ރައީސް ޑރ. މުހައްމަދު މުއިއްޒުގެ ޕްރޮމޯޝަނަށް ފައިސާ ދީގެން ނޫސްތަކުގައި ކޮންމެފަދަ ސުރުހީ އެއްވެސް ޖެހިދާނެ އެވެ. އަދި ރައްޔިތުންގެ ބޭސް ފަރުވާ އަށް ހުރި ފައިސާކޮޅުން އެންސްޕާއިން ދަންނަވައިގެން ހޯއްދެވި ފައިސާއިން އުފެއްދި މީޑިއާ އިން ކޮންމެ ފަދަ ދޮގެއް ވެސް ހަބަރެއްގެ ސިފައިގައި ފެތުރިދާނެ އެވެ. ނަމަވެސް މިއަދުގެ ސިޔާސީ ހަގީގަތަކީ ޑރ. މުއިއްޒުގެ ޕްރޮމޯޝަނަށް މީޑިއާތައް ބޭނުންކޮށްގެން ޖަހާ ހާ ސުރުހީ އަކީ އަދި ލިޔާހާ ހަބަރަކީ ރައްޔިތުން ގަބޫލު ކުރާނެ ވާހަކަތަނެއް ނޫނެވެ. އެއަށް ވުރެއް ރައްޔިތުން ފިސާރި ހޭވެރިކަން ވެއްޖެ އެވެ،

ވެރިކަމުގެ ދަހިވެތިކަމުގައި ހެއްދި ބޮޑެތި ދޮގުތަކުގެ ނަތީޖާ އަކީ މިއަދު ރައްޔިތުން ނިކަމެތިވުމެވެ. އެމީހުންގެ އަތްމަތި ދަތިވުމެވެ. ފަގީރުވުމެވެ. އެއާ ހިލާފަށް ޑރ. މުއިއްޒު ވެރިކަމުގެ ހުވާ ކުރެއްވުމާއިއެކު ލިބުނު ދައުލަތިގެ ތިޖޫރީގެ "ތަޅުދަނޑި" އާއިއެކު ފުދުންތެރިވީ އެވެ. އަތްމަތި ތަނަވަސް ވީ އެވެ. މުއްސަދި ވީ އެވެ. ފައިސާ ވެރިއަކަށްވެ ރައްޔިތުންގެ ވެރިއެއްގެ ގޮޅިން ބޭރުވީ އެވެ.

މިއަދުގެ ސިޔާސީ ހަގީގަތުގެ އެއް ވާހަކަ މި ރިޕޯޓުގައި ފައިސަލާ ކޮށްލާނަމެވެ. ޑޮލަރެވެ. އެމެރިކާ ޑޮލަރެވެ. މުދާ އެތެރެކުރުމަށާއި ބޭރުކުރުމަށް ވެސް މުހިންމު ފައިސާ އެކެވެ. ހާއްސަކޮށް މުދާ އެތެރެ ކުރުމަށެވެ. ރާއްޖެއަކީ އާބާދީގެ ނިސްބަތުން އެންމެ ގިނަ އެމެރިކާ ޑޮލަރު ވަންނަ އެއް ގައުމެވެ. ރާއްޖޭގެ އިގްތިސޯދުގެ ތެރެއަށް އަހަރެއްގެ މައްޗަށް ހަތަރު ބިލިއަން ޑޮލަރުގެ އާމްދަނީ އެއް ޓޫރިޒަމުން ވަދެ އެވެ. މި ހުރިހާ ހަގީގަތެއް މިހެން ހުރި ނަމަވެސް އާއްމު މީހަކު އަސާސީ ބޭނުމަކަށް ޑޮލަރެއް ބޭނުންވިޔަސް އުޅެން ޖެހެނީ ނުލިބިގެންނެވެ.

ރާއްޖޭގައި އެމެރިކާ ޑޮލަރުގެ ރަސްމީ އަގަކީ 15:42ރ އެވެ. ނަމަވެސް މަރުކަޒީ ބޭންކް އެމްއެމްއޭ އަކީ، ޑޮލަރުގެ ތާށިކަން އަންނަ ދުވަސްވަރު ފައިސާގެ މާރުކޭޓްގެ ކޮންޓްރޯލް ހޯދޭ ފަދަ ގާބިލް އިދާރާއަކަށް ނުވާތީ، ޑޮލަރުުގެ މުއާމަލާތް ހިންގަނީ އަބަދުވެސް ކަޅު ބާޒާރުގަ އެވެ.

ކަޅު ބާޒާރުން ޑޮލަރު ސާފުކޮށް އެމެރިކާ ޑޮލަރުގެ އަގު ތިރި ކުރުމަކީ ރައީސް ޑރ، މުއިއްޒުގެ ރިޔާސީ ވައުދެކެވެ. އިންތިހާބު ދުވަސްކޮޅު ވިދާޅުވީ ޑޮލަރުގެ އަގު އުފުލިގެން އުޅެން ދެން ނުޖެހޭނެ ކަމަށާއި ދެން ފެންނާނީ ޑޮލަރުގެ އަގު ހެޔޮވަމުން ދާތަން ކަމަށް ރައީސް ޑރ. މުހައްމަދު މުއިއްޒު ވެސް ވަނީ ވިދާޅުވެފަ އެވެ.

ނަމަވެސް ސަރުކާރަށް 16 މަސް ވެގެން ދިޔައީ އެވެ. ރައީސް އެ ވިދާޅުވާ ހާލަތު އަދި އުފަން ނުވެ އެވެ. ނަމަވެސް މުއިއްޒު ކޮންޓްރޯލް ކުރާ ނޫސް ތަކުގައި ރިޕޯޓް ކުރަނީ "ޑޮލަރު އަގު ތިރި ވެއްޖެ" އެވެ. އޮޅުވާލުމެވެ. މުއިއްޒުގެ ވެރިކަމުގެ ތޮބީއަތުގައި ހުރި ދޮގު ހެދުމުގެ ފަލްސަފާގެ ތެރެއިން ރައީސް އޮފީހުން ލިޔެ ނޫސްތަކަށް ފައިސާ ދީގެން ޖަހާ އާޓިކަލްތަކުން މިއަދު ސަރުކާރަށް މޮޅެއް ލިބޭނެ ކަމަށް ދެކުމަކީ ހިޔަންނަށް މުޑި ނެގުމެވެ. ސަރުކާރުން ނޫސްތަކަށް ފައިސާ ދީގެން އޮޅުވާ ލުމާ މަކަރު ހެދުން ނޫން ކަމެއް ޑޮލަރުގެ މައްސަލައިން ވެސް ނުފެނެ އެވެ.

މިއަދު ވެސް ބާޒާރުގައި ޑޮލަރު އެހުރީ ރައްޔިތުން އަތްފޯރާ ވަރަށްވުރެ މަތީ ގައި އެވެ. ބޭސްފަރުވާ އަށް ބޭރަށް ދާން ކުރަން ޖެހޭ ހަރަދަށް ބޭނުންވާ ޑޮލަރާއި ދަރިންގެ މަތީ ތައުލީމަށް ހޯދަންޖެހޭ ޑޮލަރަށް ރައްޔިތުން ސަލާން ޖެހުން ނޫން ކަމެއް މިއަދު ވެސް ފެންނާކަން ނެތެވެ. މިއަދު ރާއްޖޭގެ ކަޅު ބާޒާރުގައި ޑޮލަރު ލިބެން އެހުރީ ރާއްޖޭގެ ވިޔަފާޜި މައި ދޮރާށި ކޮވިޑް ދުވަސް ވަރު ބަންދުކޮށް ގެން އުޅުނު ދުވަސްވަރު ވެސް ނުއުފުލޭ ވަރުގައި އެވެ. އެއާޕޯޓް ބަންދުކޮށް ރާއްޖޭގެ ހުރިހާ ރިސޯޓެއް ބަންދުކޮށް ފަތުރުވެރިން ރާއްޖެ އައުން މަނާ ވެފައި އޮތް ޒަމާނުގައި ވެސް ޑޮލަރު 19 އިން ދަށުން ގަންނަން ލިބުނެވެ.

ނަމަވެސް މިއަދު ނާތަހުޒީބު ނާގާބިލު ވެރިއެއްގެ ސަބަބުން ގައުމު މިއޮތީ ދުވަހަކު ނުދާހާ ފަހަތަށް ޑޮލަރު މައްސަލައިގައި ވެސް ގޮސްފައެވެ. ރާއްޖޭގައި އެންމެ ފުޅާ ދާއިރާއެއްގައި ޑޮލަރުގެ މުއަމަލާތް ކުރުމަށް ބޭނުންކުރާ ވައިބާ ގްރޫޕްގައި ވެސް ޑޮލަރެއްގެ އަގު މިއަދު ހުރީ 19 ރުފިޔާ އަދި 20 ރުފިޔާ ރޭޓުގަ އެވެ.

