ދިވެހިރާއްޖޭގެ އިގްތިސޯދު ރަގަޅުކުރަން އެކު ފަރާތްތަކުން ލިބިފައި ހުރިކަމަށް ރައީސް ޑރ މުހައްމަދު މުއިއްޒު ވިދާޅުވި ފެހި ސިގްނަލްތައް އާޚިރުގައި ފެނިގެން ދިޔައީ ސައިބޯނި ބޮކިތަކަކަށް ވެގެން ދިޔަ މަންޒަރު ކަމަށް އިދިކޮޅު ޕާޓީ އެމްޑީޕީއިން ހާމަކޮށްފިއެވެ.

އެމްޑީޕީގެ ފަރާތުން މިފަދައިން ހާމަކޮށްފައިވަނީ، ރައްޔިތުންގެ މަޖިލީހުގެ މައިނޯރިޓީ ޕާޓީގެ ހައިސިއްޔަތުން މިއަހަރުގެ ރިޔާސީ ބަޔާނަށް ޖަވާބުދެމުންނެވެ.

އެގޮތުން މައިނޯރިޓީ ލީޑަރު ހިތަދޫ ދެކުނު ދާއިރާގެ މެމްބަރު އިބްރާހިމު ނާޒިލް މިއަދުގެ މަޖިލިސް ޖަލްސާގައި ރިޔާސީ ބަޔާނަށް ޖަވާބު ދެއްވަމުން ވިދާޅުވީ، މިއަދާ ހަމައަށް އައިއިރު ވެސް މާލީ އިސްލާހީ ފިޔަވަަޅުތައް އަޅަމުންދާ މަންޒަރު ނުފެންނަ ކަމަށާ ގައުމުގެ އަދުގެ ހާލަތާއި މި ރިޔާސީ ބަޔާނަކާ އެއްވެސް ގުޅުމެއް ނެތް ކަމަށެވެ.

މިއަހަރުގެ ރިޔާސީ ބަޔާނުން ރައްޔިތުން އިތުރަށް މާޔޫސްކޮށްފިކަމަށް ވިދާޅުވެ ނާޒިލް އިތުރަށް ވިދާޅުވީ އިގުތިސޯދީ އަދި މާލީ ކަންކަން ހައްލު ކުރާނެ ސިޔާސަތުތަކެެއް ރައީސް މުއިއްޒަށް ވިދާޅުވެ ނުދެއްވުނު ކަމަށެވެ. އެގޮތުން މި އަހަރުގެ ރިޔާސީ ބަޔާނަކީ މިހާތަނަށް އިވުނު އެންމެ އޮޅުވައިލުން ގިނަ ރިޔާސީ ބަޔާންކަމަށާ ފެނިގެންދިޔައީ ބޮޑެތި މުހިންމު ކަންކަން އުނިކޮށް ހިޔާލީ ވާހަކައެއް އުފައްދަން އުޅުނު މަންޒަރު ކަމަށް ވިދާޅުވެ ނާޒިލް ވަނީ ރައީސް މުއިއްޒު އިއްވެވި ރިޔާސީ ބަޔާނަށް ވަރަށް ބޮޑަށް ފާޑުވިދާޅުވެފައެވެ.

ސަރުކާރުން ބަޖެޓު ފައިނޭންސް ކުރުމަށް މިދިޔަ އަހަރު ވެސް ފައިސާ ނުހޯދޭ ކަމަށާއި އެއާއެކު ޑެފިސިޓް ރެކޯޑެއް މި ސަރުކާރުން ހަދާފައިވާ ކަމަށް ނާޒިލް ވިދާޅުވި އެވެ. ދަރަނި ނުނަގާނެ ކަމަށް ކެމްޕޭނުގައި ވިދާޅުވުމަށް ފަހު ވެރިކަމަށް ވަޑައިގެން ރައީސް އަމަލުކުރައްވަމުން ގެންދަވަނީ އެ ވާހަކަތަކާ ދިމާ އިދިކޮޅަށް ކަމަށް ވެސް ނާޒިލް ވިދާޅުވިއެވެ.

ހަމައެހެންމެ ސަރުކާރަށް 15 މަސް ދުވަސްވެގެންދިޔައިރު ވެސް ސިޔާސީ މުވައްޒަފުންގެ އަދަދު ސިއްރުކޮށްފައިވާ ކަމަށާއި އެ އަދަދު 3000 އަށް އަރާނެ ކަމަށް ވިދާޅުވެ ނާޒިލު ވިދާޅުވީ، ސަރުކާރުގެ ފުރަތަމަ އަހަރު ދައުލަތުގެ މުޅި ދައުލަތުގެ ތެރޭގައި ކޮރަޕްޝަނާއި ފަސާދަ އެންމެ މަތިން ފެށިގެން ތިރިއަށް އާންމުވެފައިވާ ކަމަށާއި މިއީ ދައުލަތުގެ ފައިސާއަށް ހިޔާނާތްތެރިވަމުންދާ ސަރުކާރެއް ކަމަށެވެ.