ޝުޖާއުއެވެ. ރައީސް ޔާމީންގެ ނަންފުޅު ބޭނުން ނުކުރި ނަމަ އަދިވެސް ތިބޭނީ މަގުމަތީގައެވެ! / ތޭރަގްރެފިކްސް
ރިޕޯޓު
ޝުޖާއުއެވެ. ރައީސް ޔާމީންގެ ނަންފުޅު ބޭނުން ނުކުރި ނަމަ އަދިވެސް ތިބޭނީ މަގުމަތީގައެވެ!
12 މާރިޗު 2025
މާލެ ސިޓީ

ރައީސް އަބްދުﷲ ޔާމީނަށް އެމްޑީޕީ ސަރުކާރުގައި އެމަނިކުފާނު ފްރޭމުކޮށް ހެކި އުފައްދައިގެން އިއްވި ނުހައްގުން ނަހަލާލު ހުކުމުތަކެއް ކަމަށް އެންމެ ވާރަށް ގޮވީ ޕީޕީއެމް / ޕީއެންސީގެ ވެރިންނެވެ. އޭރު ރައްޔިތުންނަށްވެސް އެ ލީޑާޝިޕުން ވިސްނައިދެމުން ދިޔައީ ރައީސް ޔާމީނަށް ހުކުމް އިއްވާ އެމަނިކުފާނު ބަންދުކޮށްގެން އުޅެނީ އެ ސަރުކާރުން ރައީސް ޔާމީންއާ މެދު ޖެހިލުންވާތީ ކަމަށެވެ. އެއީ އެމަނިކުފާނަކީ ގައުމަށް ބޭނުންހާ ގޮތެއް ހަދަން ދޫކޮށްލައްވާނެ ވެރިއަކަށް ނުވުމުންނެވެ.

އެއާއެކު ރައީސް ޔާމީންގެ ހައްގުގައި ކަމަށް ބުނެ މަގުތައް މައްޗަށް ނުކުމެ އިހުތިޖާޖުތަކާ ހިނގާލުންވެސް މިހާރުގެ ވެރިން އޭރުގެ އިދިކޮޅުގައި ތިއްބަވާ ހިންގެވިއެވެ. ރައީސް ޔާމީން މިނިވަންކުރުމަށް ކަމަށް ބުނެ އެ ދުވަހު މަގުތައް މައްޗަށް ރައްޔިތުން ނެރެ ރައްޔިތުންގެ އިހުސާސުތަކުގެ ބޭނުންވެސް ހިފީ އަމިއްލަ މަންފާއާ ލާބައަށް ކަން މިއަދު ހާމަވެއެވެ. މިހެން ދެންނެވުމުން ފަހަރުގައި ބަޔަކު މީހުން ހިތްހަމަ ނުޖެހި ރުޅިވެސް އައިސްދާނެއެވެ. ނަމަވެސް ތަސްވީރު ބަލާނީ ތަސްވީރު ބުނާހެން ކަމަށް ވުމުން މިއަދު ވެރިކަން ލިބުމުން އޭރުގެ ޕީޕިއެމް / ޕީއެންސީގެ ވެރިން ރައީސް ޔާމީނާ މެދު އާ އަދި އެމަނިކުފާނު އޭރު އުޅުއްވި ޕާޓީއާ މެދުވެސް ކަންކުރި ގޮތް ނުހަނު ގާތުން ފެންނަން އޮތުމުންނެވެ.

