މަނާކޮށްފައިނުވާ ކޮންމެކަމެއް ކުރުމުގެ ހައްގު ރައްޔިތުންނަށް ލިބިގެންވާ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސެއިން ވިދާޅުވެއްޖެ އެވެ.

އަލީ މިހެން ވިދާޅުވީ ގާނޫނާއި ގަވާއިދުތަކުން ލާޒިމް ކޮށްފައިވާ ސަރަހައްދުތައް ފިޔަވައި އެހެން ތަންތަނުގައި ހެލްމެޓް އަޅައިގެން އުޅޭ މީހުން ހުއްޓުވާނެ ކަމަށް ފުލުހުން ރޭ ބުނުމާއި ގުޅިގެން ކުރެއްވި ޓްވީޓެއްގައި އެވެ.

ފުލުހުން ނެރެފައިވާ ބަޔާނެއްގައި ބުނެފައިވަނީ މިގޮތަށް ނިންމާފައިވަނީ ކުށްކުށަށް އަރައިގަތުމުގެ ނިޔަތުގައި ހެލްމެޓު އަޅައިގެން އުޅޭކަމަށް އެ ހިދުމަތަށް ފާހަގަކުރެވިފައިވާތީ ކަމަށެވެ.

އެ ފިޔަވަޅު އަޅަން ބުނިގޮތުގައި، ހެލްމެޓް އެޅުން ގާނޫނުތަކުން ލާޒިމް ނޫން ސަރަހައްދުތަކުގައި، ކާކުކަން "ވަންހަނާކޮށް" ކުށްތަކަށް އަރައިގަތުމުގެ ނިޔަތުގައި ހެލްމެޓް އަޅައިގެން ބައެއް މީހުން އުޅޭ ކަން މިހާރަކަށް އައިސް ވަނީ ފުލުހުންގެ ސަމާލުކަމަށް އައިސްފައިވާ ކަމަށްވެސް ފުލުހުން ހާމަކޮށްފައިވެ އެވެ.

ކުށް ކުރުން ފުލުހުންނަށް ނުހުއްޓުވުމަކީ އެހެން ބައެއްގެ ސަލާމަތާއި ރައްކާތެރިކަމަށް ކުރާ ކަމެއް މަނާ ކުރެވޭނެ ސަބަބެއް ނޫން ކަމަށް ބުނެ ގިނަ ބަޔަކު ގެންދަނީ ފުލުހުންގެ ނިންމުމަށް ފާޑުކިޔަމުންނެވެ. ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް އަމާން ވެއްޓެއް ގާއިމު ކުރުމުގެ ގޮތުން ވެސް ހެލްމެޓު އެޅުން މަނައެއް ނުކުރެވޭނެ އެވެ.

ހެލްމެޓު އެޅުން މަޖުބޫރު ނޫން މަގުތަކުގައި ހެލްމެޓު އެޅުމަކީ ގާނޫނުއަސާސީން ދިވެހި ކޮންމެ ރައްޔިތަކަށްމެ ކަށަވަރުކޮށްދޭ ހައްގެކެވެ.