހުގީގައި އިތުރަށް ބަލަން ޖެހޭ ކަންކަން ހުރުމުން މިއަދުން ފެށިގެން 14 ދުވަހަށް ސަސްޕެންޑު ކޮށްފައިވާ ކަމަށެވެ. އެ މީހުން ސަސްޕެންޑުކުރީ މުސާރަ ލިބޭ ގޮތަށެވެ. އަދި ބަލަމުންދާ މައްސަލައާ ގުޅިގެން ކުންފުނިން މައުލޫމާތެއް ހޯދަން އެދިއްޖެ ނަމަ އެއްބާރުލުން ދިނުމަށް ވެސް ފެނަކައިގެ ސިޓީގައި އެދިފައި ވެ އެވެ.
އެކަމަކު، އެއީ ކޮން މައްސަލަތަކެއް ކަމެއް އަދި ހާމައެއް ނުކުރެ އެވެ.
އިދިކޮޅު އެންމެ ބޮޑު ޕާޓީ އެމްޑީޕީން ވަނީ ހޮނިހިރު ދުވަހު ބޭއްވި ބައި-އިލެކްޝަނުގެ ނަތީޖާއާ ގުޅިގެން، މިލަދޫގެ ފެނަކަ ކޯޕަރޭޝަން ބްރާންޗުގައި މަސައްކަތްކުރާ އެ ޕާޓީއަށް ނިސްބަތްވާ މުވައްޒަފުންނާ ދެކޮޅަށް ފިޔަވަޅު އަޅައިފައިވާ ކަމަށް ތުހުމަތުކޮށްފައެވެ. އަދި، ތަހުގީގެއް ފަށާފައިވާ ކަމަށް ބުނެ، އެ ތަހުގީގުގައި އިތުރަށް ބަލަން ޖެހޭ ކަންކަން ހުރުމުން 14 ދުވަހަށް އެ މުވައްޒަފުން ސަސްޕެންޑުކޮށްފައިވާ ކަމަށް އެމްޑީޕީން ވަނީ ތުހުމަތުކޮށްފަ އެވެ.
އެ ބައި-އިލެކްޝަން އެމްޑީޕީގެ ކެންޑިޑޭޓް ކާމިޔާބުކުރީ ސަރުކާރުން އެ އިންތިޚާބަށް ނުފޫޒު ފޯރުވަމުން ދަނިކޮށް ކަމަށް ވެސް އެ ޕާޓީން ވަނީ ތުހުމަތުކޮށްފަ އެވެ.
އެމްޑީޕީން ވަނީ ވަޒީފާގެ ބިރު ދެއްކުމާއި އިދިކޮޅު ހިޔާލުތަކުގެ އަޑު ކަނޑުވާލުމަށް ދައުލަތުގެ އިދާރާތަކާއި ކުންފުނިތަކުން މަސައްކަތް ކުރާ ކަމަށް ތުހުމަތުކޮށް، އެކަން ހުއްޓާލުމަށް ވެސް ގޮވާލައިފަ އެވެ.