ޖުޑީޝަރީއަށް ނުފޫޒު ފޯރުވުން ހުއްޓުނީ އޭ ބުނި ބުނުން ވެސް އުނބަށް! / ތޭރަގްރެފިކްސް
ރިޕޯޓު
ޖުޑީޝަރީއަށް ނުފޫޒު ފޯރުވުން ހުއްޓުނީ އޭ ބުނި ބުނުން ވެސް އުނބަށް!
Mariyam Isaadha
މަރިޔަމް އިސާދާ
24 ފެބްރުއަރީ 2025
މާލެ ސިޓީ

2023 ސެޕްޓެމްބަރު 17 ވީ ހުކުރު ދުވަހުގެ ހަވީރު ޖުމްހޫރީ މައިދާނުގައި ހުންނަވާ ރާއްޖޭގެ ރައީސުލްޖުމްހޫރިއްޔާގެ ހުވާ ކުރައްވާ މ ދިމްޔާތު މުހައްމަދު މުއިއްޒު ވިދާޅުވި އެއް ވާހަކައަކި އެ ވަގުތުން ފެށިގެން ރާއްޖޭގެ ޝަރުއީ ދާއިރާއަށް ސަރުކާރުން ފޯރުވަމުން އައު ނުފޫޒު ނިމުމަކަށް އައީ ކަމަށެވެ. މިކަމަށް އެތަނަށް ޖަމާވެ ތިބި ދިވެހި ރައްޔިތުންނާ ދުރާ ގާތުން އެމަންޒަރު ބަލާ އަޑު އެހި މީހަކު ވިއްޔާވެސް ހެކިވާނެއެވެ.

އޭގެ ފަހުން އެއް އަހަރާ ތިން މަސް ފަހުން އިވުނު އަޑަކީ ސުޕްރީމު ކޯޓުގެ ބެންޗުގެ އަދަދު މަދުކުރަން ސަރުކާރުން މަސައްކަތް ފެށި ވާހަކައެވެ. އެގޮތުން އެކަމަށް މަގު ކޮށުމަށް މިހަރު ވަނީ މަޖިލީހަށް ސަރުކާރުގެ ފަރާތުން ބިލެއް ހުށަހަޅުއްވާފައެވެ.

ސިޔާސީ ޕާޓީއަކުން މެންބަރަކު ވަކިކޮށްފި ނަމަ ރައްޔިތުންގެ މަޖިލީހުގެ ގޮނޑި ގެއްލޭ ގޮތަށް ފާސް ކުރި އިސްލާހުގެ މައްސަލަ ސުޕްރީމް ކޯޓުން ބަލަނިކޮށް އެ ކޯޓުގެ ދެ ފަނޑިޔާރުން ވަކިކޮށް ފަނޑިޔާރުންގެ އަދަދު ފަހަކަށް ބަދަލު ކުރަން، ސަރުކާރުން ބިލެއް ހުށަހެޅުމުން ހަގީގަތުގައި ގިނަ ސުވާލުތަކެއް ހިތުގައި އުފެދުނެވެ. މިކަމުގައި ވެސް ސަރުކަރުން ބުނަނީ ހެޔޮ ނިޔަތޭ ބާއެވެ؟

ދާއިރާގެ މައި ރަށުގައި ބޮޑު ގަތުލެއް ހިނގައިގެން ރައްޔިތުން އިންސާފަށް އެދި އާދޭސް ކުރަމުންދާތާ 5 މަސްވީއިރު ވެސް ރައްޔިތުންގެ ހައްގުގައި ބަހެއް ބުނެލަން ނުކެރުނު މެމްބަރަކު މެދުވެރިކޮށް ސަރުކާރުން ފަނޑިޔާރު ގެތަކާ ކުޅެން ބިލެއް ހުށަހެޅުމަކީ ވެސް ސަޅިކަމެއް ނޫން އިރު ސަރުކާރުން ފަނޑިޔާރުގެތަކާ ކުޅުމަކީ ބަޑި ބޭހާ ކުޅުން ފަދަ ކަމަކަށް ވުން ގާތެވެ.

