ރޯދަ މަހު އިންތިހާބުތައް ނުބޭއްވޭ ގޮތަށް އެމްޑީޕީން އިންތިހާބުތަކާ ބެހޭ ގާނޫނަށް އިސްލާހު ހުށަހެޅި ބިލު މިއަދު މަޖިލީހުން ފާސްކޮށްފިއެވެ.

ތަށް ނިންމާފައިވަނީ މި ބިލަށް މަޖިލީހު އާދިއްތަ ދުވަހުގެ ޖަލްސާގައި ނެގި ވޯޓުގައި ބައިވެރިވި 49 މެމްބަރުންގެ ތެރެއިން 46 މެމްބަރުންގެ ވޯޓުންނެެެވެ. އެ ބިލު ފާސްކުރަން ނުފެންނަ ކަމަށް ވޯޓުދިނީ ތިން މެމްބަރުންނެވެ. ބިލު ފާސްކުރަން ބޭނުންވަނީ 25 މެމްބަރުންގެ ވޯޓެވެ.

އިހަވަންދޫ ދާއިރާގެ އެމްޑީޕީގެ މެމްބަރު މުހައްމަދު ޝިފާއު ހުށަހެޅުއްވި އިސްލާހު ފާސްކުރަން ސަރުކާރުގެ ގިނަ މެމްބަރުން ވޯޓު ނުދެއްވައެވެ.

އެ އިސްލާހު ބަލައިގަތުމަށް ވެސް ސަރުކާރުގެ މެންބަރުން ވޯޓު ނުދެއްވައެވެ.

ފާސްކުރި ބިލުގައިވާ ގޮތުގައި، ރޯދަ މަހުގައި އެއްވެސް އިންތިހާބެއް ނުބޭއްވޭނެއެވެ. އިންތިހާބެއް ބާއްވަން ޖެހޭ މުއްދަތު ރޯދަ މަހާ ދިމާވާނަމަ، އެ އިންތިހާބެއް ބޭއްވޭނީ ރޯދަ މަސް ނިމޭތާ 10 ދުވަސް ފަހުން ކަމަށް ވެސް ބަޔާންކޮށްފައިވެ އެވެ.

މީގެ އިތުރުން ވޯޓު ކަރުދާހުގައި ކެންޑިޑޭޓެއްގެ ނަމާ ދިމާލުގައި ރަނގަޅު ފާހަގައެއްގެ ގޮތުގައި ބެލެވޭ ނިޝާނެއް ހިމަނާފައިވާނަމަ އެއީ ސައްހަ ވޯޓެއް ކަމުގައި ބަލައިގަންނަން ޖެހޭނެ ކަމަށްވެސް ބުނެފައިވެއެވެ.

މަޖިލީހުން މިގޮތަށް ފާސްކުރުމުން ދެން މަޖިލީސް އިންތިހާބު ބޭއްވޭނީ ރޯދަ މަސް ނިމޭތާ 10 ދުވަސް ފަހުންނެވެ.

އީސީ އިން ކުރިން ބުނެފައި ވަނީ ތާރީހު ބަދަލުކުރަން ޖެހިއްޖެނަމަ އެކަމަށް ވެސް ތައްޔާރަށް ތިބި ކަމަށެވެ. ނަމަވެސް މިހާރު ހުރިހާ އިންތިޒާމެއް ރާވާފައި އޮތުމާއެކު މަޖިލީސް އިންތިހާބު ރޯދައިގެ ފަހުން ބާއްވަން ގޮންޖެހުންތަކެއް ހުރިކަން ވެސް ފާހަގަކޮށްފައިވެއެވެ.

އިންތިހާބު ފަސްކުރި ނަމަވެސް ކެންޑީޑޭންސީ ހުށަހެޅުމުގެ ފުރުސަތު އިތުރުނުކުރާނެ ކަމަށް ވެސް އީސީއިން ވަނީ ހާމަކޮށްފައެވެ.