ބާޒާރުގައި އަގު އުފުލެނީ، ކަނޑޫދޫ މިރުސް ކިލޯއެއް 300ރ. އަށް، ކާއްޓެއްގެ އަގު 50ރ. އަށް / ތޭރަ އޮންލައިން
ވިޔަފާރި
ބާޒާރުގައި އަގު އުފުލެނީ، ކަނޑޫދޫ މިރުސް ކިލޯއެއް 300ރ. އަށް، ކާއްޓެއްގެ އަގު 50ރ. އަށް
Qudhrathullah Ameen
ގުދުރަތުﷲ އަމީން
03 މާރިޗު 2025
މާލެ ސިޓީ

ރޯދަ މަހުގެ ފުރަތަމަ ދުވަހުން ފެށިގެން މާލޭގެ ދަތުރުވެރިންގެ މާރުކޭޓުގައި ތަކެތީގެ އަގު އުފުލެން ފަށައިފި އެވެ.

އެގޮތުން މިދިޔަ ހަފްތާގައި 85ރ. އަށް ހުރި ލެޓިއުސް ކިލޯއެއް މިހާރު ލިބެން ހުރީ 120ރ. އަށެވެ. އަދި ބާޒާރުގެ ގޮޅިތަކުގައި ލެޓިއުސް މިހާރު ލިބެންހުރި މިންވަރު މަދުކަން ވެސް ފާހަގަކުރެވެ އެވެ.

ބާޒާރަށް މިއަދު ކަނޑޫދޫ މިރުސް ކިލޯއެއްގެ އަގު ހުރީ 300ރ. އަށް އުފުލިފަ އެވެ. އިއްޔެ ބާޒާރުގައި ކަނޑޫދޫ މިރުސް ކިލޯއެއް ލިބެން ހުރީ 250ރ. އަށެވެ. ރޯދަ މަހުގެ ފުރަތަމަ ދުވަހު ކަނޑޫދޫ މިރުސް ކިލޯއެއްގެ އަގު 200ރ. އަށް ވެސް ހުއްޓެވެ.

ރޯ ކަދުރު ކިލޯއެއް މިދިޔަ ހަފްތާގައި ބާޒާރުން 250ރ. އަށް ލިބެން ހުރިއިރު މިއަދު ކިލޯއެއް ލިބެން ހުރީ 300ރ. އަށް ވުރެ މަތިންނެވެ. ޖުމްހޫރީ މޭވާ (ޕެޝަން ފުރުޓު) ކިލޯއެއް ބާޒާރުގައި ހުރީ 120ރ. އަށެވެ. އެކަމަކު މިދިޔަ ހަފްތާގައި ޕެޝަން ފުރުޓު ކިލޯއެއްގެ އަގު ހުރީ 100ރ. އަށްކަން ފާހަގަކޮށްލެވެ އެވެ.

މީގެ އިތުރުން ބާޒާރުގައި މިއަދު ކާށި ލިބެން ހުރި މިންވަރު ބޮޑުތަނުން މަދުވެ ކާއްޓެއްގެ އަގު 50ރ. އަށް އަރައިފި އެވެ. ދަތުރުވެރިންގެ މާރުކޭޓުގައި އެންމެ ކުޑަ ކާއްޓެއްގެ އަގު ހުރީ 25ރ. އަށެވެ. އެއަށްވުރެ ބޮޑެތި ކާށި 30ރ. އަށް އަދި 50ރ. އަށް ވެސް ލިބެން ހުއްޓެވެ. ކުރުނބާގެ އަގަށް ބަލާއިރު ފުޅިއެއްގެ އަގު ހުރީ 160ރ. އަށެވެ. ވަކިން ކުރުނބައެއް ލިބެން ހުރީ 35ރ. އިން ފެށިގެން 50ރ. އަށެވެ.

އާދައިގެ ދޮންކެޔޮ ކިލޯއެއް 35ރ. އަށް ލިބެންހުރިއިރު، މާޅޮސް ކެޔޮ އަދި ފުސް ކެޔޮ ކިލޯއެއް ލިބެން ހުރީ 50ރ. އަށެވެ. އެކަމަކު ސުވާސާ ކެޔޮ ކިލޯއެއް 95ރ. އަށް ހުރިއިރު ސަންފާ ކެޔޮ ކިލޯއެއްގެ އަގު ހުރީ 90ރ. އަށެވެ.

އަދި ލޮނުމެދަށް ޑިމާންޑް ބޮޑުވެ ބާޒާރުގައި ލޮނުމެދު ކިލޯއެއް އުޅެނީ 100ރ. އާއި 150ރ. އާ ދެމެދުގެ އަގެއްގަ އެވެ.

މާރުކޭޓްގައި ތަކެތި ވިއްކަން ތިބި ފަރާތްތަކުން ބުނީ ގިނަ ބާވަތްތަކުގެ އަގުތައް އުފުލިފައި ވަނީ އެތަކެތި މަދުވެ ޑިމާންޑް މަތިވެފައިވާތީ ކަމަށެވެ. އަދި ވިއްސާރައިގެ ސަބަބުން ސަޕްލައިއަށް ވެސް ދަތިވި ކަމަށް ވިޔަފާރިވެރިން ބުންޏެވެ.

ތަކެތީގެ އަގު ކޮންޓްރޯލް ކުރުމަށް ސަރުކާރުން މަސައްކަތް ކުރި ނަމަވެސް ބާޒާރުގައި ތަކެތީގެ އަގު ފެންނަ ޕޯޓަލްއެއް އިކޮނޮމިކް މިނިސްޓްރީން ތައާރަފްކުރުން ފިޔަވާ އަގު ތިރިކުރުމަށް އެދެވޭ ހައްލެއް ސަރުކާރަށް ހޯދިފާ ނުވާކަން ބާޒާރުގައި ބޮޑުވަމުން އަންނަ ތަކެތީގެ އަގުތަކުން އަންނަނީ ސާފުވަމުން ނެވެ. އަދި ސަރުކާރު ޕޯޓަލުގައި ހުންނަ އަގުތަކަށް ބާޒާރުން ތަކެތި ގަންނަން ނުލިބޭ ކަމަށް އާންމުން އަންނަނީ ބުނަމުން ނެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved