ރައީސް ޑރ މުހައްމަދު މުއިއްޒު އަމަލުތައް ބައްޓަން ކުރައްވަމުން ގެންދަވާ ގޮތުން މިއަދު ދިވެހި ދައުލަތުގެ ތެރޭގައި އަނދިރި ދައުލަތެއް އުފެދިއްޖެ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ބުރާސްފަތި ދުވަހުގެރޭ ޕީއެންއެފުން ބޭއްވި ޖަލްސާގައި ވާހަަކަފުޅު ދައްކަވަމުންނެވެ.

ފަނޑިޔާރުގެތަކަށް އިސްލާހު ގެނައުމުގެ ނަމުގައި ރައީސް މުއިއްޒު މަޖިލީހުގެ ތެރެއިން ކުޅުއްވަމުން ގެންދަވާ މުޑުދާރު ކަންކަމަށާ އަދި ވްރިކަން ކުރުމުގެ ހުރިހާ ބާރެއް މުށުތެރެއަށް ލައްވައިގެން ރައީސް މުއިއްޒު ވެރިކަން ކުރައްވަމުން ގެންދަވާއިރު އެމަނިކުފާނު މިއަދު ކުރައްވާ ކޮންމެ ކަމެއް ކުރައްވަނީ އެމަނިކުފާނުގެ ވެރިކަމުގެ ދިފާއުގައި ދަތުރުކުރަމުން ދިޔަ އެއްކޮޅަށް ދުއްވާމަގުގެ ކޮޅާ ހަމައަށް ވަޑައިގެންެވުނުއިރު ދެން ދާންވީ މިސްރާބު ބަންދުވެފައި އޮތުމުން ވެރިކަމުގެ ދިފާއުގައި ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، ރައީސް މުއިއްޒު ވެރިކަމުގެ ދިފާއުގައި ކުރައްވާ ކަންކަމުން އެމަނިކުފާނަށް ފައިދާވާ ކަމަށެވެ. ނަމަވެސް ރައީސް މުއިއްޒު އެނގިވަޑައިނުގަންނަވާ ކަމަކީ ރައީސް މުއިއްޒު އަމިއްލަ މަންފާއަށް ކުރައްވާ ކަންތަކުގެ ސަބަބުން ދިވެހި ދައުލަތް އަނދިރި ދައުލަތަކަށް ބަދަލުވެގެންދާ ކަން ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ ތިން ބާރު މިހާރު އޮތީ ރައީސް މުއިއްޒުގެ މުށު ތެރޭގައި ކަމަށާ އެހާ ހިސާބުން އިންޓަރގިރިޓިއާ މެދު ސުވާލު އުފެދޭ ކަމަށެވެ.