ވެރިކަން ދިފާއު ނުކުރެވި ހަތަރު އަނގޮޅި ކަންމައްޗަށް ގޮސް އަގުޅި ޖެހުނީމަ އެމްޑީޕީއިން ހެދި ގޯސް މިހާރު ތަކުރާރުކުރަމުން ގެންދާ މަންޒަރު ފެންނަމުން ދާ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ބުރާސްފަތި ދުވަހުގެރޭ ބޭއްވި ޕީއެންއެފްގެ ޖަލްސާގައި ވާހަަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ ރާއްޖޭގެ ޝަރުއީ ނިޒާމާ ކުޅެން ފެށީ އެމްޑީޕީގެ ފުރަތަމަ ވެރިކަމުގައި ރައީސް މުހައްމަދު ނަޝީދު ކަމަށާ އެކަން އެހެން ކުރައްވަން ރައީސް ނަޝީދު ފެއްޓެވީ އެމަނިކުފާނުގެ ވެރިކަން ދިފާއުކުރަން ޖެހި ހުރިހާ ޗައްކަރެއް ނާކާމިޔާބުވެ ގޮތް ހުސްވެގެން ކަމަށެވެ.

އެގޮތުން އޭރު މަޖިލީހުގެ މެޖޯރިޓީވެސް ރައީސް ނަޝީދު ތަމްސީލުކުރަމުން ގެންދެވި ޕާޓީގައި ނެތުމުން ބޭނުންހާ ގާނޫނު ހެދޭނެ ޖާގަ އެމަނިކުފާނަށް ތަނަވަސް ނުވުމުން ވެސް ގާޒީންނާ އަދި ރައިސް ނަޝީދުގެ ވެރިކަމާ ދެކޮޅަށް ވާހަކަ ދައްކަވަން ފެއްޓެވި ސިޔާސީ ބޭފުޅުން ހައްޔަރުކޮށް އެ ބޭބޭފުޅުންނަށް ހުކުމް ޖަހައިދިން ފަނޑިޔާރުންނަށް ޕްރޮމޯޝަން ދިނުމުގެ ގޮތުން ސުޕްރީމު ކޯޓުގެ ބެންޗު އިތުރުކުރެއްވީ ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ މިއަދު ރައީސް މުއިއްޒުވެސް އެ ގެންދަވަނީ އެ މާޒީ ތަކުރާރުކުރައްވާ ވެރިކަމުގެ ދިފާއުގައި ގާނޫނުތައް އުފައްދާ ފަނޑިޔާރުގެތަކާ ވެސް ކުޅުއްވަމުން ކަމަށެވެ.

ރައީސް ޔާމީން ވިދާޅުވީ ފަނޑިޔާރު ގެތަކާ ކުޅުމުން ރައީސް މުއިއްޒަށް ފައިދާވީ ނަމަވެސް ދިވެހި ދައުލަތް އަނދިރި ދައުލަތަކަށް ބަދަލުވެފައިވާ ކަމަށެވެ.

ރައީސް ޔާމީން ވިދާޅުވި، ރައީސް ނަޝީދުގެ ސިންޑްރޯމަށް ރައީސް މުއިއްޒުގެ ސިންޑްރޯމު ބަދަލުވެފައިވާ ކަމަށެވެ.