ރާއްޖޭގެ ޝަރުއީ ދާއިރާ އޮތީ މިނިވަންކޮށް ކަމަށް ބުނަމުން ސަރުކާރުގެ ބޮޓުން ދޮގުފަތުރަމުންދާއިރު އިސް ފަނޑިޔާރު ގެއިން ސަރުކާރުން ތަސްދީގުކުރި ބިލެއްގެ މައްސަލަ ބަލަން ނިންމުމާ އެކު އެ ފަނޑިޔާރުގޭގެ ފަނޑިޔާރުންގެ އަދަދު ތިރިކުރަން ބިލެއް ހުށަހެޅުމަކީ ހިންޏަށް ހަކުރު އޮޅުވާލެވިދާނެ ކަމަށް ހީކޮށް ކުރާ ކަމެކޭ ބުނަން ފުރުސަތު ލިބެއެވެ.

ޝަރުއީ ދާއިރާއަކީ މިނިވަންކަމާ އެކު ރެގިއުލޭޓުކުރާ ތަނަކަށް ހަދައިފި ކަމަށް ބުނެ އައިސް ދެން މިފެންނަނީ ތިމާ މެން ނުުރުހޭ ގޮތަކަށް ކަންކުރުމުން އެ ފަނޑިޔާރުންނަށް ބިރު ދެއްކުމަށް ކަރުދާހެއްގައި ލިޔެ ގަނެފައި އޮތް މަޖިލީހަކަށް ހުށަހަޅައިގެން އުޅޭ މަންޒަރެވެ.

މީހެއް ވިއްޔާ ބުނާ ބަހުގެ އިތުބާރު އޮންނަންވާނެ އޭ ޒާމާނުއްސުރެ އަޑު އިވެމުންދާއިރު މިހާރު ރާއްޖޭގައި ހުންނެވި ވެރިމީހާގެ އިތުބާރު މިފަދަ ކިތަންމެ ކަމަކުން ރައްޔިތުން ކުރިމަތީ ގެއްލިއްޖެވެ. މިވަރުންވެސް ވިދާޅުވަނީ ދެވަނަ ދައުރެއްގަ ވާހަކައެވެ. އަޅުގަޑު ގާތަށް އަންނަނީ އަމަށަކު ހިންޏެއް ނޫނެވެ. ބުނާ ކޮންމެ ބައެއް ކުރިން ބުނި އެތި ކެންސަލްކުރަމުން ދުވާ ރައީސަކަށް ދެވަނަ ދައުރެއް ދޭނީ ހަގީގަތުގައިވެސް މީދާ ކޭ އުނބެއް ސިކުނޑީގެ ބަދަލުގައި ތިބި ބަޔެކެވެ.

އަޑަށް ބާރުލާ ޝަރުއީ ދާއިރާ މިނިވަންކޮށްފީމޭ ވިދާޅުވި ވިދާޅުވުން ތަންފީޒުކުރަން ނުކެރުނީތާއެވެ.

ސުޕްރީމް ކޯޓުގެ ބެންޗާ މި ސަރުކާރުން ނުކުޅޭނެ ކަމަށް ބަންޑާރަ ނައިބު އަހުމަދު އުޝާމް މީޑިއާގައި ވިދާޅުވިތާ ތިން މަސް ނުވެ އުޅެނިކޮށް ނެގި ގާގަޑަށް ބޮލިއެރީތާއެވެ.

ސުޕްރީމް ކޯޓުގެ ފަނޑިޔާރަކާ ގުޅޭ ސުލޫކީ މައްސަލައެއް ބެލުމަށްޓަކައި ފުލުހުން މެދުވެރިކޮށް ދަށު ކޯޓުތަކުގެ ފަނޑިޔާރުންތަކެއްގެ ބަޔާން ނަގަން މަސައްކަތް ކުރާކަމުގެ އަޑުތައް ފަހަކުން ފެތުރުމުން އެކަންވެސް ދޮގުކުރުމަށް ފަހު ދެން މިފެނުނީ މުޅިން އައު ގޮތަކަށް ފަނޑިޔާރު ގެތަކާ ކުޅެން އުޅޭ މަންޒަރެވެ.

