ލުބުނާނުގެ ދެކުނުގެ ސަރަހައްދުތަކަށް އިސްރާއީލުން ދިން ވައިގެ ހަމަލާއެއްގައި ހިޒްބުﷲގެ އިސް ކޮމާންޑަރެއް ޝަހީދުކޮށްލާފައިވާ ކަމަށް މީޑިއާ ރިޕޯޓްތައް ބުނެފިއެވެ.

ސަލާމަތީ އޮފިޝަލަކު އޭއެފްޕީ ނިއުސް އެޖެންސީއަށް މައުލޫމާތު ދެމުން ބުނީ، ޝަހީދުކޮށްލާފައި ވަނީ ހިޒްބުﷲގެ ދެކުނުގައި ހިންގާ އޮޕަރޭޝަންތައް ބެލެހެއްޓުމުގައި އިސް ދައުރެއް އަދާކުރެއްވި ކޮމާންޑަރެއް ކަމަށެވެ.

އޭނާ ޝަހީދުކޮށްލާފައި ދެކުނުގައި ހުރި އޭނާގެ ކާރަށް އަމާޒުކޮށް އިސްރާއީލުން ދިން ހަމަލާއެއްގައި ކަމަށްވެސް ބުނެފައި ވެއެވެ.

އިޒްރޭލުގެ ހަމަލާއެއްގައި ޝަހީދުވި ހިޒްބުﷲ އިސް ކޮމާންޑަރަކީ އެލީޓް ރަދުވާން ފޯސްގެ ޔުނިޓެއްގެ ޑެޕިއުޓީ ހެޑް ވިސާމް އަލް ތަވީލް ނުވަތަ "ޖަވާދު" ކަމަށް އަލްޖަޒީރާއިން ވަނީ ރިޕޯޓްކޮށްފައެވެ.

އޮކްޓޯބަރު މަހުގެ 7 ވަނަ ދުވަހު ބޯޑަރު ހުރަސްކޮށް ބޮމުގެ ހަމަލާތައް ދޭން ފެށި ފަހުން ލުބުނާނުގެ ދެކުނުގެ ސަރަހައްދަށް އިސްރާއީލުން ދިން ހަމަލާތަކުގައި ހިޒްބުﷲގެ 130 އަށް ވުރެ ގިނަ ހަނގުރާމަވެރިން ވަނީ ޝަހީދުވެފައެވެ

މި މަރާއެކު ޣައްޒާގައި ހިނގަމުންދާ ހަމަނުޖެހުންތައް ލުބުނާނާއި އެހެން ތަންތަނަށް ފެތުރިދާނެ ކަމުގެ ބިރު ވަނީ ބޮޑުވެފައެވެ.