ވޯޓު އެއްވަރުވުމުން މުނައްވަރު ވޯޓު ދެއްވީ ފައިސާ ޗާޕުކުރަން ފެންނަ ކަމަށް / ރައީސް އޮފިސް
ހަބަރު
ފައިސާ ޗާޕުކުރަން ފެންނަތޯ ބަލަން ނެގި ވޯޓު އަޣްލަބިއްޔަތު ލިބުނީ ގަވަރުނަރުގެ ވޯޓުގެ ސަބަބުން!
Mariyam Isaadha
މަރިޔަމް އިސާދާ
11 މާރިޗު 2025
މާލެ ސިޓީ

މަރުކަޒީ ބޭންކު (މޯލްޑިވްސް މަނިޓަރީ އޮތޯރިޓީ) އެމްއެމްއޭ މެދުވެރިކޮށް ރާއްޖޭގެ ތާރީހުގައި ވެސް ޗާޕުނުކުރާ ވަރަށް ފައިސާ ޗާޕުކުރަން ހުށަހަޅައި އެ ނިންމުން ނިންމުމުގައި އެންމެ އިސްކޮށް އުޅުއްވީ ގަވަރުނަރު އަހްމަދު މުނައްވަރުކަމަށް ޚަބަރު ލިބިއްޖެއެވެ.

އިގްތިސޯދު ރަގަޅުކުރަން ވެސް އަދި އެހެން ކަމަކު ވެސް ފައިސާ ޗާޕުނުކުރާނެ ކަމަށް ރައީސް ޑރ މުހައްމަދު މުއިއްޒު ވެވަޑައިގެންެވި ވައުދާ ޚިލާފުވެ މި ސަރުކާރުން ވަނީ ސަރުކާރުގެ ބޭނުމަށް ބިން ގަންނަން ކަމަށް ބުނެ ފައިސާ ޗާޕުކުރަން ނިންމާފައެވެ.

އެގޮތުން އެމްއެމްްއޭގެ ބޯޑުން އެ ނިންމުން ނިންމި ދުވަހު ބޯޑަށް ހާޒިރުވީ ފަސް މެންބަރުން ކަމަށާ ޖުމުލަ ހަތް މެންބަރުން ތިބޭ ބޯޑުގައި އެ ދުވަހުގެ ބައްދަލުވުމަށް ހާޒިރު ނުވަނީ ޕްރައިވެޓް ސެކްޓަރު ތަމްސީލު ކުރެއްވި ފާތިމަތު ޝަފީގާ އާއި ޑެޕިއުޓީ ގަވަރުނަރު އަހްމަދު އިމާދު ކަމަށް ވެއެވެ.

އެ ދުވަހު ނެގި ވޯޓުގައި ފައިސާ ޗާޕު ކުރުމަށް ވޯޓު ދިނީ އިކޮނޮމިކް މިނިސްޓްރީ ތަމްސީލުކުރާ ޝުހާދު އިބްރާހިމް އަދި އިދުހާމް ހުސައިންއެވެ. އެ ހުށަހެޅުމާ ދެކޮޅު ހެދީ ފިނޭންސަށް ދާދިފަހުން އިސްތިއުފާ ހުށަހެޅި އަހްމަދު ޒަޔާން އަދި ޕްރައިވެޓް ސެކްޓަރު ތަމްސީލު ކުރައްވާ މަހުޒޫމް ސަލީމް ކަމަށް ވެއެވެ.

ނަމަވެސް އެ ހުށަހެޅުން ފާސްކުރަން ނެގި ވޯޓު އެއްވަރުވެފައިވެއެވެ. އެއާއެކު ބޯޑުގެ ރިޔާސަތު ބެލެހެއްޓެވި ގަވަރުނަރު މުނައްވަރު ވޯޓު ދެއްވީ އެ ހުށަހެޅުން ފާސްކޮށް ރެކޯޑު އަދަދަކަށް ފައިސާ ޗާޕު ކުރުމަށެވެ. އެހެންކަމުން ފައިސާ ޗާޕުކުރަން ނިންމަން އަޣަލަބިއްޔަތު ލިބުނީ ގަވަރުނަރު މުނައްވަރު އެ ގޮތަށް ވޯޓު ދެއްވުމުން ކަމަށްވެއެވެ.

އެ ގޮތަށް ބޯޑުން ނިންމިތާ މާ ގިނަ އިރުތަކެއް ނުވަނީސް އިކޮނޮމިކް މިނިސްޓްރީ ތަމްސީލުކުރާ ޝުހާދު ވަނީ އެ ގޮތަށް ފާސްކުރަން ކުރި ތާއީދު އަނބުރާ ނަގާފައެވެ.

އާންމު ގޮތެއްގައި ބޯޑަށް ކަމެއް ނިންމުމަށް ހުށަހެޅުމުގެ ކުރިން އެ ކަމެއްގެ ދިރާސާތަކާއި، ލިޔެކިޔުންތަކާއި، މާލީ ފޯކާސްޓްތަކާ އެކު ފުޅާ ދާއިރާއެއްގައި މަޝްވަރާ ކުރާ ނަމަވެސް މިކަމުގައި އެފަދަ އެކަށީގެންވާ މަޝްވަރާއެއް ކޮށްފައި ނުވާކަމަށް މައުލޫމާތު ލިބިފައިވެއެވެ. ނަމަވެސް ސަރުކާރުގެ ނުފޫޒުގެ ސަބަބުން އެ ގޮތަށް ފާސްކޮށް ކުރިއަށް ގެންދަން މަޖްބޫރުވެފައިވާކަމަށްވެސް ވެއެވެ.

މި ސަރުކާރުން ފައިސާ ޗާޕުކުރަން ނިންމާފައިވާއިރު ނިމިދިޔަ ސަރުކާރުގައި ފައިސާ ޗާ÷ުކުރުމުން އެންމެ ބޮޑަށް ފާޑުކީ ބޭފުޅުން މިއަދު ތިއްބެވީ މި ސަރުކާރުގެ އިސް ފަޑީގައެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved