މިނިވަން މުއައްސަސާތަކުގެ ވެރިންގެ މުސާރަ ކުޑަކުރަން ފޮނުވި ނަމަވެސް ގާނޫނު ބަދަލުކޮށްގެން ނޫން ގޮތަކަށް އެކަން މި ވަގުތު ކުރެވެން ނެތްކަން ރައީސް ޑރ. މުހައްމަދު މުއިއްޒަށް ލަފާ ދޭން މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފި އެވެ.
ދައުލަތުގެ ހަރަދުތައް ކުޑަކުރުމަށް ރައްޔިތުންގެ މަޖިލީހާއި ޝަރުއީ ދާއިރާ އާއި މިނިވަން މުއައްސަސާތަކުގެ ވެރިންގެ މުސާރަތައް ކުޑަކުރަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ރައްޔިތުންގެ މަޖިލީހަށް ހުށަހަޅުއްވާފަ އެވެ.
މާލިއްޔަތު ކޮމިޓީގެ ބައްދަލުވުމުގައި ފުނަދޫ ދާއިރާގެ މެންބަރު މުހައްމަދު މަމްދޫހު ވަނީ މި ވަގުތު ބަދަލުތައް ގެންނަން ނުފެންނަ ކަމަށް ރައީސަށް ލަފާ ދިނުމަށް ހުށަހަޅުއްވާފަ އެވެ. އަދި ގާނޫނުތަކަށް ގެންނަން ޖެހޭ ބަދަލުތައް ގެނައުމަށް ފަހު އެ ހުށަހެޅުން ހުށަހެޅުމަށް ލަފާ ދިނުމަށް އޭނާ ހުށަހެޅުއްވި އެވެ.
މި ހުށަހެޅުން ފާސްވީ ކޮމިޓީ ބައްދަލުވުމުގައި ބައިވެރިވި މެންބަރުންގެ އިއްތިފާގުންނެވެ. މިރިޕޯޓު ފާސްވުމާއެކު ރިޕޯޓް ވަނީ މަޖިލީހުގެ ތަޅުމަށް ގޮތެއް ނިންމުމަށް ފޮނުވާފައެވެ.
ރާއްޖޭގެ މާލީ ހާލަތު ގޯސްވެ، ބޭރުގެ މާލީ އިދާރާތަކުން ވެސް އަންނަނީ ޚަރަދުތައް ކުޑަކުރަން ތަކުރާރުކޮށް ނަސޭހަތްތެރިވަމުންނެވެ. އެހެން އެކަން އޮއްވައި ވެސް ޚަރަދުތައް ކުޑަވާތަން ނުފެންނަކަމުގެ ކަންބޮޑުވުން ވަނީ ބޮޑުވެފަ އެވެ.