ރައީސް ޔާމީން މި ގައުމުގެ ހައްގުގައި ހުރަގޭގެ ތޭރިތަކުގެ ފަހަތުގައި ގުނި އެންމެ ފަޅި ސިކުންތަކީ ވެސް އަޅުގަޑުމެންނަށް އޭގެ ހުރި ތަކްލީފު ވަޒަންވެސް ކޮށް ނުލެވޭނެކަމަކަށްވާއިރު މިއަދު ވެސް އެމަނިކުފާނު އެހުންނެވީ މުޅިއަކުން މިނިވަންވެފައެއް ނޫނޭ ދަންނަވަން ޖެހެއެވެ. ދައުވާތަކެއްގެ ވާ ފަށެއްގައި ބަނދެފައި ދޫކޮށްލުމެކޭ މިހާރުގެ ހާލަތެކޭ ތަފާތެއް ނެތެވެ. މި ސަރުކާރުންވެސް ރައީސް ޔާމީންއާ މެދު ޖެހިލުން ވަނީތާއެވެ. ނަމަވެސް މިއީ އެމަނިކުފާނުގެ މައްޗަށް އެމްޑީޕީ ސަރުކާރުން ހިންގި ނުހައްގު ޝަރީއަތްތައް ނިމުމަކަށް ގެެނެސް އެ ނުހައްގު ޝަރީއަތްތައް ހިންގާ ހަރާން ހުކުމް ކުރި ފަނޑިޔާރުންގެ މައްސަލަ ބަލާ ފަނޑިޔާރު ގެތަކުން ވަކިކުރާނެ ކަމަށް ބުނި ވެރިންގެ ސަރުކާރެކެވެ. އެންމެ ބާރަށް އެ ވާހަކަ ދެއްކި އެއް ބޭފުޅަކީ ބާރަށު ދާއިރާގެ މިއަދުގެ މެމްބަރު އިބްރާހިމު ޝުޖާއުއެވެ. މިހާރުގެ އެންމެ އާންމު ނަމުން ނަމަ ބާރަށު މައިކެވެ. އެ ދުވަހު ޝުޖާއު ކަރުން ނާރު ފުއްޕާފައި ބުނަމުން ދިޔައީ ރައީސް ޔާމީނަށް އެމްޑީޕީއިން އަނިޔާވެރިވި ވާހަކައެވެ. އަޅުގަޑުމެންނަށް މިއަދުވެސް ފެންނަނީ ހަމަ އެ މަންޒަރެވެ. ވެރިކަމަށް އަންނަން ބޭނުން ކުރި އަސާ ގަނޑު ލޮލަށް ފެނި ހިންދެމިލެވުމުން ނަގާ އަތުކޮޅަށް ހޫރާލާ އެކަނިކޮށްލުމަށް ވުރެ ބޮޑު އަނިޔާވެރިކަމެއް އޮންނާނެތޯއެވެ. ނޯންނާނެކަން ޔަގީނެވެ.

ތިމަންނާމެން މަގުތަކަށް ނުކުމެ މަސައްކަތްނުކުރި ނަމަ އަދިވެސް ރައީސް ޔާމީން އޮންނަވާނީ ޖަލުގައި ކަމަށް ބުނެ ބާރަށު މައިކުން އަޑުގަދަ ކުރަމުންދާއިރު، ޕޮޓެއްގައި އިން މުއިއްޒުގެ މި ބޮޓަށް ބުނެލާނަމެވެ. ރައީސް ޔާމީންގެ ނަންފުޅާ ހުސް ގޮނޑި އަދި ފޮޓޯފުޅު ބޭނުންނުކުރި ނަމަ އަދިވެސް ތިބޭނީ ދޫކޮށްލާ ދޫކޮށްލާ ގޮވާލަ ގޮވާލާ މަގުމަތީގައެވެ. މިވަރު ހަނދާން ނެތް ބަޔަކަށް ދެން އިތުރަށް ދައްކާނެ ވާހަކައެއް އޮންނާނެ ތޯއެވެ؟

ރައީސް ޑރ މުހައްމަދު މުއިއްޒަކީ ގައުމުގެ ރައްޔިތުން ކުރިން ދަންނަ ބޭފުޅެއް ނޫނެވެ. އެހެންކަމުން ރައީސް ޔާމީންގެ ހިޔަލުގައި ތިބެ ވެރިކަމަށް އާދެވުމުން އެކަން މިއަދުގެ ވެރިން ހަނދާން ނެތުނަސް ގިނައީ އެކަން ހަނދާނުގައި ބަހައްޓައިގެން ކަންކަން ހިނގާ އުސޫލު ބަލަން ތިބި ރައްޔިތުންނެވެ.

އުޑުގައި ޖެހިފައި ބިމުގައި ޖެހުނަސް، ޕީއެންސީއިން، މ.ދިމްޔާތު ޑރ މުހައްމަދު މުއިއްޒަށް ވެރިކަމަށް އާދެވުނީ ރައީސް ޔާމީންގެ ނަންފުޅު ބޭނުންކޮށްގެންނެވެ. އޭގެ ފަހުން ލިބުނު ގޮނޑިތަކުގެ ވާހަކަ ދެއްކުމެއް ނެތެވެ. އެހެނީ ވެރިކަން ލިބިގެން މެނުވީ އެހެން ގޮނޑިތަކެއް ނުލިބޭނެ ކަމީ 2018 އިން 2023އަށް ޕީޕީއެމް / ޕީއެންސީއިން ވެސް ދުށް ހަގީގަތަކަށް ވުމުންނެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved