ދިވެހިންގެ މިނިވަްކަމުގެ ނިޝާން، ދިވެހި ދިދައިގައި އޮޓޯގުރާފުކުރި މައްސަލައިގައި ފަރސްޓް ލޭޑީ ސާޖިދާ މުހައްމަދު ރައްޔިތުންގެ ކިބައިން މައާފަށް އެދެން ޖެހޭ ކަމަށް ޕީޕަލްސް ނެޝަނަލް ފްރޮންޓު، (ޕީއެންއެފް)ގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.
މަލީހު މިފަދައިން ވިދާޅުވީ، ރައީސް މުހައްމަދު މުއިއްޒުގެ އަނބިކަބަލުން ސާޖިދާ އެމަނިކުފާނު އަރިހުގައި މިހާރު ދ އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ރަށެއްގެ ކުޑަކުދިންތަކަކަށް ދިވެހި ދިދައިގައި ސޮއިކުރައްވާ އޮޓޯގުރާފު ދެއްވާވާ ވީޑިއޯއެއް މީސްމީޑިޔާގައި ދައުރުވަމުންދާ ދަނޑިވަޅެއްގައި އެކްސްގައި ކުރެއްވި ޕޯސްޓެއްގައެވެ.
މަލީހު ވިދާޅުވީ، ނޭނގޭ ކަންކަމާ ހަވާލު ނުވާން ޖެހެނީ ސަބަބު މިހާރު ހާމަވާ ކަމަށާ ޤައުމީ ދިދައަކީ ފަރސްޓް ލޭޑި ސާޖިދާގެ ޑައިރީ ފޮތެއް ނޫންކަމަށެވެ. އަދި ފިރިކަލުންގެ ބައްޕާފުޅު ގެންގުޅުއްވި ފޮތެއްވެސް ނޫން ކަމަށް ވިދާޅުވެ މަލީހު ވަނީ ރާއްޖެއަކީ ރަސްކަމެއް ހިނގާތަނެއް ނޫންކަންވެސް ފާހަގަކުރައްވާފައެވެ.
މަލީހުގެ ޕޯސްޓު ނިންމަވާލައްވަމުން ވިދާޅުވެފައިވަނީ ދިދައިގެ ހުރުމަތް ކަނޑާލައްވާ ފަރސްޓް ލޭޑީ ދިދައަށް ކުރި ކުޑައިމީސްކަމަށް ދިވެހި ރައްޔިތުންގެ ކިބައިން މައާފަށް އެދެން ޖެހޭ ކަމަށެވެ.
މަލީހު މިފަދައިން ވިދާޅުވެފައިވާއިރު ފަރސްޓް ލޭޑީ ދިވެހި ދިދައިގައި ސޮއިކޮށް އޮޓޯގުރާފު ދެއްވާ ވީޑިއޯ އާންމުވުމާ އެކު ގިނަ ބަޔަކު ވަނި އެކަމާ ނުރުހުން ފާޅުކުރައްވާ މީސް މީޑިޔާގައި ޝުއޫރު ފާޅުކޮށްފައެވެ.
