Buni Bas : Supreme Court Bench Badhalukuraakah Sarukaarun Noolhey : Usham

"ބުނި ބަސް" ސެގްމެންޓްގައި މިއަދު މިބަލާލަނީ 11 ޑިސެމްބަރު 2024 ވަނަ ދުވަހު ބަންޑާރަ ނައިބު އަހުމަދު އުޝާމް ދެއްކެވި ވާހަކަފުޅަކަށެވެ.

އިދިކޮޅު އެމްޑީޕީން 10 ޑިސެމްބަރު 2024 ގައި ކާނިވާ ސަރަހައްދުގައި ބޭއްވި ޖަލްސާގައި ވާހަކަ ދައްކަވަމުން ކުރީގެ ރައީސް އިބްރާހީމް މުހައްމަދު ސޯލިހު ވިދާޅުވީ ގާނޫނު އަސާސީއަށް ގެނައި ބަދަލުތަކުން ރައްޔިތުންގެ މަޖިލީސް ސަރުކާރުގެ ބާރުގެ ތެރެއަށް ގޮސްފައިވާ ކަމަށާއި ދެން ސަރުކާރުގެ އަމާޒަކަށް ވާނީ ސުޕްރީމް ކޯޓް ކޮންޓްރޯލް ކުރުން ކަމަށެވެ.

ދެން އަޅުގަނޑުމެންނަށް ފެނިގެންދާނެ، މި ސަރުކާރުން ދެން އަޅާނެ ފިޔަވަޅަކީ ސުޕްރީމް ކޯޓުގެ ބެންޗު ބަދަލު ކުރުން. އެކަން ނުކޮށެއް ހުއްޓައެއް ނުލާނެ، ހަގީގަތުގައި މި ސަރުކާރުގެ ސިފަ ފެނިގެންދާނީ އޭރުން،

- ރައީސް ސޯލިހު

އެ ކަމާ ގުޅޭ ގޮތުން ނޫސްވެރިން ސުވާލުކުރުމުން އުޝާމް މިއަދު ވިދާޅުވީ އެއީ އެއްވެސް ކަހަލަ ހަގީގަތެއް އޮތް ވާހަކައެއް ނޫން ކަމަށެވެ. ސަރުކާރަށް އަހަރަކަށް ވުރެ ގިނަ ދުވަސްވެފައިވާ އިރު ވެރިކަންކުރާ ޕީއެންސީއަށް މަޖިލީހުގެ މެޖޯރިޓީ ލިބުނު ފަހުން މި ހިނގި ހަ މަހެއްހާ ދުވަހު ސަރުކާރުން އެކަން ނުކުރާ ކަން ވެސް އުޝާމް ފާހަގަ ކުރެއްވި އެވެ.

ސުޕްރީމް ކޯޓުގެ ބެންޗު ކުޑަކުރުމަށް ނޫނީ ބޮޑު ކުރުމަށް ގާނޫނަށް އެއްވެސް ބަދަލެއް ގެނައުމުގެ މަސައްކަތެއް ހިނގަމުންދޭތޯ ސުވާލުކުރުމުން އުޝާމް ވިދާޅުވީ އެއީ ވެސް ސަރުކާރުގެ ވިސްނުން އޮތް ކަމެއް ނޫން ކަމަށެވެ. އެފަދަ ބަދަލެއް ގެންނަން ސަރުކާރުގެ ލެޖިސްލެޓިވް އެޖެންޑާގައި ވެސް ނެތް ކަން އުޝާމް ފާހަގަ ކުރެއްވި އެވެ.

އަޅުގަނޑަށް ބެލެވެނީ އެ ބޭފުޅުން [އެމްޑީޕީގެ ލިޑާޝިޕުން] ވިދާޅުވަނީ އެ ސަރުކާރުގައި ކަން ކުރި ގޮތުގެ ވާހަކަ [ހެން]. އޭރު ސަރުކާރަށް އެއް އަހަރުވީ އިރު ސުޕްރީމް ކޯޓުގައި ތިއްބެވި ފަނޑިޔާރުންތަކަކަށް ފިޔަވަޅު އަޅަން ފެށި. އަޅަމުން ގޮސް މުޅި ބެންޗު ބަދަލުކުރެއްވި،

- އުޝާމް

ނަމަވެސް މިއަދު "ވަމުންދާގޮތް" ބައްލަވާށެވެ. ބަންޑާރަ ނައިބު އަހުމަދު އުޝާމް "ބުނި ބަސް" ދިމަލެއްނުވިއެވެ.!

މިއަދު ބަންޑާރަ ނައިބު އަހުމަދު އުޝާމް ހިއްސާއޮތް ރައީސް މުއިއްޒުގެ ސަރުކާރުން އެ ވަނީ ސުޕްރީމް ކޯޓުގެ ފަނޑިޔާރުންގެ ބެންޗު ފަހަކަށް މަދު ކުރަން ރައްޔިތުންގެ މަޖިލީހަށް ބިލެއް ހުށަހަޅައިފި އެވެ.

އެ ބިލް ހުށަހެޅުއްވީ ހޮޅުދޫ ދާއިރާގެ ޕީއެންސީގެ މެމްބަރުން އަބްދުއްސައްތާރު މުހައްމަދެވެ.

ސުޕްރީމް ކޯޓުގެ ފަނޑިޔާރުންގެ ބެންޗުގައި މިހާރު ތިއްބަވަނީ ހަތް ފަނޑިޔާރުންނެވެ. އޭގެ ތެރެއިން ދެ ފަނޑިޔާރުން މަދުކުރަން ޖެހޭ ގޮތަށް މަޖިލީހަށް ބިލް ހުށަހެޅުއްވި ސަބަބެއް ކަމަށް ސައްތާރު ވިދާޅުވީ، ދިވެހިންގެ "ފޮނި އުންމީދު" އެންމެ ބޮޑަށް ހާސިލް ވާނީ ސުޕްރީމް ކޯޓު ކުރިއެކޭ އެގޮތަށް ބަދަލު ކޮށްގެން ކަމަށް ފެނިވަޑައިގަންނަވާތީ ކަމަށެވެ.

ސައްތާރު ހުށަހެޅުއްވި ބިލްގައި ސުޕްރީމް ކޯޓުގެ ފަނޑިޔާރުން ވަކިކުރާނެ ގޮތާއި މުއްދަތު ވެސް ހިމަނާފައިވެ އެވެ. ފަނޑިޔާރުން ވަކިކުރުމުގެ މަރުހަލާ އަވަސް ކުރަން ވެސް އޭނާގެ ހުށަހެޅުއްވުމުގައި ވެ އެވެ.