ރައީސް އަބްދުﷲ ޔާމީންގެ އިސްތިއުނާފުގައި ތަޅުއަޅުވާ ރައީސް އިބްރާހިމް މުހައްމަދު ސޯލިހު ބޭނުންވިގޮތަށް، އެންމެ ފަހުގެ ރިޔާސީ އިންތިޚާބުން އެއްފަރާތްކުރީ ޖުޑިޝަރީ ތެރެއިން ކަމަށާއި މިއަދު ހަމަ ނިދީގައަށް ޖުޑިޝަރީއަށް ނިދޭތޯ އައްސަވާ ރައީސް ޔާމީންގެ އިސް ގާނޫނީ ވަކީލު އަދި ރާއްޖޭގެ ކުރީގެ ނަިއބު ރައީސް ޑރ މުހައްމަދު ޖަމީލު އަހުމަދުގެ ވަރުގަދަ ސުވާލެއް އުއްތަމަ ފަނޑިޔާރު އަލއުްސްތާޛު މުއުއތަސިމް އަދުނާނަށް އަމާޒުކުރައްވައިފިއެވެ.

ޑރ ޖަމީލުގެ ސުވާލެއް އެއްތަމަ ފަނޑިޔާރަށް އަމާޒުކުރެއްވީ ކުރީގެ ފިރިމިހާ މަރާލި އަންހެނަކަށް ހުކުމް ކުރުމުގެ ކުރިން ބޭއްވި ނޫސްވެރިންގެ ބައްދަލުވުމެއްގައި އުއްތަމަ ފަނޑިޔާރު ދެއްކެވި ވާހަކަފުޅަކަށް ރައްދު ދެއްވާއެވެ.

އެގޮތުން އުއްތަމަ ފަނޑިޔާރު އެ ނޫސްވެރިންގެ ބައްދަލުވުމުގައި ވިދާޅުވީ، މައްސަލަތައް ވަގުތުން ވަގުތަށް ނިންމާއިރު ދެވެނީ އިންސާފުތޯ ބަލައި، އެއްވެސް ގޮތަކަށް ޖަޒުބާތުގައި ޖެހިގެން ނުވާނެ ކަމަށެވެ. އަދި އިހުސާންތެރިކަމާ އެކު ނަމަވެސް ޖަޒުބާތުގައި ނުޖެހި ހުކުމް ކުރުމަކީ ވެސް މުހިއްމުކަމެއް ކަމަށް އުއްތަމަ ފަނޑޮޔާރު ވިދާޅުވެފައިވެއެވެ.

އުއްތަމަ ފަނޑިޔާރުގެ މި ވާހަކަތަކަށް ރައްދު ދެއްވާ ޑރ ޖަމީލު ކުރެއްވި ޕޯސްޓެއްގައި ވިދާޅުވީ، އުއްތަމަ ފަނޑިޔާރު މުއުތަސިމްގެ މިވާހަކަފުޅުގެ ތެދު ނިޔަތާމެދު ޝައްކެެއް ނެތް ކަމަށެވެ.

ނަމަވެސް އެއީ އާންމު ގޮތެއްގައި މުޅި މުޖްތަމައުގެ މަސްލަހަތަށް ވުރެ ފަރުދެއްގެ މަސްލަހަތު އޮތް ކަމަކަށްވާތީ، ޖުޑިޝަރީއިން ހިތްވަރު ހުރި ބަސް ވިދާޅުވަނީކަމަށް ވިދާޅުވެ ޑރ ޖަމީލު ވަނީ ފެންނަން އޮތް ހަގީގަތަކީ ޕަބްލިކް އިންޓްރެސްޓް ބޮޑު، ސިޔާސީ ފަރާތްތަކުގެ މައްޗަށް ހިންގޭ ނޭއްގާނީ އެއްވެސްކަމެއް ޖުޑިޝަރީ ތެރެއިން ނުހުއްޓުވުނުކަމަށް ވެސް ވިދާޅުވެފައެވެ.

ރައީސް ޔާމީނުގެ އިސްތިއުނާފުގައި ޖުޑިޝަރީ ތެރޭ ތަޅުއަޅުވައި އެމައްޗަށް ބިނާކޮށް ސުޕްރީމް ކޯޓުން މުޅި ރައްޔިތުން ވޯޓުދޭން ހުރި ފަރާތެއްގެ ކެންޑިޑޭސީ ބާތިލްކުރިކަން ފާހަގަކުރައްވާ ޑރ ޖަމީލު ވަނީ ރައީސް އިބްރާހިމް މުހައްމަދު ސޯލިހު ބޭނުންވި ގޮތަށް 5 އަހަރު ވަންދެން ރައީސް ޔާމީނު ޝޯ ޓްރައިލެއްގެ ތެރޭގައި ގެންގުޅުމުގެ ފުރުސަތު ފަހިވެ، އިންތިޚާބުން އެއްފަރާތްވީ ޖުޑިޝަރީ ތެރެއިން ނޫންތޯ އައްސަވާ ސުވާލެއް ކުރައްވާފައެވެ.

އަދުގެ ހަގީގަތަށް ނަޒަރު ހިންގަވާލައްވާ ޑރ ޖަމީލު ވިދާޅުވީ މިއަދު ރައީސް ޔާމީނުގެ ހުކުމްވެސް ބާތިލު ކަމަށާ ނަމަވެސް މުޅި ރައްޔިތުންނަށް ލިބުނު ގެއްލުމާމެދު ސުޕްރީމް ކޯޓަށް ހަމަ ނިދި ލިބޭތޯ ސުވާލު އުފެދޭ ކަމަށެވެ. އަދި އިއާދަ ނުކުރެވޭނެ ގެއްލުމެއް ލިބިއްޖެކަމަށް ފެއާނަސްގެ އުޞޫލުން މިއަދު ނުބެލެވޭނެތޯ އައްސަވާ ޑރ. ޖަމީލް ވަނީ ސުވާލެއް އަމާޒުކުރައްވާފައެވެ.

އެމަނިކުފާނު ވިދާޅުވީ މިއަދު ހިތާމަޔާއެކު ފާހަގަކުރަން ޖެހެނީ ޖުޑިޝަރީ ވަނީ ބޮޑެތި ކަންތައްތައް މެދުވެެރިވާ ފަހަރު "ސާޓަންޓީއެއް" ނެތް ތަނަކަށް ވެފައިކަމަށް ވެސް ޑރ ޖަމީލު ވަނީ ވިދާޅުވެފައެވެ. އަދި ޝަލް އެޕޮއިންޓްމެންޓާ އަދި ޕްރޮސެސް އޮތް ގޮތުން ޖުޑިޝަރީ ތެރޭ ވެސް އޮތީ ގައުމުގައި ވެސް އޮތް މައިގަޑު ދެ ފިކުރު ކަމަށް ޑރ. ޖަމީލް ވިދާޅުވިއެވެ.

އެ ހަގީގަތް މިއަދު ގަބޫލް ކުރަންޖެހޭ ކަމަށް ވެސް ޕޯސްޓު ނިންމަވާ ަލއްވަމުން ޑރ ޖަމީލު ވަނީ ލިޔުއްވާފައެވެ.