ދައުލަތުން ސުޕްރީމް ކޯޓުގެ ފަނޑިޔާރުން ގަން ހިންގުމަށް މަސައްކަތް ނުކުރުމަށް ރައީސް އަބްދުﷲ ޔާމީން އަބްދުލްގައްޔޫމް ގޮވާލައްވައިފިއެވެ.

ރައީސް ޔާމީން މިފަދައިން ވިދާޅުވެފައިވަނީ ޕީޕަލްސް ނޭޝަނަލް ފްރަންޓް ޕީއެންއެފްގެ ފްރަންޓް އޮފީސް ޖަލްސާގައި ވާހަކަފުޅު ދައްކަވަމުންނެވެ.

ދައުލަތުން ސުޕްރީމް ކޯޓުގެ ފަނޑިޔާރުން ގަން ހިންގުމަށް މަސައްކަތް ކުރުމާއި ގުޅިގެން ރައީސް ޔާމީންވަނީ ގިނަ ކަންބޮޑުވުންތަކެއް ފާޅުކޮށްފައެވެ.

ފަނޑިޔާރު ހުސްނު ސުއޫދާއި ބެހޭ ގޮތުން ބަލާ މައްސަލަ އަކީ 2022 ވަނަ އަހަރު ހިނގި ކަމެއް ކަމާއި އެއީ ފަނޑިޔާރަކު ކޮށްގެންވާނެފަދަ ކަމެއް ނޫންކަމަށް އެމަނިކުފާނުވަނީ ފާހަގަ ކުރައްވާފައެވެ. ނަމަވެސް ދައުލަތާއި ދެކޮޅަށް ސުޕްރީމް ކޯޓުގައި ދުސްތޫރީ މުހިންމު މައްސަލައެއްގެ އަޑު އެހުންތައް ކުރިއަށް ދަނިކޮށް އެ މައްސަލައަށް ހުރަސް އެޅުމަށްޓަކައި ފަނޑިޔާރުގެ މިފަދަ މައްސަލައެއް ފެންމަތި ކުރުމުން އެމަނިކުފާނުވަނީ ސުވާލު އުފައްދަވާފައެވެ.

މީގެ އިތުރުން ފަނޑިޔާރުން އަޒްމިރަލްޑާ ޒާހިރާއި މަހާޒް އަލީ ޒާހިރަކީ ކޮރަޕްޝަންގެ އަމަލު ހިނގާ ވަރަށް ވުރެއް ނަޒާހާތްތެރިކަން މާ ވަރުގަދަ ބޭފުޅުންކަމަށް ރައީސް ޔާމީން ވިދާޅުވެފައިވެއެވެ. އަދި އެ ދެ ބޭފުޅުންނަކީ މީހުން އަތުން ލާރި ނަގައިގެން މައްސަލަ ވަކި ގޮތަކަށް ނިންމާނެފަދަ ބޭފުޅުން ނޫންކަމަށް އެމަނިކުފާނުވަނީ ވިދާޅުވެފައެވެ.

ސުޕްރީމް ކޯޓުގެ ދެ ފަނޑިޔާރަކު ވަކިކުރާ ގޮތަށް ގާނޫނަށް ބަދަލު ގެނައުމުގެ މަސައްކަތް މަޖިލީހުގެ ތެރެއިން ފަށައި ޕާޓީން  ވަކިކުރުމުން  މަޖިލީހުގެ ގޮނޑި ގެއްލުވައިލެވޭ ގޮތަށް ގާނޫނުއަސާސީއަށް ގެނައި ބަދަލުގެ މައްސަލަ ކުރިއަށް ގެންދަން އެ ކޯޓުން ނިންމާފައި ވަނިކޮށެވެ.

ނަމަވެސް ޖުޑީޝަލް ސާވިސް ކޮމިޝަން ޖޭއެސްސީން ސުޕްރީމް ކޯޓުގެ ފަނޑިޔާރުން އަލްއުސްތާޛު ޙުސްނުއްސުޢޫދުއާ ޑރ އަޒްމިރާލްޑާ ޒާހިރު އަދި އަލްއުސްތާޛު މަޙާޒު ޢަލީ ޒާހިރު ސަސްޕެންޑް ކުރުމާއި ގުޅިގެން އެ މައްސަލައިގައި ވަގުތީ އަމުރުތަކާމެދު ގޮތެއް ނިންމަން ބާއްވަން ތާވަލުކުރި އަޑުއެހުންވަނީ ކެންސަލްކޮށްފައެވެ.