އަނެއްކާވެސް ރުމަތިން ޖެހެމުންދާ ވައިގެ ސަބަބުން އުތުރާއި މެދުރާއްޖެތެރޭގެ ވައި ނުރައްކާވާ މިންވަރަށް ނުސާފުވެފައިވާ ކަމަށް މޫސުމާ ބެހޭ ގައުމީ އިދާރާއިން ބުނެފިއެވެ.

އެ އިދާރާއިން ބުނީ އެ ސަރަހައްދުތަކުގައި ވައި ނުސާފުވެ، ހަމަ ލޮލަށް ފެންނަ ދުރުމިން ވަރަށް ބޮޑަށް ދަށްވެފައިވާ ކަމަށެވެ.

އިތުރަށް އެ އިދާރާއިން ބުނީ ސާފު ދުވަހެއްގައި 10 ކިލޯމީޓަށް ވުރެ ދުރު ފެންނަ ކަމަށެވެ.

ނަމަވެސް އެންމެ ވައި ނުސާފު ސަރަހައްދު ކަމަށްވާ ހުޅުލެއަށް ދުރު ފެންނަ މިންވަރު ވަނީ ތިން ކިލޯމީޓަރަށް ދަށްވެފައި ކަމަށް އެ އިދާރާއިން ބުނެފައިވެއެވެ. އަދި ހދ. ހަނިމާދޫން ދުރު ފެންނަ މިންވަރު ފަސް ކިލޯމީޓަރަށް ދަށްވެފައިވާއިރު ކައްދޫ ކާޑެއްދޫއަށް ދުރު ފެންނަނީ އަށް ކިލޯމީޓަރަށް ކަމަށް މެޓް އޮފީހުން ވަނީ ބުނެފައެވެ.

ވައި ނުސާފުވުމާ ގުޅިގެން މީގެ ކުރިން، އެތެރެހަށީގެ ޑރ. މުހައްމަދު އަލީ ކުރެއްވި ޓްވީޓެއްގައި ވަނީ، ވައި ނުސާފުވުމުން ކުރިމަތިވެދާނެ ސިއްހީ މައްސަލަތަކުން ސަލާމަތްވުމަށް ބޭރުގައި އުޅޭ ވަގުތު މަދުކުރުން މުހިންމު ކަމަށެވެ.

މީގެ އިތުރުން، ބޭރުގައި އުޅޭ ވަގުތު މާސްކު ބޭނުންކުރުމާއި، ކޮޓަރި ތަކުގައި އެއާ ޕިއުރިފަޔާ ބޭނުންކުރުމުގެ އިތުރުން އެންވާރަމަންޓް މިނިސްޓްރީގެ އިރުޝާދުތަކަށް ބޯލެނބުމަށް އޭނާ އިލްތިމާސްކުރެއްވިއެވެ.