ބާރު އޮތަތީ މަޖިލީހުގެ ނަހަމަ ބޭނުން ގޮނޑިއާލާ ބަނދެފައި ތިބި ޕީއެންސީގެ މެމްބަރުން މެދުވެރިކޮށް ހިފަން ސަރުކާރުން ފޫ މިގެޅީ ބިލެއް ވައްދައިގެންތާއެވެ. ފަނޑިޔާރުންނަށް ބިރު ދެއްކުމަކީ އެމްޑީޕީގެ ސަގާފަތެއްގެ ގޮތުގައި އޮތްއޮތުން މިއަދު ޕީއެންސީއިން ނިމުމަކަށް ގެނެއްސިއެވެ. އެކަމުގެ މުޅިން އާ ވާރޝަންއެއް ޕީއެންސީއިން ތައާރަފްކުރީތާއެވެ.

އިޖްރާއީ ނުކުތާތައް ނަގައިގެން އެ މައްސަލަ ލަސްކުރަން ސަރުކާރުން މަސައްކަތް ކުރުމަށްފަހު އެކަން ނާކާމިޔާބުވުމުން ބިލަކުން ޖަހާ ފަނޑިޔާރުން ބުރުއްސާލަން މަގު ކޮށަނީއެވެ.

ޖުޑީޝަލް ސާވިސް ކޮމިޝަންގައި ރައީސްގެ މަގާމު ތަމްސީލު ކުރައްވާ މެމްބަރު މުހައްމަދު ސަމީރު ކުއްލިއަކަށް ވަކިކޮށް، ޕީއެންސީގެ ޓިކެޓްގައި މަޖިލިސް އިންތިހާބުގައި ވާދަކޮށް ނާކާމިޔާބުވި ޔަޒްމީދު މުހައްމަދު އެ މަގާމަށް އައްޔަންކޮށްވެސް ކުޅުނީ ހާމަކަން ބޮޑު ރިއަލިޓިއެކެވެ.

ގައުމުގެ ދުސްތޫރާ ބެހޭ އެހާމެ ބޮޑު މައްސަލައެއް ސުޕްރީމް ކޯޓުގައި ހިނގަމުން ދަނިކޮށް އެ ކޯޓުގެ ބެންޗް ބަދަލުކުރަން ސަރުކާރުން މަސައްކަތް ފެށުމަކީ ބިރު ދެއްކުން ނޫން ގޮތަކަަށް ތަރުޖަމާ ކުރެވޭކަށް ނެތެވެ.

ދައުލަތުގެ މަގާމެއްގައި ހުރި ބޭފުޅަކަށް ވިޔަސް އަދި އަމިއްލަ ފަރުދަކު ނަމަވެސް ފަނޑިޔާރުންގެ މަސައްކަތާ ބެހި ނުފޫޒު ފޯރުވައިގެން ނުވާނެ ކަމަށް ގާނޫނު އަސާސީގައި ބުނެފައި އޮތްއިރު އެ ގާނޫނު އަސާސީގެ ދަށުން ހުވާ ކުރައްވައިގެން ހުންނަވާ ރައީސް މުއިއްޒު މިގެންދަވަނީ ފަނޑިޔާރުންނަށް ބިރު ދައްކަމުންނެވެ.

ފަނޑިޔާރުގެއަށް ނުފޫޒު ފޯރުވުން ނިމުމަކަށް އައީކަމަށްބުނެ ކަންބަލިއެއްގެ ކެހެރީގައި ފިލާ ހުންނަވާ ހިޔަޅު ވިސްނުމުގައި މިއަދު ބިލެއް ހުށަހަޅައިގެން ފަނޑިޔާރުންނަށް ނުފޫޒު ފޯރުވަން ތިޔަ ކުރައްވާ މަސައްކަތަކީ ޖުމްހޫރިއްޔަތުގެ ހުވާ ކުރެއްވި ދުވަހު ދެއްކެވި ވާހަކަތާ މުޅިން އިދިކީލަ ކަމެކެވެ.

ޖުޑީޝަރީއަށް ނުފޫޒު ފޯރުވުން ހުއްޓުނީ އޭ ބުނި ބުނުން ވެސް އުނބަށް ޖަހާ ތިޔަ ދައްކަވަނީ ތިން ބާރު ވަކިވެފައި އޮތް ރިޔާސީ ނިޒާމެއްގައި އަދި ޑިމޮކްރެސީއެއްގައި ދެއްކޭނެ އެންމެ ލަދު ހުތުރު މިސާލެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved