ހޯމްލޭންޑް ސެކިއުރިޓީ މިނިސްޓަރު އަލީ އިހްސާންގެ އިތުބާރު ނެތް ކަމުގެ މައްސަލައިގައި ރައްޔިތުންގެ މަޖިލީހަށް ޖަވާބުދާރީވުމަށް އެއް ގަޑިއިރުގެ ފުރުސަތު ދިނުމަށް މަޖިލީހުގެ އާންމު ކޮމިޓީން އިއްޔެ ފާސްކޮށްފި އެވެ.
އެމްޑީޕީގެ 12 މެންބަރުންގެ ސޮޔާ އެކު ހުށަހެޅި އިހުސާންގެ އިތުބާރު ނެތްކަމުގެ މައްސަލައިގައި ބުނީ އޭނާ މަގާމާ ހަވާލުވެވަޑައިގެންނެވިތާ އެއް އަހަރާއި ދެ މަސް ދުވަހުގެ ތެރޭގައި މިނިސްޓަރަކު ކޮށްގެން ނުވާނެ އެތައް ކަމެއް ގާނޫނު އަސާސީއާ ހިލާފަށް ކުރައްވާފައިވާ ކަމަށެވެ. އޭގެ މައިގަނޑު ކަމަކަށް ފާހަގަކޮށްފައި އޮތީ ޑީއެންއާރު ޑޭޓާތައް ބޭނުންކޮށްގެން ޕީއެންސީ އަށް މީހުން ވެއްދުމުގެ ތުހުމަތެވެ.
އަދި ފުލުހުންގެ ތަހުގީގުތަކަށް އިހްސާން އިސްވެ ހުންނަވައިގެން ސިޔާސީ ނުފޫޒު ފޯރުވާ ކަމަށް ތުހުމަތުކޮށްފައިވެ އެވެ.
އިތުބާރު ނެތް ކަމުގެ މައްސަލަތަކުގައި ޖުމްލަ ވަގުތަކީ ދެ ގަޑިއިރެވެ. ނަމަވެސް ކޮމިޓީން އިއްޔެ ނިންމީ އޭގެ ތެރެއިން އެއް ގަޑިއިރު އިހުސާން ޖަވާބުދާރީވުމަށް އަދި ބާކީ ގަޑިއިރު މެންބަރުންގެ ސުވާލާއި ބަހުސަށް ޖާގަ ދިނުމަށެވެ.
އެ ހުށަހެޅުމަށް ތާއީދު ކުރެއްވީ އަލިފުށި ދާއިރާގެ ޕީއެންސީ މެންބަރު އަބްދުލްލަތީފް އަބްދުއްރަހްމާން އެވެ. ހުށަހެޅުން ފާސްވީ 10 މެންބަރުންގެ ތެރެއިން ނުވަ މެންބަރުންގެ ތާއީދާއެކު އެވެ. ދެކޮޅަށް ވޯޓު ދެއްވީ ކޮމިޓީގައި އެމްޑީޕީ ތަމްސީލު ކުރައްވާ ކަނޑިތީމް ދާއިރާގެ މެންބަރު އަމީން ފައިސަލް އެވެ.
