ރާއްޖޭގެ އިގްތިސާދަށް އާ ދޮރެއް ހުޅުވަން، މި ސަރުކާރުން ފޮނު އަރުވާފައި އިހަވައްދިއްޕޮޅުގައި ބައިނަލްއަގުވާމީ އޮފްޝޯ ބަންކަރިން ހިދުމަތް ފެށިފަހުން 5 މަސް ފާއިތުވެގެން ހިގައްޖެ އެވެ. ސަރަހައްދީ ތަރައްގީއަށް ވީ ކަމެއް އިގްތިސާދަށް ވީ ފައިދާ އެއް ބުނެ އެއް ނުދެވުނެވެ.

އިހަވަންދިއްޕޮޅަކީ ދުނިޔޭގެ މުހިންމު ޝިޕިން ރޫޓްތަކާ ގުޅިފައިވާ، މެރިޓައިމް ހިދުމަތްތައް ތަރައްގީކުރުމަށް އެކަށޭނަ ސަރަހައްދެއް ކަމަށް ބުނެ މި ސަރަހައްދުގައި ބައިނަލްއަގުވާމީ ބަންކަރިން ހިދުމަތް ފެށުމަކީ ރާއްޖޭގެ އިގްތިސާދަށް ލިބޭނެ ބޮޑު ކުރިއެރުމެއް ކަމަށް ރައީސް ޑރ، މުއިއްޒުގެ ސަރުކާރުން ގަބޫލުކުރި އެވެ.

ތެދެކެވެ. ރާާއްޖެ އޮތް ސަރަހައްދަކީ މުހިންމު ސަރަހަދެއް ކަމަށާއި މި ސަރަހައްދުން ދުވާލަކު 300އެއްހާ އާގު ބޯޓު ހުރަސްކުރާކަން ނުދަންނަ ކުޑަކުއްޖަކު ވެސް ރާއްޖޭގައި އަދި ހާއްސަކޮށް ތިލަދުންމަތީގައި މިއަދު ނޫޅެއެވެ. ސަރުކާރަށް ނުވި ކަމަކީ އެ ސަރަހައްދުން ދަތުރުކުރާ ބޯޓަކަށް ތެޔޮ އެޅުމުގެ ޑީލެއް ކަޑު ނުކުރެވުމެވެ. އެ ސަރައްހަދުން ދަތުރުކުރާ ބޯޑު ފަހަރުގެ ވެރިންނާއި ގުޅުން ގާއިމު ނުކުރެވުމެވެ.

ރައީސް މުއިއްޒުގެ ސަރުކާރުގެ އަމާޒަކީ މި ހިދުމަތުން ގާތްގަނޑަކަށް 400 މިލިއަން ޑޮލަރުގެ އާމްދަނީއެއް ހޯދުން ކަމަށް އިކޮނޮމިކް މިނިސްޓަރ މުހައްމަދު ސައީދުވަނީ ވިދާޅުވެފަ އެވެ. އެހެން ނަމަވެސް ވިޓޯލް އާއި އެސްޓީއޯ އާ ދެމެދު ސޮއިކުރެވުނު އެއްބަސްވުމާބެހޭ އެއްވެސް މައުލޫމާތެއް ސަރުކާރުން ހާމަކޮށްފައިނުވާއިރު، އެ ވަރުގެ ފައިދާ އެއް ރާއްޖެއަށް ލިބޭ ގޮތަކާމެދު ތަޖުރިބާކާރުން ކުރިންވެސް ދިޔައީ ސުވާލު އުފައްދަމުން ނެވެ.

އަދި ހުދު މިނިސްޓަރު ސައީދު ވެސް މިހާރު ވިދާޅުވަނީ ބައިނަލްއަގުވާމީ ބަންކަރިން ހިދުމަތުން ދައުލަތަށް ލިބުނު އާމްދަނީ ސާފު ނުވާ ކަމަށެވެ. މިފަހުން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިން ވަނީ ބަންކަރިންގެ ހިދުމަތާ ގުޅޭ ސުވާލުތައް އިކޮނޮމިކް މިނިސްޓަރ ސައީދަށް އަމާޒުކޮށްފަ އެވެ.

ޖަވާބުގައި ވިދާޅުވީ ބަންކަރިންގެ ހިދުމަތް ފެށި ފަހުން ފަސް މަސް ވެފައިވާއިރު، މިހާތަނަށް ދެ ސިޕްމަންޓުގެ ޓްރާންސެކްޝަނެއް ހިންގާފައިވާ ކަމަށާއި ތިން ވަނަ ޝިޕްމަންޓެއްގެ މަސައްކަތް ކުރަމުންދާ ކަމަށް ސައީދު ވިދާޅުވި އެވެ.

ނަމަވެސް، އެ ސިޕްމަންޓުތަކުން ލިބުނު އާމްދަނީގެ ތަފުސީލުތަކާ ގުޅޭގޮތުން ސުވާލުކުރުމުން، ސައީދު ވަނީ އެންމެ ރަނގަޅުވާނީ އެ މައުލޫމާތު އެސްޓީއޯއިން ހޯދުމުން ކަމަށް ވިދާޅުވެ ޖަވާބުން ރެކިގެންފަ އެވެ.

