މިހާރު ރާއްޖޭގައި ރައްޔިތުން ނުތިބޭ ކަމަށާ މިހާރު މި ގައުމުގެ ރައްޔިތުންނަކީ ހަމައެކަނި ރައީސް ޑރ މުއިއްޒު ކަމަށް ވިދާޅުވެ ރައީސް އަބްދުﷲ ޔާމީން ސަރުކާރުން ކަންކުރަމުން ގެންދާ ގޮތަށް ފާޑުވިދާޅުވެއްޖެއެވެ.

ބުރާސްފަތި ދުވަހުގެރޭ ބޭއްވި ޕީއެންއެފްގެ ޖަލްސާގައި ވާހަކަފުޅު ދައްކަވަނުން ރައީސް ޔާމީން ވަނީ ރައްޔިތުންނަށް ލުއި ގޮތް ހޯދައިދޭން ސަރުކާރުން މަސައްކަތްނުކުރާކަމުގެ ތުހުމަތު އަމާޒުކުރައްވާފައެވެ.

އެގޮތުން އެމަނިކުފަނު ވިދާޅުވީ، ރޯދަ މަހު ރައްޔިތުންނަށް ހެޔޮގޮތް ހަދައިދޭނެ ކަމަށް އިކޮނޮމިކު މިނިސްޓަރު މުހައްމަދު ސައީދު ވިދާޅުވީއިރު ރޯދަ މަހުގެ ކުރިން ދެ ކަރަންޓު ބިލު ފޮނުވާ އެ ބިލުތަކުން އިންތިހާއަށް ރައްޔިތުން އަތުން ފައިސާ ނެގުމަށް ފަހު ދެން ރޯދަ މަހުގެ ބިލުން އެއްޗެއް ކަނޑާލުމަކީ ރައްޔިތުންނަށް ހެޔޮ ގޮތް ހެދުން ކަމަށް ނުބެލޭނެ ކަމަށެވެ.

މީގެ އިތުރުން ރައީސް ޔާމީން ވިދާޅުވީ، މިހާރު ގައުމުގެ ރައްޔިތުންގެ މަސްލަހަތަށް ވުރެ އިސްވަނީ ރައީސް މުއިއްޒުގެ މަސްލަހަތު ކަމަށާ އެގޮތުން މިހާރު ދިވެހި ރައްޔިތުން ނެތް ކަމަށާ މިހާރު ދިވެހި ރައްޔިތުންނަކީ ވެސް ރައީސް މުއިއްޒު އެކަނި ކަމަށް ވިދާޅުވެ ރައީސް ޔާމީން ވަނީ ސަރުކާރަށް ނުރުހުން އަމާޒުކުރައްވާފައެވެ.

ރައީސް ޔާމީން އިތުރަށް ވިދާޅުވީ ރައްޔިތުންނަށް ދިމާވާ ކޮންމެ ނިކަމެތިކަމެއްގެ ޒިންމާ ޕީއެންސީގެ މަޖިލިސް މެމްބަރުން ނަގަން ޖެހޭ ކަމަށާ އެގޮތުން މިއަދު މަޖިލީހުގައި ތިބި ޕީއެންސީ މެމްބަރުން ތިބީ ނަގޫ ފިތިފައި ކަމަށް ވެސް ރައީސް ޔާމީން ވިދާޅުވިއެވެ.