އުއްތަމަ ފަނޑިޔާރުގެ ނަޒާހަތްތެރިކަން ގެއްލިއްޖެކަމަށާ އެހެންކަމުން އެމަނިކުފާނު އިސްތިއުފާ ދެއްވަން ޖެހޭކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވީ، ޕީއެންއެފުން ބުރާސްފަތި ދުވަހުގެރޭ ބޭއްވި ޖަލްސާގައެވެ.
ރައީސް ޔާމީން ވަނީ ސުޕްރީމު ކޯޓަށް އަލީ ހުސެއިން ހުށަހެޅުއްވި ދުސްތޫރީ މައްސަލައިގެ އަޑުއެހުންތައް ކުރިއަށް ގެންދާ މައްސަލަ ކުރިއަށް ގެންދަން ފެށި ހިސާބުން ސުޕްރީމު ކޯޓުގެ ތެރެއިން ސަރުކާރަށް މައުލޫމާތު ހިއްސާކުރަމުން ދިޔަކަން މިހާރު ހާމަވެފައިވާ ކަމަށާ އެގޮތުން މަޖިލީހުގެ ނައިބު ރައީސް އަހުމަދު ނާޒިމް މެދުވެރިކޮށް ސުޕްރީމު ކޯޓަށް ނުފޫޒުފޯރުވަމުން ގެންދާ ކަމަށެވެ. އެގޮތުން ރިސޯޓުތަކަށް ވަޑައިގެން ސިޔާސީ މީހުން ބައްދަލުވުންތައް ބާއްވަމުން ގެންދާއިރު އެ ރިސޯޓުތަކުގައި ވެސް އަމާނާތްތެރި ނަޒާހާތްތެރި ދިވެހިން ތިބޭކަން އެވެރިން ހަނދާން ނައްތާލައިގެން ނުވާނެ ކަމަށްވެސް ރައީސް ޔާމީން ވިދާޅުވިއެވެ.
އެމަނިކުފާނު ވިދާޅުވީ ނާޒިމްއާ އެކު ސުޕްރީމު ކޯޓުގެ އުއްތަމަ ފަނޑިޔާރު ބައްދަލުކުރެއްވިކަމާ މަޝްވަރާތައް ކުރިއަށް ގެންދިޔަކަން ހާމަވުމުން އެމަނިކުފާނުގެ ނަޒާހާތްތެރިކަން ގެއްލިއްޖެ ކަމަށާ އެހެންކަމުން އުއްތަމަ ފަނޑިޔާރުގެ މަގާމުން މުއުތަސިމް އަދުނާން އިސްތިއުފާ ދެއްވަން ޖެހޭ ކަމަށް ރައީސް ޔާމީން ވިދާޅުވިއެވެ.
ޖޭއެސްސީ މިހާރުވެސް އެ ބޭނުންކުރަނީ ހަތިޔާރެއްގެ ގޮތުގައި. ހުސްނުއްސުއޫދަކީ ސިޔާސީ ބޭފުޅެއްކަން ޖޭއެސްސީއަށް އެނގެން ޖެހެނީ މިއަދަކު ނޫން. އުއްތަމަ ފަނޑިޔާރު ހުރީ ކޮމްޕްރޮމައިޒުވެފައި، އިސްތިއުފާ ދޭން ޖެހޭ. އުއްތަމަ ފަނޑިޔާރަކަށް ހުންނަ މީހަކަށް ސިޔާސީ މީހުންނާ ބައްދަލުކޮށް ވާހަކަދެކެވިގެން ނުވާނެ.
ރައީސް ޔާމީން
ރައީސް ޔާމީން އިތުރަށް ވިދާޅުވީ ސަރުކާރުގެ އަމަލުތަކުން ހާމަވަނީ ސުޕްރީމު ކޯޓަށް ހުށަހަޅާފައި އޮތީ ސައްޚަ ދުސްތޫރީ މައްސަލައެއްކަންކަމަށެވެ.