ބަންކަރިން ފެށިގެން މިހާތަނަށް އައި އިރު އެ މަސައްކަތް ރަނގަޅަށް ނުދާތީ އެތައް ބައެއްގެ ފާޑުކިޔުން އަމާޒުވެފައިވާ އިރު އެކަމާއި މެދު ނޫސްވެރިން ކުރި ސުވާލުތަކަށް ސާފު ޖަވާބެއް ސައީދަށް ދެވޭ ގޮތެއް ނުވި އެވެ. ތަކުރާރުކޮށް ސުވާލުކޮށްގެން ވެސް އެކަމުން ރާއްޖެއަށް ފައިދާ ވާ ގޮތެއް ސައީދަށް ފާހަގަކޮށްދެއްވޭ ވަރެއް ނުވި އެވެ. ވާނީ ވެސް އެހެންތާ އެވެ. އިހައްވައްދިފޮޅު ރައްޔިތުންނަށް ވެސް އޮޅުވާލެއްވީ ހިންޏަށް ހަކުރު އޮޅުވާލާ ފަދައިން ނެވެ. ތެދެއް ހެދެން އޮތް ތަނުގައި ވެސް ދޮގެއް އުފަން ކުރާ ބަޔަކަށް ރާއްޖޭގެ އިގްތިސާދަށް ބަންކަރިން ހިދުމަތުން ވެއްދޭނެ ފައިސާގެ އަދަދެއް ނުބުނެ ދެވޭނެ އެވެ.

ނަމަވެސް ސަރުކާރަށް އެއް އަހަރުވުމާ ގުޅުވައި މިދިޔަ އަހަރުގެ ނޮވެމްބަރު 13ގައި ބޭއްވި ޕްރޮގްރާމެއްގައި ސައީދު ވަނީ ބަންކަރިން ހިދުމަތުން އޭރު 1.5 މިލިއަން ޑޮލަރުގެ އާމްދަނީއެއް ލިބިފައިވާ ކަަމަށް ވިދާޅުވެފަ އެވެ.

އަދި މީގެ ކުރިން ސައީދު ވަނީ، ރާއްޖޭގެ އުތުރުގައި 300އާއި 450އާ ދެމެދުގެ އަދަދަކަށް ކޮމާޝަލް ބޯޓުފަހަރު ދަތުރު ކުރަމުންދާ ކަމަށާއި އެ ބޯޓުފަހަރުތަކުގެ އެއް ޕަސެންޓަށް ބަންކަރިންގެ ހިދުމަތް ދިނަސް، ހިދުމަތް ފަށާ ފުރަތަމަ އަހަރު ރާއްޖޭގެ ޖީޑީޕީއަށް 400 މިލިއަން ޑޮލަރު އިތުރުވާނެ ކަމަށް ވިދާޅުވެފަ އެވެ.

މިއަދު އެއްކަލަ 400 މިލިއަން ޑޮލަރުގެ ފައިދާގެ ވާހަކަ އެއް ސައީދު ނުދައްކަވަ އެވެ. ބަންކަރިން ހިދުމަތް "ފެއިލްވެ" ބޮޑު އަގުގައި ރާއްޖެ ގެނައި ދެ ބޯޓު ދަބަރަށް ވެ ސަރުކާރަށް ފާޑުކިޔުން އަމާޒުވާން ފެށުމުން ސައީދު މިހާރު ވިދާޅުވަނީ ބަންކަރިން އިން އެއްޗެއް ނުލިބުނަސް ހެޔޮކަމަށެވެ.

ވިދާޅުވީ 100 މިލިއަން ޑޮލަރު، 200 މިލިއަން ޑޮލަރު ކިޔަން މިހާރު ބޭނުން ނުވާ ކަމަށެވެ. އަދި މިހާރު ސަރުކާރަށް ހަރަދު ކަނޑާފަ 1000 ޑޮލަރު ލިބުނަސް އެންމެ ރަގަޅު ކަމަށެވެ.

ނަމަވެސް އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ކުރިން ބަންކަރިން ހިދުމަތުން އާމްދަނީގެ ގޮތުގައި ލިބޭނެ ކަމަށް ވިދާޅުވި 1000 ޑޮލަރުގެ ވާހަކަ ވެސް ދެއްކުމަށް ސައީދު ދެކޮޅު ހެއްދެވި އެވެ. ވިދާޅުވީ ބަންކަރިން އިން ލިބޭ ފައިސާގެ އަދަދު އިނގޭނީ އެކަން ކުރާ ބަޔަކަށް ކަމަށެވެ. އެއީ އެސްޓީއޯ ކަމަށާއި ބަންކަރިން އިން ލިބޭ އާމްދަނީގެ އަދަދުތައް އެސްޓީއޯ އިން އަހާ ހޯދުމަށެވެ.

ބަންކަރިންގެ ހިދުމަތް ރާއްޖޭގައި ދެނީ ސިންގަޕޫރާއި ޔޫއޭއީގެ އިތުރުން މޮރިޝަސްގައި ވެސް ބަންކަރިންގެ ހިދުމަތް ދެމުންދާ ވިޓޯލް އާއި އެސްޓީއޯ ގުޅިގެންނެވެ. އެގޮތުން ބަންކަރުތަކަށް ތެޔޮ ފޯރުކޮށްދިނުމާއި ބަންކަރިން ހަބު އިޝްތިހާރުކުރުމަކީ ވިޓޯލްއާ ހަވާލުކުރެވިފައިވާ މަސައްކަތެކެވެ.

ހއ. އަތޮޅުގައި ސަރުކާރުގެ އިދާރާތަކުގެ އޮފީސްތަކެއް އިމާރާތް ކޮށް މި ހިދުމަތް ދޭން ފެށީ އެ އަތޮޅުގައި އޮފް ޝޯ ބަންކަރިން ދިނުމުގެ އަމާޒުގައި އެވެ. ނަމަވެސް ބަންކަރިންގެ ހިދުމަތް ދިނުމަށް ގެނައި ދެ ބޯޓުގެވެސް އޭގެ މަހެއްހާ ދުވަސް ފަހުން މާލެ ސަރަހައްދަށް ވަނީ އައިސްފަ އެވެ.

ވޭތުވެދިޔަ ފަސް މަހެއްހާ ދުވަހު އެ ދެ ބޯޓު ތެޔޮ އެޅުމުގެ ހިދުމަތް ދެމުންދިޔައީ މާލެ ސަރަހައްދުގަ އެވެ. އަދި ކައިރި ބައެއް އަތޮޅުތަކަށްވެސް ދަތުރުކޮށްފައިވެ އެވެ. މި ހިދުމަތާއި އެކަމުން ލިބޭ އާމްދަނީއާ ގުޅޭ އެއްވެސް ތަފުސީލެއް އަދި ތަފާސްހިސާބެއްވެސް ސަރުކާރުން މިހާތަނަށް ހާމަކޮށްފައެއް ނުވެ އެވެ.

ބަންކަރިން ހިދުމަތް ފެށުމަކީ ރާއްޖޭގެ އިގްތިސާދު އިތުރަށް ފުޅާކޮށް، ވަޒީފާގެ އިތުރު ފުރުސަތުތައް އުފެއްދުމަށް އެޅޭ މުހިންމު ފިޔަވަޅެއް ކަމަށް ސައީދު ކުރިން ވިދާޅުވި ނަމަވެސް މި މަޝްރޫއުގެ ސަބަބުން ރާއްޖެއަށް އިތުރު އިންވެސްޓްމަންޓްތައް ލިބި، އިގުތިސާދީ ކުރިއެރުން ލިބިގެންދާނެ ކަމުގެ ޔަގީންކަން ދިނުމަށް ސައީދު މިހާރު ދެކޮޅު ހައްދަވާ ބަންކަރިންއޭ ބުނާ ތަނުން ދާހިއްލާ މިނިސްޓަރު ސައީދު އަށް ރުޅި އިސްކުރެވޭނަމަ ދެން އެ ވާންފެށި ގޮތަކީ ފޮނު އަރުވާފަ ފެށި އޮފްޝޯ ބަންކަރިން އިން މިނިސްޓަރު ސައީދުގެ "އޮފު" ކެނޑުމެވެ.

ރާއްޖެއަށް މަންފާވާނެ އެހެން ގޮތްތައް ހޯދުމަށް ރައީސުލްޖުމްހޫރިއްޔާގެ އިރުޝާދުގެ ދަށުން މަގާމުން ފެއަށް ޖެހުން ނޫން މޮޅު އިތުރު ގޮތެއް ހުދު މަނިކުފާނަށް ވެސް މިއަދު ނެތެވެ. ނޫންނަމަ އަބްދުއްރަހީމްގެ ދަރި ފައިސަލް އަށް ލިބުނު ފަދަ "ކުއްލި ސިޓީ" އެއް ލިބުން ދާތި ގާތެވެ.

އެއީ މިދިޔަ މަހު ދައުލަތަށް ލިބުނު އިމްޕޯޓު ޑިއުޓީ ދަށްވި ސަބަބެއް އެނގިވަޑައިނުގަންނަވާ ކަމަށް ހުދު މަނިކުފާނުގެ ދިވެހި ރައްޔިތުންނަށްވި އިއުތިރާފުން މިހާރު ވަނީ މިނިސްޓަރުކަމުގެ ޝަރުތު ވެސް ގެއްލިފަ އެވެ.

މިނިސްޓަރު ސައީދު އެވެ. އެ ކަކުންޏެއް ހަރުކޮށްނާނީ އެ ކަކުންޏެއްގެ ވަރުންނެވެ.