Raees Muizzuge Kibain Edheny Kurin Dhekkevi Vaahakathakah Rujooave Rayyithunnah Heyoverikameh Kohdhinun: Raees Yameen

ރައީސް މުހައްމަދު މުއިއްޒުގެ ކިބައިން އެމަނިކުފާނު އެދިވަޑައިގަންނަވަނީ އިންތިޚާބުގެ ކުރިން ދެއްކެވި ވާހަކަތަކަށް ރުޖޫއަވެވަޑައިގެން ރައްޔިތުންނަށް ހެޔޮވެރިކަމެއް ކޮށްދެއްވުން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އާދިއްތަ ދުވަހުގެރޭ ޕީއެންއެފް އޮފީހުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، އެމްޑީޕީއަށް 2023ގެ ރިޔާސީ އިންތިޚާބު ކާމިޔާބުނުވިކަމަށް ޓަކައި އުފާކުރައްވާ ކަމަށާ އަދި ޕީޕީއެމް/ޕީއެންސީގެ މުޑުވަކުން ނުކުތް ބޭފުޅަކަށް ވެރިކަން ލިބުމުން ވެސް އުފާކުރައްވާ ކަމަށެވެ. ނަމަވެސް ގައުމުގެ ކަންކަން މިހާރު ހިނގަމުންދާ އުސޫލުގެ ސަބަބުން ނުހަނު އުނދަގޫފުޅުވާ ކަމަށާ ނުހަނު ދެރަފުޅުވާކަމަށް ވެސް ރައީސް ޔާމީން ވިދާޅުވިއެވެ.

އަދިވެސް އަޅުގަނޑު އުފާކުރަން އެމްޑީޕީއަށް ވެރިކަން ނުދިޔައީމާ، އަދިވެސް އަޅުގަނޑު އުފާކުރަން އިބްރާހިމް މުޙައްމަދު ޞާލިޙަށް ވެރިކަން ނުދިޔައީމާ.. އެއީކީ ބަލައިގަންނަން ފަސޭހަ ނަމޫނާއެއް ނޫން. މްޑީޕީގެ ވެރިކަމަކީ އެއްވެސް ދާއިރާއަކުން ބަލައިގަންނަން ފަސޭހަ ވެރިކަމެއް ނޫން. ރާއްޖެ ހަލާކުކުރި ބައެއް އެއީ އިނގޭތޯ. އަޅުގަނޑު އުފާވޭ އަޅުގަނޑުމެންގެ މުޑުވަކުން ނުކުތް މީހަކަށް ވެރިކަން ލިބުނީތީ. އަޅުގަނޑު އެދެނީ އޭނާގެ މަސައްކަތް ތަރުތީބުކުރައްވައި، އަލުން އެ ދެއްކެވި ވާހަކައަށް އިޔާދަވާން. ރުޖޫއަވާން ދެއްކި ވާހަކައަށް. ރުޖޫއަވެފައި ރައްޔިތުންނަށް ކަންތައްތަކެއް ކޮށްދެވޭތޯ ބައްލަވާ އިނގޭތޯ. އަޅުގަނޑެއް ތާއީދެއް ނުކުރާނަން އެމްޑީޕީގެ ވެރިކަމަކަށް

- ރައީސް ޔާމީން

ރައީސް ޔާމީން ވިދާޅުވީ، ސިޔާސީ މީހުން އަމަލުކުރާ ގޮތުން ރައްޔިތުން ވަރަށް ބޮޑަށް ސިޔާސީ ކަންކަން މަތިން ފޫހިވެފައިވާ ކަމަށެވެ. އެހެންކަމުން ރައީސް މުއިއްޒުގެ ބަސްފުޅު އަމިއްލަފުޅު އަނގަޔަށް ވަދެ މިހާރު ނިމެނީ ކަމަށްވެސް ރައީސް ޔާމީން ވިދާޅުވިއެވެ.