ކޮންމެ ގައުމެއްގެ ވެސް ޝަރުއީ ދާއިރާއަކީ ރައްޔިތުންގެ ގިނަ ހައްގުތަކަކާ ގުޅިފައި ހުންނަ ބޮޑެތި ކަންކަން ނިންމަން ޖެހޭ އެއް ދާއިރާއެވެ. އެގޮތުން އެ ދާއިރާއިން ނިންމާ ނިންމުމަކުން މީހެއްގެ މުޅި ހަޔާތަށްވެސް ބަދަލުތަކެއް އައުމަކީ އެކަށީގެންވާ ކަމެކެވެ. އެހެންކަމުން ފަނޑިޔާރު ގެތަކަކީ ނުހަނު އިންސާފުވެރި ނުފޫޒުން އެއްކިބާވެފައި ތިބި ފަނޑިޔާރުންތަކެއް ތިބެންވާނެ، ޖެހޭނެ ތަނެކެވެ.

ކީރިތި ޤުރުއާންގައި ބަޔާންކޮށް އަންގަވާފައި ގޮތުގައި ވެސް ހުކުމް ކުރަންވާނީ ހައްގަށެވެ. އެގޮތުން ކީރިތި ޤުރުއާނުގެ ނިސާ ސޫރަތުގެ 58 ވަނަ އާޔަތުގައި ވަހީ ބަސްފުޅު އިއްވަފައިވަނީ ވެސް މިފަދައިންނެވެ.

އެހެންކަމުން ފަނޑިޔާރުން ވާންވާނީ ރައްޔިތުންގެ ހައްގުތައް ކަށަވަރުކޮށްދިނުމާ އެކު އިންސާފުވެރިކަމާ އަދްލުވެރިކަމާއެކު ހުކުމް ކުރާ ބަޔަކަށެވެ. އެގޮތުން ދާދި ފަހުން ސުޕްރީމު ކޯޓުން އިއްވި ހުކުމެއް ކުރިން އުއްތަމަ ފަނޑިޔާރުވެސް މިކަމަށް ވަރަށް ބޮޑަށް އިޝާރާތްކުރައްވާ ވާހަކަފުޅު ދައްކަވާފައިވެއެވެ.

އެދުވަހު އުއްތަމަ ފަނޑިޔާރު ވިދާޅުވީ، އިހުސާންތެރިކަމާ އެކު ނަމަވެސް ޖަޒުބާތުގައި ނުޖެހި ހުކުމް ކުރުމަކީ މުހިއްމު ކަމެއް ކަމަށާ އެޮގުތުން ވަގުތުން ވަގުތަށް މައްސަލަތއް ނިންމާއިރު އޭގެ ތެރެއަށް ވަދެ އެ ދެވެނީ އިންސާފުތޯ ބަލަން ޖެހޭ ކަމަށާ އިހުސާންތެރިކަމާ އެއްކޮށް ވިސްނި ކަމުގައި ވިޔަސް ޖަޒުބާތުގައި ޖެހިގެން ހުކުމްކޮށްގެން ނުވާނެ ކަމަށްވެސް އުއްތަމަ ފަނޑިޔާރު އޭރު ވިދާޅުވިއެވެ.

މިހާ ހިސާބުން ހިތަށް އައީ މީގެ އެއް އަހަރާ މަސްތަކެއް ކުރިއެވެ. 2023 ވަނަ އަހަރުގެ އޮގަސްޓު މަހުގެ 6 ވަނަ ދުވަހުއެވެ. ދިވެހިރާއްޖޭގެ ސުޕްރީމު ކޯޓުގައި ހިނގަމުން ދިޔައީ ރައީސް އަބްދުﷲ ޔާމީންގެ ރިޔާސީ ކެންޑިޑެންސީއާ ގުޅޭ މައްސަލައިގައި ހުކުމް ކުރުމުގެ އަޑު އެހުމެވެ. ކެތްތެރިކަމާ އެކު އެ ހުކުމު އިއްވާނެ ގޮތަކާ މެދު ރާއްޖޭގެ ބޮޑު އާބާދީއެއް ޓީވީތައް ކައިރީ ތިބިއިރު އެއް ބަޔަކު ސުޕްރީމު ކޯޓު ކައިރީ ގައިވެސް ތިއްބެވެ. އެހެނީ ރައީސް ޔާމީނަކީ އެތައް ބަޔަކު ރިޔާސީ ކެންޑިޑޭޓުގެ ގޮތުގައި ޚިޔާރުކޮށްފައިވާ ބޭފުޅަކަށް ވުމުންނެވެ.