ނަމަވެސް ސަރުކާރުން ކޮންޓްރޯލް ކުރާ ޓީވީ ތަކާއި ނޫސްތަކުން ޑޮލަރު އަގު ތިރިވެ 18 އަށް ލިބެން ހުންނަ ކަމަށް ރިޕޯޓްކޮށްފައި ހުންނަތަން ފެނެއެވެ. ނަމަވެސް ހިތާމައަކީ އެ ވިދާޅުވާ ހެޔޮ އަގުގައި ޑޮލަރު ގަންނަން އެ މީޑިއާތަކުގައި އުޅޭ މުވައްޒަފުންނަށް ވެސް ނުލިބުމެވެ. އަދި އެމީހުންގެ މީޑިއާއިން އެ ވިދާޅުވާ އަގަށް ޑޮލަރު ލިބެން ހުންނަ ތަނެއް ވެސް ހުދު އެމީހުންނަށް ބުނެ ނުދެވެ އެވެ. ވާނީ ވެސް އެހެންތާ އެވެ. ދޮގެއްގެ މައްޗަށް އުފަން ކުރާ ތެދެއްގެ ހާލިން ވެސް ފެންނާނީ ދޮގެވެ.

އިކޮނޮމިކް މިނިސްޓަރު މުހައްމަދު ސައީދު ވެސް ވިދާޅުވި އަޑު އެހީމެވެ. ޑޮލަރު ފޮރުވައިގެން ތިބޭނަމަ ހުރި ޑޮލަރު ކޮޅުގެ އަގު ވެއްޓި އޭގެ ހަގީގީ ފައިދާ ނުލިބިދާނެ އެވެ. މީގެ އިތުރުން ސައީދު ވަނީ ރާއްޖެއަށް މިހާރު ދިމާވެފައިވާ ޑޮލަރުގެ މައްސަލަ ކުރިއަށް އޮތް ދެތިންމަސް ދުވަހުގެ ތެރޭގައި ހައްލުކުރެވޭނެ ކަމަށް 2024 ވަނަ އަހަރުގެ ފެބުރުއަރީ މަހު ވިދާޅުވެފަ އެވެ. އަދި ނުވިތާކަށް ފަތުރުވެރިކަމުގެ ދާއިރާގައި ހިދުމަތްދޭ ފަރާތްތަކުގެ އެކައުންޓުތަކަށް ވަންނަ ޑޮލަރު ރާއްޖޭގެ ބޭންކުތައް މެދުވެރިކޮށް މާރުކުރަން ޖެހޭ ގޮތަށް އެކުލަވާލި ބޭރު ފައިސާއާ ބެހޭ ގާނޫނަށް އަމަލު ކުރަން ވެސް ފަށައިފި އެވެ. އަދި މި ގާނޫނަށް އަމަލު ކުރަން ފެށިފަހުން މިހާތަނަށް 50 މިލިއަނަށްވުރެ ގިނަ ޑޮލަރު ވެސް މާރުކޮށްފި އެވެ.

ނަމަވެސް އަދި އާ ސަރުކާރަށް 16 މަސް ވީއިރު މަދު މަހުޖަނުންނާއި ރާއްޖޭގައި ގަވާއިދާ ހިލާފަށް އެތެރެވެގެން އުޅޭ "ބިދޭސީ ގޭންގް" ތަކުން ކޮންޓްރޯލްކުރާ ޑޮލަރުގެ ކަޅު ބާޒާރު ފުނޑާލެވިފައެއް ނުވެ އެވެ. ވާނީ ވެސް އެހެންތާ އެވެ. ރާއްޖޭގެ މި އަނދިރި ކަޅު ބާޒާރުގެ ފަހަތުގައި އޮތީ "މުއިއްޒު ކަޅު ސަރުކާރު" އެވެ. މިހާލަތުގައި ސުވާލަކީ ގާނޫނީ ސަރުކާރެއް އެބައޮތް ހެއްޔެވެ..؟ އެމެރިކާ ޑޮލަރެއްގެ އަގުހުރީ 19 ރުފިޔާއިން މަތީގައި..! އެވެ.