އިދާރީ ހުރިހާ މުވައްޒަފުން އިސްތިއުފާދީފައިވާއިރު ސަރުކާރުން ގާނޫނަށް ގެނައި އިސްލާހާއެކު ކައުންސިލަށް މުވައްޒަފުން ނެގޭނެ ގޮތެއް ސަރުކާރުގެ ބަހެއް ނެތުމުން ރައްޔިތުން ނުކުތުމެ ކައުންސިލް ބަންދުކޮށްފިއެވެ.
މިފަދަ ކަމެއް ހިނގާފައި މިވަނީ ވ. އަތޮޅު ރަކީދޫގައެވެ.
މކަން ހާމަވެފައިވަނީ ވ. އަތޮޅު ކައުންސިލްގެ ރައީސް، ޝުޖާޢު ޢަލީ މީސްމީޑިއާގައި ހިއްސާކުރެއްވި މަޢުލޫމާތާއި ފޮޓޯތަކުންނެވެ. ޝުޖާއު ކުރެއްވި ޕޯސްޓުން ފެންނަ ގޮތުގައި، ރައްޔިތުން ވަނީ ކައުންސިލް އިދާރާގެ ދޮރުގެ ހުރަހަށް ވާހެން ދެ ފިލާކޮޅު އަޅާ ދޮރު ބަންދުކޮށްފައެވެ. އަދި ދޮރުގައި މޭޒުތަކެއް ލައްގާފައި ވެސް ހުއްޓެވެ.
މި ފޮޓޯތަކާއެކު ޝުޖާއު ލިޔުއްވާފައިވާ ގޮތުގައި، ވ. ރަކީދޫ ކައުންސިލް އިދާރާގެ ހުރިހާ އިދާރީ މުވައްޒަފުން އިސްތިއުފާ ދިނުމުގެ އިތުރުން، ތިން ކައުންސިލަރަކު ވެސް ވަނީ މަޤާމުން ވަކިވެފައެވެ. މި ސަބަބާ ހުރެ ރައްޔިތުންނަށް ލިބެންޖެހޭ އެއްވެސް ޚިދުމަތެއް ނުލިބޭތީ، ރައްޔިތުން ވަނީ ހޯމ ދުވަހުގެ ހެނދުނު 11:30 ހާއިރު ނިކުމެ އެ ރަށު ކައުންސިލް އިދާރާ ބަންދުކޮށްފައެވެ.
ރަކީދޫ ކައުންސިލުގެ ރައީސް ޢަބްދުﷲ ރަޝީދު ރާއްޖޭގެ ބައެއް މީޑިއާތަކަށް މަޢުލޫމާތު ދެއްވަމުން ވިދާޅުވީ، ކައުންސިލްގެ އިދާރީ ތިން މުވައްޒަފުން އިސްތިއުފާ ދިންތާ މިހާރު ހަފުތާއެއް ވެފައިވާ ކަމަށެވެ. އަދި ކައުންސިލްގެ ނައިބު ރައީސާއި އިތުރު މެންބަރަކު ވެސް ވަނީ އިސްތިއުފާ ދެއްވާފައި ކަމަށާއި، މިވަގުތު އިދާރީގޮތުން ކައުންސިލް ހިންގާނެ އެއްވެސް މުވައްޒަފަކު ނެތް ކަމަށް އޭނާ ފާހަގަކުރެއްވިއެވެ.
އިސްތިއުފާދިން ކައުންސިލަރުންގެ ތެރޭގައި ރަކިދޫ ކައުންސިލްގެ ނައިބު ރައީސް އާ އިތުރު ކައުންސިލަރަކުވެސް ހިމެނޭއިރު، ކައުންސިލްގެ ރައީސް ވިދާޅުވީ، މުވައްޒަފުން ހޯދުމަށް ސިވިލް ސާވިސް ކޮމިޝަން (ސީއެސްސީ) އަދި ލޯކަލް ގަވަމަންޓް އޮތޯރިޓީ (އެލްޖީއޭ) ގައި އެދިފައިވާ ކަމަށެވެ. ނަމަވެސް، ލާމަރުކަޒީ ޤާނޫނަށް ގެނެވުނު ބަދަލެއްގެ ސަބަބުން، ކައުންސިލްތަކުގެ ދައުރު ނިމެން އަހަރަކަށް ވުމުން އެލްޖީއޭ އާއި ފިނޭންސް މިނިސްޓްރީގެ ހުއްދަ ނެތި މުވައްޒަފުން ނުނެގޭނެތީ، މުވައްޒަފުން ކައުންސިލަށް ނެގުން އޮތީ ހުއްޓިފައެވެ. އަދި މިހާތަނަށް އެފަދަ ހުއްދައެއް ލިބިފައިނުވާ ކަމަށް ވެސް އޭނާ ވިދާޅުވިއެވެ.
360 މީހުންގެ އާބާދީއެއް އޮންނަ ރަކީދޫގައި ކައުންސިލް އިދާރާ ހުއްޓުމަކަށް އައުމަކީ އެރަށުގައި މިހާރު ދިރިއުޅެމުންދާ 61 މީހުންނަށް ގޮންޖެހުންތަކެއް ކުރިމަތިވާނެކަމެކެވެ.