އެދުވަހު ހުކުމާ އެކު އެތައް ބައެއްގެ ލޯ ކަރުނުން ފާއްދާލީއެވެ. އެތައް ރައްޔިތުންނެއްގެ އުއްމީދު ފެނަށް ދިޔައެވެ. އެއް ބަޔަކު ކަކުލު ހުޅުން ވާގި ދޫވިއިރު އަނެއް ބަޔަކު ތިބީ ރާއްޖޭގެ ޝަރުއީ ނިޒާމާ މެދު އަޖާއިބު އަންތަރީސް ވެގެންނެވެ. އެހެނީ ނިހާއި ހުކުމެއް ނައިސް އޮތް މައްސަލައެއްގައި ސުޕްރީމު ކޯޓުގެ ފަނޑިޔާރުން އެ ދުވަހު ހުކުމް ކުރެއްވި ގޮތުންނެވެ. ހަމަ ޔަގީނުންވެސް އެ ދުވަހު ސުޕްރީމު ކޯޓު، ރާއްޖޭގެ އެންމެ މަތީ ކޯޓުން ހުކުމް ކުރީ އިހްސާންތެރިކަމާ އެކު އިންސާފުން، ޖަޒުބާތުގައި ނުޖެހިއޭ ބުނަން ދައްޗެވެ. ކުރިން ނިހާއީ ހުކުމަކީ އޮންނަ އެއްޗަަކަށް ވެފައި ފަހުން ރައީސް ޔާމީންގެ މައްސަލައާ ހަމައަށް އައިއިރު އެއީ ގާނޫނު ދަންނަ އެއްޗަކަށް ނުވިއެވެ. އިސްތިއުނާފީ މަރުހަލާ ނުނިމި އޮތް މައްސަލައެއް ޕާކުކުރުވާފައި އޭރުގެ ސަރުކާރުން ވޭނުންވާ ގޮތަށް ހުކުމް ކުރި ބެންޗުގައި އުއްތަމަ ފަނޑިޔާރުވެސް އިންނެވިއެވެ. އެދުވަހު ހުކުމް އިއްވިއިރު އެއި އެތައް ރައްޔިތުންގެ ހައްގަކާ ގުޅިފައިވާކަމެއްކަން ޚުދު އުއްތަމަ ފަނޑިޔާރު ހަނދާން ނެތުނީބާއެވެ. އަދި މިހާރު ރިޓަޔަމަންޓު ކައިރިވުމުން ނުހައްގުން ކުރެވުނު ހުކުމްތައް މަތިން ހަނދާންވެ ބިރުފުޅު ހީވެގެން އެހެން ފަނޑިޔާރުންނަށް ވަސިއްޔަތް ކުރައްވަނީ ބާއެވެ.

ކޮންމެ އަކަސް އެތައް ރައްޔިތެއް ހައްގު ގެއްލުވާލާ ރައީސް ޔާމީންގެ ކެންޑިޑޭންސީ ބާތިލުކުރެވުމަށް ހަމަ ނިދީގައި މިއޮއް ހުރިހާ ދުވަސް ހޭދަކުރި ގޮތަކާ މެދު ރައްޔިތުން ސުވާލު އުފައްދައެވެ. އަދި މިއަދު ކުއްލިއަކަށް ހަރާން ހުކުމްތައް ކޮށްފައި ހަމަ ނިދި ނުނިދޭނެ ކަމަށް އުއްތަމަ ފަނޑިޔާރު ވިދާޅުވާއިރު ރައީސް ޔާމީންގެ ކެންޑިޑޭންސީއާ މެދު އަމަލުކުރި ކުރުމަށް ފަހު އުއްތަމަ ފަނޑިޔާރު ހަމަނިދިން މަހްރުމު ނުވޭތޯ ވެސް ސުވާލު އުފެދެއެވެ. އެހެނީ އޭގެ ފަހުން ހައިކޯޓުން އެ ވަނީ ރައީސް ޔާމީނަށް އޭރު ކޮށްފައި އޮތް މައްސަލަ ބަލާފައި އޮތްގޮތް ގޯސްކަމަށް ކަނޑައަޅާ އަލުން މައްސަލަ ދަށު ކޯޓަށް ތަހްވީލުކޮށްފައިވުމުންނެވެ.

އެހެންކަމުން ފަނޑިޔާރު މަނިކުފާނު ތިޔަ ވިދާޅުވާ އިހުސާންތެރިކަން ވަކި މައްސަލަތަކެއް ނިންމުމުގައި ނުފެންނަނީ ކީއްވެތޯ މިއީ މިއަދު އުފައްދަން ޖެހޭ ސުވާލެކެވެ. އެދުވަހު ތިޔަ ފަނޑިޔާރު މަނިއްޕުޅުވެސް އިންނެވި ބެންޗުން ކުރި ހުކުމުން ގެއްލިގެން ދިޔައީ އެތައް ބައެއްގެ އިންސާފެވެ، ގައުމެއްގެ ހަޔާތުން، އެ ހުކުމާ ގުޅިގެން ވީ ބޮޑު ގެއްލުމެކެވެ.